خسته خانا خرجلرینی اؤد‌یه بیلمدیی اوچون آنانی کؤرپه‌سینه سود وئرمه‌یه قویماییبلار.

کؤرپه‌نین واختین‌دان ائرکه‌ن دونیایا گلمه‌سی ایله علاقدار اولاراق چاغانین حکیملرین نظارتی آلتین‌دا ساخلانیلماسی توصیه ائدیلیب.

بئله کی، ۱۵ گون اؤنجه گنج قادین دوغوم اوچون اردبیل‌ده یئرلشن بیر خسته‌خانایا گئدیب. کؤرپه‌نین ائرکه‌ن دوغوموندان دولایی، اونون باخیما احتیاجی اولدوغو بیلدیریلیب و کؤرپه اؤزل باخیم بؤلومونه وئریلیب. بیر نئچه گون سونرا عائله کؤرپه‌نی آلماق اوچون مراجعت ائدیب. لاکین خسته‌خانا خرجلری اؤدنیلمدیی اوچون ایشچیلر کؤرپه‌نی عائله‌یه وئرمه‌ییبلر. کؤپه‌نین باباسی مسئله ایله باغلی دانیشارکه‌ن قید ائدیب:

«یئزنم تیکینتی ایشچی‌سی‌سی‌دیر و آز گلیری وار. بونا گؤره قیزیمی اؤزوم خسته‌خانایا آپاردیم. ائرکن دوغوم اولدوغو اوچون چاره‌سیز قالیب کؤرپه‌نی خسته‌خانا حمایه‌سینه وئردیک کی، بونون دا خرجی چوخدور. او مبلغی اؤد‌یه‌جک گوجوموز اولمادی. بونا گؤره دونه‌ن کؤرپه‌نی بیزه وئرمه‌دیلر. چاره‌سیز قالاراق خبری میللت وکیلی و خسته‌خانا رئیسینه چاتدیردیق. حتی رئیسله تلفن‌دا دانیشدیق. آنجاق ایندییه کیمی هئچ بیر نتیجه آلا بیلممیشیک. نه اوچون دؤولت خسته‌خاناسی بیزله بئله داورانیر؟! کاسیب اولدوغوموز و خرجلری اؤد‌یه بیلمدییمیز اوچون خسته‌خانایا گئتمه حاقیمیز یوخ‌دور. دردیمیزی کیمه دئملیگیک؟ بیز نه اوچون تحقیر ائدیلیریک؟».

کؤرپه‌نین آناسی دا معلوم اولایلا باغلی تصوراتلارینی بؤلوشوب:

«منی ۳ ساعت گئج اوتاق عملینه آپاردیلار. ۳ ساعت دا حکیم گئج گلدی. عمل‌دن سونرا قیزیم ۶ ساعت آرالیق‌دا قالدی. هئچ کیمین اونلا ایشی اولمادی. بونا گؤره ده کؤرپه یاخشی نفس آلا بیلمدی. ایندی خرجلر چوخ اولدوغو اوچون اؤد‌مک گوجوموز یوخ‌دور. سیغورتا دفترچه‌مین اعتبارلی اولماسینا باخمایاراق بالامی وئرمیرلر. دونن بالاما سود وئرمک ایسته‌یه‌نده اوشاغی الیم‌دن آلیب، « خسته‌خانا خرجلرینی اؤدمیینجه سود وئرمه حاقین یوخدور»، – دئدیلر. آنامین ایسراریندان سونرا بیر اؤینه بالاما سود وئره بیلدیم».