هیندیستانین آمریکانین سانکسییا هده‌لرینه رغما روسییادان اس-۴۰۰ آلینماسینی نظره‌ده توتان موقاویله‌یه ایمضا آتماسی، همچینین نویابردان سونرا ایراندان نفت ایدخالینی داوام ائتدیرجیینی آچیقلاماسی دونیا نیظامین‌دا یئنی قطبلشمه احتیمالی یارادیر.

تانینمیش پولیتولوق ایلقار ولیزادنین بو ایستیقامت‌ده آخار. آز-آ موصاحیبه‌سینی تقدیم ائدیریک:

- هیندیستانین روسییا ایله س-۴۰۰ موقاویله‌سی، اوسته‌لیک، ایران‌دان نفت ایدخالینی داوام ائتدیرجیینی آچیقلاماسی نیین تظاهرودور: روسییا، ایران، چین و هیندیستان آمریکا قارشی بیر جبهه‌ده بیرلشیر؟

- بو اؤلکه‌لر اوچون اساس مسئله آمریکایا قارشی بیرلشمک دئییل. اونلار داها چوخ اؤز ماراقلارینا اویغون آددیملار آتیر. بلکه ده روسییا ایستیردی کی، چین، هیندیستان و دیگر اؤلکه‌لر آمریکایا قارشی بیرلشسین. اما چین و هیندیستان همیشه اؤز ماراقلارینا اویغون حرکت ائدیرلر. یعنی بو گون هیندیستانین اس-۴۰۰ موقاویله‌سی ایمضالاماسی، ایران‌دان آمریکا سانکسییالارینا رغما نفت آلماغا داوام ائتمه‌سی اونون ماراقلارینا خیدمت ائدیر. حاضردا هیندیستانین اقتصادیاتی سرعتله اینکیشاف ائدیر. هیندیستان اوجوز و الوئریشلی شرایط‌ده انرژی داشیییجیلارینی آلماغین طرفداری‌دیر. البته کی، اونا یاخین بازار ایران‌دیر. بو گون ایرانین تکلیفلری هیندیستان اوچون چوخ الوئریشلی اولدوغونا گؤره دهلی بو آددیمی آتیر. یعنی ایران‌ دان اوجوز و داوام‌لی ائنئرژینین آلینماسی هیندیستان ایستئهسال‌چیلارینا ایمکان وئریر کی، اؤز محصوللارینی رقابته داوام‌لی ائتسین. چونکی بو محصوللارین عرصه‌یه گلمه‌سین‌ده ائنئرژی داشیییجیلارینین رولو چوخ‌دور.

هیندیستانین روسییا ایله س-۴۰۰-له باغلی موقاویله ایمضالاماسی دا اونون ماراقلارینا اویغون‌دور. چونکی س-۴۰۰ هیندیستانا ایمکان وئریر کی، اؤز سرحدلرینی داها ائففئکتیو قوروسون.

دیگر طرف‌دن آبش طرفین‌دن هیندیستانا تطبیق ائدیله‌جک سانک‌سییالار، گؤرونور، او قدر ده هیندیستان اقتصادیاتی اوچون تأثیرلی اولمایاجاق. اونا گؤره ده هیندیستان بئله سئچیم ائدیب.

- «عمومی دوشمن» – البته، بورادا شرطی اولاراق دئییریک - چین و هیندیستانی اقتصادی-سیاسی باخیمدان داها دا یاخینلاشدیرا بیلرمی؟

- آمریکا هر زامان هیندیستان و چین آراسین‌دا اولان ضدیتلرین اؤز خیرینه چئوریلمه‌سینی ایسته‌ییب. اما حاضردا بورادا فرق‌لی منظره یارانیب. اصلینده نه چین، نه ده هیندیستان ماراغیندادیر کی، اوچونجو طرف بونلارین آراسین‌دا اولان ضدیت‌دن ایستیفاده ائتسین. اونا گؤره آمریکا بو ایکیطرف‌لی ضدیتلردن اوزاق ساخلاماق‌دا بو گون هر ایکی اؤلکه ماراق‌لیدیر. بو شرایط‌ده آمریکانین رسورسلاری دا او قدر چوخ دئییل. بو گون آمریکا بؤلگه‌ده باش وئره‌ن پروسسلرده داها چوخ تاماشاچی مؤوقعیین‌ده دوروب و یقین کی، بو ضدیتلرین داها دا درینلشمه‌سینی گؤزلییر.

- هیندیستانین اساس رقیبی اولان پاکیستان بیر زامانلار آمریکا یاخشی موناسیبتلره صاحب ایدی. لاکین ترامپ حاکمیته گلن‌دن سونرا پاکیستانلا آمریکا آراسین‌داکی موناسیبتلر گرگینلشیب. آمریکانین آسییادا اساس متفیقلریندن بیرینی ایتیرمه‌سی، اوسته‌لیک، چینله یاشانان اقتصادی محاربه، هیندیستانین ایسه بللی سئچی‌می واشینگتنون اورتا و جنوبی آسییا سیاستینه نئجه تأثیر ائد‌جک؟

- آمریکا دونیادا اولان موتتفیقلرینی ایتیرمک‌ده داوام ائدیر. بورادا تکجه پاکیستانی دئمک دوغرو اولماز. آرتیق آمریکا تورکییه کیمی متفیقینی ده ایتیرمک اوزره‌دیر. آمریکا ایله تورکییه آراسین‌دا بحران یاشانیر. بوتون بونلار داها چوخ آمریکا نین آقرسیو سیاستینین نتیجه‌سین‌ده باش وئریر. عینی زامان‌دا، آوروپادا اولان یاخین موتتفیقلری ایله آبش آراسین‌دا سویوقلوق یاشانیر. بو گون آمریکا نین اؤز متفیقلرینی ایتیرمه‌سی موختلیف رگیونلاردا دایاقلارینین ضعیفله‌مه‌سینه و لیدئر مؤوقعینین ایتیریلمه‌سینه گتیریب چیخاراجاق.

- پاکیستان کیمی موتتفیقی ایتیررسه، افغانیستان مسئله‌سی آمریکا اوچون نه ایله نتیجه‌لنه‌جک؟

- آمریکا یاخشی باشا دوشور کی، پاکیستانی ایتیرسه، افغانیستان سیاستینی حیاتا کئچیرمک اونون اوچون چوخ چتین اولاجاق. اونا گؤره ده آمریکا یئنی متفیقلر آختاریشین‌دادیر. خصوصیله ده مرکزی آسییانی اؤز پلانلارینا قاتماق ایستییر. حاضردا بونونلا باغلی موختلیف تکلیفلر ده سسله‌ن‌دیرمکده‌دیر. لاکین بورادا دا روسییانین مقاومتی ایله راستلاشیر. اونا گؤره ده رئگیون‌دا چوخ مورککب پروسئسلرین گئتدیینی دئیه بیلریک. دوشونوره‌م کی، بالانسلاشدیریلمیش سیاست‌دن اوزاقلاشماسی آمریکایا باها باشا گله‌جک.

- عمومیتله، چین و آمریکا آراسین‌دا گئدن ساواش نه ایله نتیجه‌لنه بیلر؟

- دوشونوره‌م کی، آمریکا بورادا خئیلی اودوزور. گئتدیکجه بو بؤیوک گوجلر - چین، آوروپا بیرلییی ، روسییا، هیندیستان و ب. – اؤز آرالاریندا اولان ضدیتلری مینیموما ائندیرمه‌یه چالیشیرلار. بورادا اساس هدف اؤز اقتصادی ماراقلارینی قوروماق، آمریکا تضییقلرینی نیتراللاشدیرماقدیر. نتیجه ایسه البته کی، آمریکانین خیرینه اولمایاجاق. اقتصادی ماراقلار نامینه آتیلان آددیملار ایستر-ایستمز سیاسی علاقه‌لری ده گوجله‌ن‌دیره‌جک و آمریکایا قارشی اولماسا دا، ان آزی، آمریکا ایله اقتصادی-سیاسی علاقه‌لری مینیموم سوییه‌ده اولان گوجلرین بیرلیکلری موشاهیده اولوناجاق.

البته. دوشونوره‌م کی، آمریکا بو پروسسه بیگانه قالمایاجاق و اؤز سهولرینی دوزلتمک اوچون حرکته کئچه‌جک. بو ایسه ترامپدان سونراکی دؤورده اولاجاق.