Kult.az تبریزلی شاعر، اسسئیست، ترجمه‌چی دالغا خاتین اوغلونون " قییما" آدلی شعیرینی تقدیم ائدیر.

بیلیرم،

او بوی‌دا دنیزه گرک یوخ
آدام گؤز یاشین‌دا دا بوغولا بیلر
بونو چکمه‌یه نه وار کی؟
سونرا اؤلومه باخیب،
اؤیرنیر گؤز یاشلاری
اوتوروب آغلاسان دا گلمیر...

بیلیرم او بویدا زورا گرک یوخ،
آدامی بیر باخیش دا چؤکدوره بیلر،
آدامی بیر "یوخ" دا ییخا بیلر...
بیلیرم،
بو شهرده قبیر آزلیغی یوخ
دیش‌سیز آغیزلارینی آچیب قبیرلر
چئینه‌ییب، اودارلار ایکینی سایینجا،
سنی ده،
بوغازین‌دا قالان عؤمورلوک قهرلری ده.

آما سن اوزولمه،
سوچلو آراماغا گرک یوخ
سن‌دن اؤنجه،
بئینینه دایادیغین توفنگین آخ سسی چیخار،
سن‌دن اؤنجه اونون نفسی چیخار...

کؤچ
«هارالارداسان؟»، ایللردیر سوروشوب، دوردوم،
آه به سرسم باشیم،
هارادا اولا بیلرسن کی،
اورییمین ایچین‌دن باشقا؟
اما من،
دیوار کیمی اؤز باشیما،
ائو کیمی اؤز ایچیمه چؤکدوم،
آخی کیم منی چؤکدوره بیلردی،
گؤزلرینین کؤچوندن باشقا؟