کورد تشکیلاتلاری ایران اراضی‌سینه گیردیی تقدیرده سپاه اؤزونو مدافعه مقصدی ایله آذربایجان‌لیلاری کوردلرله قارشی-قارشییا قویماغی پلانلاشدیریر.

یئرلی منبع‌لردن Axar.az –آ بیلدیریلیب کی، سپاه و ایران کشفیات ارگانلاری بو استقامتده عملی آددیملار آتماغا باشلاییب.

سپاه بؤلگه‌ده یارانمیش فرصتدن استفاده ائد‌رک آذربایجانلیلاری اؤز جبهه‌سینه چکمه‌یی و نتیجه اعتباری ایله رژیمین ماراقلاری اوغروندا قوربان وئرمه‌یی دوشونور.

بو استقامتده، رژیم اؤز تبلیغات ماشینینی ایشه سالیب و آذربایجان‌لیلاری مانیپولاسیا ائد‌رک تشویشه سالماغا چالیشیر. دیگر طرفدن ایسه، حاکمیتین یئرلی طرفدارلاری او جمله‌دن سلاح‌سیز سپاه و "بسیج" قوه‌لری سلاحلاندیریلدیغی حاق‌دا معلومات یاییلیب.

اورمیادا خدمت ائد‌ن بیر سپاه مأمورو بیلدیریب کی، «آرتیق بیر نئچه گون‌دور کی اورمیا و اطراف کندلردن اولان "بسیج" قوه‌لری سلاح آلماق اوچون قیدیاتدان کئچیرلر».

سپاهین مقصدی آیدیندیر:

اؤز چیرکین مقصدلری نامینه ایکی قونشو خالقی بیر-بیرینه دشمن ائتمک !

آنجاق، سپاه-این تورونا دوشمه‌مک اوچون بو پلانین قارشی‌سی آذربایجان خالقی و ائلجه‌ده سیاسی تشکیلاتلاری طرفیندن آلینمالیدیر. حاکیمت اؤز چیرکین عمللرینده آذربایجان‌یلاری آلت ائتمه‌سی یولوئریلمزدیر.

آذربایجان خالقی اؤز سیاسی اراده‌سیله لازم گؤردویو تقدیرده، لازمی آددیمی آتماغا و اؤز اراضی‌سینی مدافعه ائتمه‌یه قادردیر. لاکن، بو رژیمین سنگرینده، رژیمین ماراقلاری نامینه مبارزه آپاراجاغی آنلامینا گلمه‌مه‌لیدیر.

ضروریدیر کی، هر ایکی خالقین سیاسی تشکیلاتلارینین نماینده‌لری بیر آرایا گله‌رک، بو کیمی قانلی اویونلارین قارشیسینی واختیندان اول آلینماسی استقامتینده تدبیرلر گؤرسونلر.

حاضیرکی مرحله‌ده آذربایجان و کورد خالقلارینین کفایت قدر اورتاق مقصدلری و ایستکلری وار. بو اورتاقلیقلار اطرافین‌دا متفقلیک یاراتماق، حاکمیت و سپاه-این بو ایکی خالق علیه‌ینه منفور سیاستی اؤنونده کئچیلمز سد یاراداجاق.