بو گون میللی آزادلیق حرکاتینین لیدری، آذربایجان رسپوبلیکاسینین کئچمیش پرزیدنتی ابولفضل ائلچی‌بی‌ین آنیم گونودور.

Axar.az خبر وئریر کی، او، (ابولفضل قدیرقولو اوغلو علیئو ۲۴ ایون ۱۹۳۸-جی ایلده ناخچیوانین اوردوباد رایونونون کلَکی کندینده آنادان اولوب.

۱۹۵۷-جی ایلده آذربایجان دولت اونیورسیتتینین (آدو) شرق شناس‌لیق فاکولته‌سینی بیتیریب. بیر مدت مصرده ترجمه‌چی کیمی چالیشیب، باکییا قاییتدیقدان سونرا آذربایجان دولت اونیورسیتتینده معلم ایشله‌ییب.

۱۹۷۵-۱۹۷۶-جی ایللرده آنتی‌سووئت فعالیتینه گؤره حبس‌ده اولوب.

ایل‌یاریم‌لیق حبس‌دن سونرا آذربایجان علم‌لر آکادمییاسی‌نین الیازمالار اینستیتوتوندا چالیشماغا باشلاییب.

او، ۱۹۸۸-جی ایلده آذربایجان‌دا باشلایان ملی آزادلیق حرکاتینین لیدرلریندن بیری، آذربایجان خالق جبهه‌سینی یارادانلاردان اولوب.

۱۹۹۲-جی ایل ایونون ۷-ده پرزیدنت سئچیلن ابولفضل ائلچی‌بَی بیر ایل سونرا گنجه‌ده باشلایان حربی قیام نتیجه‌سینده باکینی ترک ائدیب و ۱۹۹۳-جو ایل ایونون ۱۷-ده اؤز دوغما یوردو اوردوباد رایونونون کلکی کندینه گئدیب.

ایونون ۲۴-ده میللی مجلسین قراری ایله صلاحیتلرینه سون وئریلمیش ابولفضل ائلچی‌بَی فعالیتینی آذربایجان خالق جبهه‌سی پارتییاسینین و بوتؤو آذربایجان بیرلیینین صدری کیمی داوام ائتدیریب.

اونون خصوصیله پرزیدنت‌لیک دورو و اوندان سونراکی دورده ایران و گونئی آذربایجانلا باغلی چیخیشلاری تهران حکومتینین سرت تپکیلری ایله قارشیلاشیب.

ائلچی‌بی‌ین ایرانلا باغلی چیخیش و فعالیتلری او دور بیر چوخلاری طرفیندن یئرسیز و رادیکال آددیم کیمی قبول ائدیلسه ده، ایللر سونرا اونون ایرانا یؤنه‌لیک فکرلرینده حاقلی اولدوغو معلوم اولدو.

تهران حکومتینین آذربایجان رسپوبلیکاسینا قارشی موقعیی، قاراباغ مسئله‌سینده ارمنستانا حیمایه‌دارلیق ائتمه‌سی، آذربایجان رسپوبلیکاسیندا اؤزونه باغلی تخریباتچی گروپلار فورمالاشدیرماسی و س. ائلچی‌بی‌ین ایران تهلوکه‌سی ایله باغلی ادعالارینین یئرلی اولدوغونو گؤستردی.

بونونلا یاناشی ائلچی‌بی‌ین گونئی آذربایجان‌لی‌لارین ملی حقوقلاری ایله باغلی چیخیشلاری ایران‌دا آذربایجان‌لی‌لار آراسیندا یارانان کیملیک بحرانینین مثبته دوغرو دَییشمه‌سینه سبب اولدو.

بو، ۱۹۴۶-جی ایل جنوبی آذربایجان ملی حکومتینین دئوریلمه‌سیندن سونرا گونئی آذربایجانلی‌لارین ملی اؤزونودرک و آنا دیللری اوغرونداکی فعالیتلرینین ایکینجی مرحله‌سینین باشلانماسی ایله نتیجه‌لندی.

بوتؤو آذربایجان بیرلیی‌نین مرکزی شوراسی‌نین هفته‌لیک توپلانتیلاریندا گونئی آذربایجانلا باغلی مذاکره‌لرین آپاریلماسی، گونئی‌لی فعاللارین دستکلنمه‌سی، اونلارین سسینین بین‌الخالق اجتماعیته چاتدیریلیماسی همین فعاللارین اؤز فعالیتلرینی داها دا جسارتلی شکیلده داوام ائتدیرمه‌لرینه شرایط یاراتدی.

ائلچی‌بی‌ین بعضی گونئی‌لی‌لره حدیندن آرتیق دَیر وئرمه‌سینین سونراکی دورلرده بیر سیرا فسادلاری اولسا دا، عمومی‌لیکده اونون فعالیتلری گونئی آذربایجان‌دا ملی اویانیشین سرعتله‌نمه‌سینده میثیل‌سیز رول اوینادی.

او، اوزون سورن آغیر خسته‌لیکدن سونرا ۲۰۰۰-جی ایلین آوگوستون ۲۲-ده تورکییه‌نین آنکارا دولت خسته‌خاناسیندا دونیاسینی دَییشیب و جنازه‌سی باکییا گتیریله‌رک فخری خیابان‌دا دفن ائدیلیب.