تبریز شهرینین مرکزین‌ده یئرلشه‌ن، دونیانین ان بؤیوک بازارلارین‌دان بیری اولان تبریز بازاری یونسکو-نون دونیا میراثی سیاهی‌سینا (دونیانین ان بؤیوک اوستو اؤرتولو تیکینتی‌سی) دا سالینیب.

آخار. آز خبر وئریر کی، تبریز بازاری میلادین ۴-جو عصرین‌ده تیکیلیب. بازاردا ۵ مین دوکان و تیجارت مرکزی وار. دالان، کاروانسارا، راستا (بیر نئچه کیچیک بازارین قووشاغی) و س. یئرلشدیی بازارین اوزونلوغو ایسه ۵ کیلومتردیر. بازاردا ۲۰ تیمچه (عینی محصولو و مالی ساتان کیچیک دوکانلار)، ۶۵۰۰ هوجره، ۱۹ دالان، ۵ راستابازار، ۲۴ کاروانسارا، ۲ چارسوک (بالاجا میدان)، ۳۱ بازار، ۱ میدان، ۷ بازارچا، ۸ داروازا، ۲۹ مسجید، ۳ قالا، ۴ مکتب، ۱ زورخانا، ۲ کیتابخانا، ۲ کؤرپو، ۲ کئچید، ۵ موزئی، ۶ حامام یئرلشیر.

قدیم‌دن تبریز بؤیوک ایپک یولونون اوستون‌ده یئرلشدیین‌دن، عینی زامان‌دا بورادان شیمالا شاماخییا، جنوبا بغدادا کاروان یوللارینین مؤوجودلوغو تبریزین مرکزین‌ده یئرلشه‌ن بازاری بوتون اطراف اؤلکه تاجیرلری اوچون جلب ائدیجی ائدیب.

اساساً اورتا عصرلرده تیکیله‌ن بو بازار ایندی ده اؤز اقتصادی اهمیتینی ایتیرمه‌ییب. بازار اقتصادی اهمیتین‌دن باشقا، توریست مرکزی کیمی بوتون دونیانی اؤزونه جلب ائدیر.

اقتصادی و معمارلیق اهمیتیندن علاوه تبریز بازاری اؤز سوسیال فعال‌لیغی ایله ده مشهوردور. آذربایجان و معاصر ایران تاریخین‌ده باش وئرمیش بیر سیرا مهم تاریخی اولایلار تبریز بازاری ایله بیرباشا باغلی‌دیر.

تبریز بازارینین دایانماسی بوتون زامانلاردا حاکمیتلر اوچون بؤیوک تهلوکه، عصیان سیگنالی حساب اولونوب.

۱۸۹۱-جی ایل مارتین ۱۹-دا نصرالدین شاهین ایران‌دا توتون تیجارت حقوقلارینی اینگیلیس فیرماسینا ساتماسینا اعتراض اولاراق بوتون اؤلکه اراضی‌سین‌ده باشلایان اعتراض دالغاسینین اؤنون‌ده تبریز بازاری ایدی. ۱۸۹۱-جی ایل آوگوستون ۱۹-دا تبریز اهالی‌سی آدین‌دان شاها مراجعت اولونور، آردینجا شهر بازاری باغلانیر.

۱۹۰۵-۱۹۱۱-جی ایللرده باش وئرمیش مشروطه حرکاتینین دا آپاریجی مرکزی تبریز بازاری ایدی. بونونلا یاناشی «یاشیل حرکات»ایندا، ستارخان حرکاتین‌دا و اؤتن عصرین ۷۰-جی ایللرین‌ده ایران‌دا شاها قارشی خالق اعتراضلاری زامانی تبریز بازارینین رولو دانیلمازدیر.