منه آذربایجاندان ماراقلی ایش تکلیفلری گلیردی. اما من خارجده معاصر صنایعلرین تقدیم ائتدیی ایش امکانلاریندان یارارلانماق، اؤلکه‌میزه تحفه‌می یئنی موستویدن وئرمک ایسته‌ییردیم.

Axar.az خبر وئریر کی، بونو آمریکا اردوسوندا خدمت ائد‌ن ایلک آذربایجانلی قادین کماله سورخای قیزی آتاکیشیئوا مصاحبه‌سینده دئییب.

او، آمریکا اردوسوندا خدمت ائتمه‌سی مسئله‌سینه قرار وئرمه‌سیندن دانیشیب:

"بیر گون حیات یولداشیملا آمریکادا ان پرسپکتیولی کاریئرا ساحه‌لرینی مذاکره ائدیردیک. مذاکره‌لرین سونوندا ایکیمیز ده بو قناعته گلدیک کی، آمریکا اردوسوندا خدمت ائله‌مک گله‌جک اوچون بؤیوک فرصتلر یارادیر. ائله همین گونون سحری آمریکا مدافعه دپارتامنتینین واشینگتنداکی شعبه‌سینه سورغو گؤندردیم. طلبلرینی اؤیرندیم و ۲-۳ آیلیق حاضرلیقدان سونرا قبول امتاحانینیندا ۱۰۰ بالدان ۹۵-نی توپلادیم. عینی زماندا فیزیکی و ساغلیق تستلریندن ده اوغورلا کئچدیم.

ان چتین گونلریم بوندان سونرا باشلادی. بیلیرسینیز کی، آمریکا اردوسو دنیانین ان گوجلو اردوسودور. بو اردودا خدمت کئچمک، خصوصیله ایلک ۶ آیدا چوخ-چوخ چتیندیر. اینانیرسینیز کی، خدمتیمین ایلک آیلاریندا او قدر پشمانلیق چکدیم، اؤز-اؤزومو دانلادیم کی، هارادان باشیما ایش آچدیم.

من حربی-هوا قوه‌لرینین هلیکوپترلر بؤلمه‌سینده خدمته باشلادیم. منیم ایشیم هلیکوپترلرین الکترونیکا سیستملرینه نظارت اولسا دا خدمتین ایلک آییندا چوخ چتین سیناقلاردان کئچدیم. بونلاری بیر-بیر سادالاییب واختینیزی آلماق ایسته‌میرم. اما قیساجا اونو دئییم کی، آمریکا فیلملرینده گؤردویونوز آمریکا حربچیلرینین آغیر تعلیملرینین هامیسینی من کئچمیشه‌م. تصور ائدین کی، بیز ایلک تعلیملره باشلایاندا ۴۲ نفر ایدی. اما سونرا ۲۹ نفر قالمیشدی. قالان یولداشلاریمیز فیزیکی و پسیخولوژی چتینلیکلر سببیندن خدمتی بوراخمالی اولدو".

او همچنین بیلدیریب کی، ۴۰ یاشیندان سونرا سیاسته قوشولماق ایسته‌ییرم:

"من تحلیللر آپارمیشام. اورتایا چیخان فاکت ایسه اوندان عبارتدیر کی، آمریکادا حربیدن سیاسته گلنلر چوخ بؤیوک اوغور قازانیر. ان اوغورلو و سئویله‌ن سیاستچیلر، لاپ ائله جون کنیی زمانیندا حربچی اولوب. من ده بو یوللا گئتمک ایسته‌ییرم، انشاالله".