«عربلرین خئیری لازیم دئییل، زیانلارینی ایسته میریک. بو عربلرین آذربایجانا آخینی آرتدیقجا منیم ایچیم‌ده ناراحات‌لیق دا بؤیویور. چونکی بونلار اولان یئرده ثابت‌لیک اولمور. بوتون بونلارین کؤکونده ایسه اونلارین طبیعت اعتباریله جاهیل اولمالاری دایانیر. بیر باخین عرب دونیاسینا، گؤرون بو گون اورادا نلر باش وئریر؟ دوشونوره‌م اونلاری مسافه‌ده ساخلاساق داها یاخشی اولار».

بو سؤزلری کئچمیش ناظیرلردن بیری اؤز ایستاتوسون‌دا یازیب. سون زامانلار باشقالارین‌دان دا اوخشار سؤزلر ائشیدیریک. آنجاق ناظیر پوستوندا اولموش بیری‌سینین، دونیاگؤرموش اینسانین بئله سؤزلر یازماسی تأسف دوغورور. بو، ایرقی و میللی آیری-سئچکی‌لیک‌دیر، راسیست یاناشمادیر.

البته، عرب اؤلکه‌لرین‌دن گلنلرین بیر قیسمینین تمیزلییه فیکیر وئرمه دیکلرینی، کوچه‌ده گزرکه‌ن قیشقیرا-قیشقیرا دانیشدیغینی ادعا ائتمک اولار. حتی بئینیمیزین بیر کؤشه‌سین‌ده تئررورلا بعضی عرب اؤلکه‌لری آراسین‌دا برابرلیک ایشاره‌سی ده قویا بیلریک. آنجاق بونلار بیزه اساس وئرمیر کی، بوتؤو بیر میللتی آشاغیلایاق، اونلارا «آذربایجانا گلمیین» دئیک. بیر طرفدن دئییریک کی، اؤلکه‌یه چوخلو توریست گلسین، دیگر طرفدن توریستلری «یاخشی» و «پیسلره» بؤلمه‌یه چالیشیریق. ایندی نه ائدک کی، آذربایجانا غرب اؤلکه‌لری ایله موقاییسه‌ده عرب اؤلکه‌لرین‌دن داها چوخ توریست گلیر. توریست ایسته‌میردیک؟ - بو دا توریست! هانسی‌سا میللته قاپینی گؤسترمک اولماز! اگر قاپیلارینی توریستلره آچمیسان‌سا، «سن گل، او بیری‌سی گلمه‌سین» دئیه بیلمزسه‌ن، بونو دئمک ایسته‌سه‌ن بئله رئاللاشدیریلماسی مئخانیزمی یوخ‌دور.

دیگر طرفدن، بو چوخ تبلیغ ائتدیمیز مولتیکولتورالیزم – «آذربایجان‌لیلار دینی، میللی و ایرقی زمین‌ده تولئرانتدیرلار» باخیشیمیزا دا ضیددیر…