قاراداغ مئشه‌لرین‌دن یکاناتا کیمی آذربایجانین طبیعی ثروتلری تالان اولونور.

اعتراضچیلار یکان میس معدنینین اصفهان‌لی شیرکته ساتیلماسینا، ائلجه ده شیرکتین جاری ایلین یایین‌دان بورادا میس ایستحصال ائد‌رک اراضی موحیطینی محو ائتمه‌سینه قارشی آکسییا کئچیریبلر.

شرقی آذربایجانین یکان ساکینلری، او جمله‌دن، قادینلار، قیز شاگیردلر و داش یکانین بیر چوخ اهالیسی بازار ائرته‌سی اللرین‌ده بانرلر قالدیراراق نوماییشه چیخیبلار. آکسییالاردا اهالینین الین‌ده گؤرونن پلاکاتلاردا «قالاداغی وارلیغیمیزدیر»، «آل قانیم، وطن جانیم»، «حیاتیمیز قالاداغی‌دیر، اونو بیزدن آلمایین» کیمی یازیلار یازیلیب.

یکانات اهالی‌سینین ادعاسینا گؤره، میس معدنی قباله‌لی و ۶ دانگ شخصی بیر ملکدور. شرقی آذربایجان جنگلبانی‌سی بو مولکو اهالی‌دن خبرسیز قصب ائد‌رک، میللی اراضی کیمی قیده آلیب.

قید ائدک کی، سؤزوگئدن یکان میس معدنی شرقی آذربایجان ایالتین‌ده، مرند شهرینین یامچی بؤلگه‌سین‌ده یئرلشمکده‌دیر.