آنا صحیفه ویدئو |
بو دفعه کی ناغیلیمیز "کؤرپه و خاللی کئچی" آدلانیر. ناغیلیمیزدا اوزون ایللردیر اؤولادی اولمایان ار-آرواددان صحبت گئدیر. گون گلیر کی، بو جوتلویون بیر اوغلو اولور. اما باشیبهلالی کیشینین قارا گونلری باشلاییر. چونکی او اوغلو اولان زامان آروادینی ایتیریر. الله اونو بیر طرفدن سئویندیرسه ده، دیگر طرفدن قمه باتیریر...
Kult.az ناغیلدان بیر پارچانی و الاقدار ویدئونو تقدیم ائدیر:
بیری وار ایدی، بیری یوخ ایدی، بیر موختار کیشی واردی. موختار کیشی یاخشی زرگر ایدی. اؤزونون زرگر دوکانی وار ایدی. وارلی آداملاردان ساییلیردی. اؤزو ده چوخ یاخشی آدامدی. کاسیبا-کوسوبا ال توتان، خئیره-شره یارایاندی. اما کیشی اؤولادی اولمادیغیندان اوزون مدت درد چکمیشدی. ایندی ایسه یاشینین قوجا واختیندا آرزوسونا چاتماغا آز قالیردی. آروادی گولسونا خانیم هامیله ایدی. گولسونا خانیمین اوزو نورلویدو. اؤزو ده چوخ مهریباندی. بیر خاللی کئچیسی واردی. اونون یانیندان آرالانمازدی. آرالانان کیمی ملرتیسی عالمی گؤتورردی. گول سونا خانیم اونونلا او قدر دانیشاردی کی، ائله بیل کئچی دیل باشا دوشردی.
آتا اولاجاغینی ائشیدندن سونرا زرگر موختارین سئوینجی یئره-گؤیه سیغمیردی. کاسیب-کوسوبا نذیر-نیاز پایلاییردی. اؤولادی اولان گونو حسرتله گؤزلییردی.
گون گلدی، وعده یئتیشدی، موختار کیشی اوغول آتاسی اولدو. کیشییه هم شاد خبر دئدیلر کی، اوغلون اولوب، هم ده قارا خبر دئدیلر کی، آروادین دوغاندا اؤلدو. کیشینین بیر گؤزو گولدو، بیر گؤزو آغلادی. کیشییه باش ساغلیغینا گلنلر اونا دئدیلر کی، کؤرپهنین خاطرینه تئز ائولهنمهلیدیر.
موختار کیشی چار-ناچار ائوینه یاخشی تانیمادیغی بیر دول آرواد گتیردی. سن دئمه، بو آرواد حیلهگرین، آجگؤزون بیریمیش. موختار کیشینین زرگر اولدوغونو ائشیدن کیمی کیشییه گلمهیه راضیلیق وئردی. اما کؤرپه اوغلو اولدوغونو ائشیدنده جین ووردو تپهسینه. اوریینده فیکیرلشدی کی، بیر او قالمیشدی کی، گئدیب اؤزگهسینین کوچویونو ساخلاییم.
اما موختار کیشینین وار-دؤولتینی الینه کئچیرمک اوچون هر شئیه راضییدی. آروادی موختار کیشینین ائوینه گتیردیلر.
موختار کیشی اونو آغلایا-آغلایا قارشیلاییب دئدی:
-منیم اوجاغیما خوش گلیبسهن، اوم نیسا خانیم! ائویم، واریم، دؤولتیم هامیسی سنیندیر، اما سندن بیرجه ایستییم وار. منیم اوغلوما یاخشی باخاسان. اؤز بالان کیمی.
اوم نیسا اؤزونو اوریی نازیک گؤستردی. گؤزلرینین یاشینی آخیتدی، دئدی:
-البته، من سنین بالانا اؤز بالام کیمی باخاجاغام. اونو دوغما آناسیندان یاخشی بؤیودهجهیهم. سنه سؤز وئریرم، - دئییب اومنیسه یالاندان آند ایچدی.
داها اطرافلی ویدئودان ایزلهیه بیلرسینیز:
تاریخ
2019.02.14 / 13:08
|
مولف
آیتاج آراز
|