"آیریلیق" و "سیزه سلام گتیرمیشم" کیمی مشهور ماهنیلارین بسته‌چی‌سی علی سلیمی آذربایجان‌لی بستکاردیر.

Kult.az خبر وئریر کی، او، ۱۹۲۲-جی ایلده باکی شهرین‌ده گؤز آچیب. اونون والیدینلری اردبیل شهریندن باکییا کؤچوبلر. آتاسی اردبیل یاخینلیغینداکی مهماندوست کندیندن ایدی، آناسی مشهدی جواهیر ایسه باکی‌لی ایدی.

۱۹۳۸-جی ایلده علی سلیمینین آتاسی (ائلجه ده تارزن عادیل آخوندزاده – تهران رادیوسونون سولیستی و تانینمیش خواننده مصطفی پایان – تهرانین مشهور خواننده‌سی) مجبوریت قارشی‌سیندا ایرانا کؤچمه‌لی اولورلار.

۱۹۶۱-جی ایلین سونو و ۱۹۶۲-جی ایلین اوللرین‌ده رشید بهبودووون ایران سفری یادداقالان، ماراقلی حادثه‌لرله زنگین ایدی. ایران‌دا بؤیوک موفقیتله کئچه‌ن کونسرتلردن بیرین‌دن سونرا اصلا باکی‌دان اولان اؤلمز بسته کار علی سلیمی دونیالار قدر سئودیی موغننینی ائوینه دعوت ائدیر. دعوتی قبول ائد‌ن رشید بهبودوو بسته کارین قوناغی اولور. ماراقلی صحبتلر زامانی علی سلیمی یئنیجه بستلدیی "سیزه سلام گتیرمیشه‌م" ماهنی‌سینی سنتکارا گؤستریر. رشید ماهنینی چوخ بینیر و تئزلیکله ایفا ائدجیینه سؤز وئریر. بستکارین حیات یولداشی علی سلیمییه ایشاره ائد‌رک اونو یان اوتاغا چاغیریر. بیر قدر سونرا همین اوتاق‌دان خانیمین هزین سسله، تارین موشایعتی ایله اوخودوغو باشقا بیر ماهنینین سسی گلیر. رشید ائله ایلک نوتلاردان بو ماهنییا وورولور و اونلارا قوشولوب زومزومه ائتمه‌یه باشلاییر. ماهنی بیتدیکدن سونرا موغننی علی سلیمی‌دن بونون کیمین ماهنی‌سی اولدوغونو سوروشور.

علی سلیمی بیلدیریر کی، رجب ایبراهیمی "آیریلیق" آدلی گؤزل بیر شعیر یازمیشدی. من ده بیر نئچه گون بوندان اول همین شعره ماهنی بستلدیم. رشید بسته کارا ایراد توتور کی، بس نیه گؤره "آیریلیغ"ی منه تکلیف ائتمیرسن. علی سلیمی جوابین‌دا ایضاح ائدیر کی، قورخورام "آیریلیغ"ی اوخوماغا اجازه وئرمه‌سینلر. سنه ده باش آغریسی اولماسین. "سیزه سلام گتیرمیشم"ی اوخوسان منه دونیانی وئرمیش اولارسان. رشید بسته کارین دا، اونون خانیمینین دا کؤورلدیینی گؤروب قطیعتله بیلدیریر کی، تئزلیکله هر ایکی ماهنینی منیم ایفامدا ائشیدجکسینیز. باکییا دؤنندن سونرا سئویملی صنعتکار حقیقتا ده هر ایکی ماهنینی - "سیزه سلام گتیرمیشم" و "آیریلیق" ماهنیلارینی ایفا ائد‌رک لئنته یازدیریر.

گونئی‌لی بسته کار بوندان علاوه "گول آچدی"، "گؤزوم آنا"، "باهار گلدی"، "آنا لایلاسی" و دیگر ماهنیلارین مؤلفی‌دیر.

اؤلمز بسته کار ۱۹۹۷-جی ایلین ۲۲ آپرلین‌ده تبریزده وفات ائدیر.