Kult.az محمدحسین شهریارین "آذربایجان" آدلی شعیرینی تقدیم ائدیر:

کؤنلوم قوشو قاناد چالماز سن‌سیز بیر آن، آذربایجان.
خوش گونلرین گئتمیر مودام خیالیم‌دان، آذربایجان.
سن‌دن اوزاق دوشسه‌‌م ده من عشقین ایله یاشاییرام،
یارالانمیش قلبیم کیمی قلبی ویران آذربایجان.
بوتون دونیا بیلیر – سنین قودرتینله، دؤولتینله
آباد اولوب، آزاد اولوب مولکی-ایران، آذربایجان.
بیسوتونی-اینقیلاب‌دا شیرین-وطن اوچون فرهاد
کولونگ وورموش اؤز باشینا زامان-زامان، آذربایجان.
وطن عشقی مکتبین‌ده جان وئرمیی اؤیرنمیشیک،
اوستادیمیز دئییب «هئچ‌دیر وطن‌سیز جان»، آذربایجان.
قورتارماقچون ظالملرین الین‌دن ری شومشادینی
اؤز شومشادین باش‌دان-باشا اولوب آل قان، آذربایجان.
یارب، ندیر بیر بو قدر اورکلری قان ائتمیین،
قولوباغلی قالاجاق‌دیر نه واختاجان آذربایجان؟!
ایگیدلرین ایران اوچون شهید اولوب، اوزین‌ده
درد آلمی‌سان، غم آلمی‌سان سن ایران‌دان، آذربایجان.
اؤولادلارین نه واختادک ترکی-وطن اولاجاق‌دیر؟
ال-اله وئر، عصیان ائله، اویان، اویان، آذربایجان!
بس‌دیر فراق اودلارین‌دان کول ال‌ن‌دی باشیمیزا،
دور آیاغا! یا آزاد اول، یا تامام یان، آذربایجان!
شهریارین اوریی ده سنینکی تک یارالی‌دیر،
آزادلیق‌دیر منه ملحم، سنه درمان، آذربایجان!