اوشاق واختی تبریزده اولان‌دا محله‌میزده حسین قهوه‌چی (چایخاناچی) آدلی بیر دلدوز وار ایدی. آدام هم ده او واخت یئنی قورولان ملا رژیمینه، سپاها باغلی اولدوغونا گؤره ایل بویو چکینمه‌دن بوتون الچاقلیقلاری ائدر، قونوم-قونشویا ایلیشر و ایشوئرنلیکله مشغول اولاردی.

بوتون بو شرفسیزلیکلرینه باخمایاراق، حسین قهوه‌چی اوروجلوق و محرم آیلاریندا قارا کؤینک گئیینر، اوروج توتار، ازادارلیق مراسملرینده دسته باشی کیمی الینده قیلینج میدان سولایار، نوحه دئییب، مرثیه اوخویاردی.

او، خصوصاً عاشورا گونو دینی شعرلر اوخویوب قیلینجلا باش یارماسی ایله مشهورلاشمیشدی. قهوه‌چی حسین اساساً باشینی دیبدن قیرخدیرغی اوچون اونون باشیندا اولان سایسیز چاپیقلار و یارا ایزلری گؤرونوشونو داها دا قورخولو ائدیردی.

محله‌ده یاشایان قوچعلی آدلی آغساققال موسیقیچی ایسه حسین قهوچینین الیندن ان چوخ اذیت چکه‌ن آدام ایدی. قوچعلی ایللر بویو ساز، قاوال و بالابان چالیب عائله‌سینی دولاندیرمیش، ایکی اوغولنو، بیر قیزینی اوخودوب ائوله‌ندیرسه ده، قوجا واختین‌دا ملا حاکمیتینین قاداغالاری و حسین قهوچینین ایشوئرنلیی سببیندن ایشسیز قالمیش، معیشت پروبلملری و محدودیتلر اوجباتیندان بیر دفعه ده انتحارا جهد ائتمیشدی.

بونا گؤره ده، کهنه‌دن اورادا یاشایان محله آداملاری قوچعلینی قاپالی و گیزلی شکل‌ده کئچیردیکلری شنلیک، نیشان و توی مراسملرینه دعوت ائدر، اونون قورخا-قورخا ائتدیی قیسا ایفالارینا گؤره داها یوکسک امک حاقی اؤدیردیلر.

همین مجلسلرین بیریندن خبر توتموش حسین قهوه‌چی قوچلینی ایش باشیندا، قاوال چالیب ماهنی اوخودوغو یئرده توتدورموش و جماعاتین گؤزو قارشی‌سیندا قوجا کیشییه ۶۰ شلاق وورولماسینا باعث اولموشدو.

قوچعلی محله آداملاری ایله صحبتینده بونو حسین قهوه‌چییه باغیشلامایاجاغینی دئسه ده، کیمسه اونون حسینه باتا بیلجیینه، اوندان قصاص آلاجاغینا اینانمامیشدی.

اوزون سؤزون قصاصی، سهو ائتمیرمسه ۱۹۸۱-جی ایلین عاشورا گونونده حسین قهوه‌چی نوبتی دفعه باش یارماغا حاضیرلاشدیغی واخت، عادتینه اویغون اولمایاراق و هئچ کیمین گؤزلمدیی بیر حالدا قوچعلی ده همین مراسمه قاتیلیر.

اینینده آغ کفن، الینده بالاجا قمه باش یارماغا حاضیرلاشان قوچعلینی گؤرنلر شوک اولور، کیشینین قوجا واختیندا سفهلدیینی دوشونور، اونو باشینی یارماماغی خواهش ائتسه‌لر ده، قوچعلی قبول ائتمیر.

خلاصه، مراسم باشلاییر و حسین قهوه‌چی قادین و قیزلارین دا مراسمه قیراقدان باخماق اوچون توپلاشدیغینی گؤروب جوشا گلیر.

او، "حسینه یئرلر آغلار، گؤیلر آغلار" دئییب قیلینجی احتیاطلا باشینا ائندیرمک ایسته‌یه‌نده، قوچعلی اوجا سسله "هامیدان چوخ دا حسین قهوه‌چی آغلار" دئییب، حسینی داها دا جوشدورور.

قوچعلینین بو مدحیندن جوشا گلن و قیز-گلینلرین قورخدوقلاری اوچون قیشقیرتی سسیندن اؤزونو ایتیریب و داها چوخ جوشان حسین قهوه‌چی قیلینجی تپه‌سینه نئجه قویورسا، ائله قیلینج باشین‌دا هوشونو ایتیریب یئره ییخیلیر.

بونو گؤرن قوجا قوچعلی ده الینده‌کی کیچیک قمه‌نی قیراغا آتیب، کفنینی چیخاریب حسینین باشینا ساریییر.

باشی قیلینجلی حسین قهوه‌چی خستخانایا چاتدیریلسا دا، قوچعلی و بوتون محله ساکنلرینین آرزوسونا اویغون اولاراق اونون حیاتینی خلاص ائتمک ممکون اولمور.

حادثه‌نین اوستوندن بیر نئچه گون کئچدیکدن، قهوه‌چی حسینین داها ایشوئرنلیک ائده بیلمیجییندن آرخایین اولدوقدان سونرا خصوصی مجلسلردن بیرینده قاوال چالان قوچعلییه باشینی نیه یارمادیغینی سوروشورلار.

قوجا قاوالچینین جوابی ایسه او واختلار اوستونه قویولا-قویولا، شیشیردیله-شیشیردیله تبریزین بیر چوخ یئرلرینده "قوچعلینین حسین قهوه‌چیدن قصاصی" کیمی دانیشیلان لطیفه‌یه چئوریلمیشدی:

"قمه‌نی باشیما ائندیرمک ایستدییم واخت، نامعلوم بیر سس قولاغیما پیچیلدادی کی، یا قوچعلی! سن امام حسین اوغروندا حسین قهوه‌چی کیمی باش یارماق سوییه‌سینه چاتماییبسان. بیر آز دا دؤز، اؤزونو انکشاف ائتدیر، گناهلارینین باغیشلانماسی اوچون دعا ائت، سونراسینا باخاریق!"

البته کی، محله‌ده دوغرو-دوزگونلویو، مدنی‌لیی ایله تانینان قوچعلی بو مسئله‌ده یالان دانیشیردی.

حسین قهوه‌چی باشینا قیلینجی ائندیردیی واخت، قوچعلی هئچ الینده توتدوغو مطبخ بیچاغی بویدا قمه‌نی ترپتمه‌میشدی ده.