بو گون خالق شاعری خلیل رضا اولوتورکون آنادان اولماسینین ۹۲-جی ایل دؤنومو تمام اولور.

Kult.az خاطیرلادیر کی، او، ۲۱ اوکتیابر ۱۹۳۲-جی ایلده سالیاندا آنادان اولوب.

۱۹۴۸-جی ایلده "آبشرون" آدلی ایلک شعرینی یازان گنج شاعر امک فعالیتینه "آذربایجان قادینی" ژورنالی رداکسیاسیندا باشلاییب.

اونون ایلک شعرلر توپلوسو ۱۹۵۷-جی ایلده «بهار گلیر" کتابیندا نشر اولونور. خلیل رضا آذربایجان دیلینین صافلیغی، اجنبی دیلین تأثیرینه معروض قالماماسی اوچون اؤزونه‌مخصوص مبارزه یولو دا سئچیر.

هارادا اولورسا-اولسون دوغما دیلینده تمیز دانیشمایان مصاحبیندن ائشیتدیی هر یاد کلمه اوچون ۵ قپیک جریمه طلب ائدر، دانیشیغیندان ممنون قالدیغی سویداشلارینی بیر مانات مبلغینده مکافاتلاندیراردی.

بئله‌لیکله، او، معاصیرلرینین دقتینی آنا دیلینین صافلیغینی قوروماغا جلب ائتمه‌یه، دیگر طرفدن روسلاشدیرما سیاستینه قارشی مبارزه آپارماغا چالیشاردی. البته، بوتون بونلار دؤلتین حاکم دایره‌لرینین نظر-دقتیندن یایینمیر، چوخ چکمیر کی، اونون اجتماعی-پداگوژی فعالیتی محدودلاشدیریلیر. خلیل رضا آذربایجان دؤلت پداگوژی اینستیتوتوندان اوزاقلاشدیریلیر.

اونو آذربایجان ملی علملر آکادمیاسینین نظامی آدینا ادبیات اینستیتوتونا دعوت ائدیرلر. بورادا خلیل رضا بوتون قوه‌سینی علمی-تدقیقات ایشینه و بدیعی یارادیجیلیغا حصر ائدیر. آذربایجان-اؤزبک ادبی علاقه‌لری، مقصود شیخزاده‌نین حیات و یارادیجیلیغی حاقیندا مونوگرافیک اثرلر یازیر. بونا باخمایاراق، خلیل رضا یئنه ده "شبهه‌لی شخص" کیمی تعقیب اولونور، اونون امکانلارینی محدودلاشدیریلیر، "تهلوکه‌لی اجتماعی مبارزه" یولوندان چکیندیرمه‌یه چالیشیرلار.

او، آذربایجانین ملی قهرمانی قاراباغ محاربه‌سی شهیدی تبریز خلیل‌بی‌لی‌نین آتاسیدیر.

خلیل رضا اولوتورک آذربایجان ادبیاتی تاریخینه آزادلیق جارچیسی کیمی داخل اولوب. یارادیجیلیغی بویو اثرلرینده وطن محبتی، تورپاق سئوگیسی، صلح، امین-آمانلیق، آزادلیق کیمی دیرلر ترنم اولونوب. آذربایجانی سئون، اونون مستقل دؤلت اولماسی آرزوسو ایله یاشییان و چارپیشان خلیل رضا اولوتورکون بوتون زنجیرلری یوخ ائتمک، ظلمون قارشیسینا سد چکمک ایستیی اونو آزادلیق شاعرینه چئویریب. خلیل رضا اولوتورک ادبیاتیمیزین انکشافینا بؤیوک تحفه‌لر وئرن صنعتکارلاردان اولوب.

او، ۱۹۹۴-جو ایلین ۲۲ ایونوندا باکی‌دا وفات ائدیب.

خلیل رضا اولوتورکون »آزادلیق حسرتی»شعرینی تقدیم ائدیریک:

سن دئمه آزادلیق آیمیش گونشمیش،
او آیا او گونه حسرت قالمیشام.
حیات سسلی کویلو بیر کشمکشمیش،
دوغما سسه اونه حسرت قالمیشام.

منیم او یئرلرده آیاق ایزیم وار،
سعادت آیناسی بئش دنیزیم وار.
وفا خزینه‌سی فیرنگیزیم وار،
اونون آغ اوزونه حسرت قالمیشام.

روحوم میدانلارا سیغمایان آلای،
اوچ رنگلی بایراغیم قالخ اوجال هارای.
اؤپسون تئللرینی خلیل، گونش، آی،
من سنین اوزونه حسرت قالمیشام.

اوزاق دیاردایام داش قفسده‌یم،
بیر وطن لهینه تشنه خسته‌یم،
منه گؤروش وئرین سفر اوسته‌یم،
بالامین گؤزونه حسرت قالمیشام.

چاتتیرین او گوله گولزارا منی،
ایتیرسن او یئرده گز آرا منی،
غربتته قویمایین مزارا منی،
وطن گوندوزونه حسرت قالمیشام.

خلیل سن قایاسان درده دؤزرسن،
سن کورسن، خان آراز، گؤیگؤل خزرسن،
یئنه او یئرلری بیر گون گزرسن،
دئمه سن بو گونه حسرت قالمیشام.