آمریکا کشفیاتی بئله قناعته گلیب کی، چین داوام ائد‌ن آتشکس و گرگینلیین آزالدیلماسی اوزره دیپلماتیک سعیلره باخمایاراق، ایرانا سلاح تداروکونه حاضیرلاشا بیلر.

Axar.az خبر وئریر کی، بو باره‌ده سی.ان.ان سون کشفیات قیمتله‌ندیرمه‌لری ایله تانیش اولان منبع‌لره استنادن معلومات وئریب.

آمریکا کشفیاتینین معلوماتینا گؤره، صحبت هوا هجومون‌دان مدافعه سیستملرینین، او جمله‌دن داشینان زنیت-راکت کمپلکسلرینین ممکن اؤتورولمه‌سیندن گئدیر. بو جور سیستملر آویاسیا اوچون جدی تهلوکه یارادا و ایرانین مدافعه امکانلارینی اهمیتلی درجه‌ده گوجله‌ندیره بیلر.

منبع‌لرین بیلدیردیینه گؤره، تداروکون واسطه‌چیلر یولو ایله حیاتا کئچیریلمه‌سی سخمی نظردن کئچیریلیر. سلاحلار بیرباشا چیندن ایرانا دئییل، اوچونجو اؤلکه‌لر اوزریندن گؤندریله بیلر کی، بو دا اونلارین منشایینی گیزلتمه‌یه و پکین اوچون سیاسی ریسکلری آزالتماغا امکان وئرر.

کشفیاتین قیمتله‌ندیرمه‌سینه اساساً، ایران دؤیوش عملیاتلارینداکی موجود فاصله‌دن اؤز حربی امکانلارینی برپا ائتمک اوچون استفاده ائده بیلر. خصوصیله، آمریکا و متفقلرینین ضربه‌لری نتیجه‌سینده زدلنمیش حربی اینفراستروکتوردان سونرا آرسنالین یئنی‌دن دولدورولماسیندان صحبت گئدیر. بئله بیر مقام‌دا هوا هجوموندان مدافعه سیستملرینین تداروکو، خصوصیله آتشکس موقتی اولارسا، قوه‌لر بالانسینی جدی شکلده دییشه بیلر.

قید اولونوب کی، احتمال اولونان تداروکلر مدافعه کاراکترلی کیمی تقدیم اولونا بیلر:

«لاکن داشینان زنیت-راکت کمپلکسلری یالنیز مدافعه‌ده دئییل، هم ده آکتیو دؤیوش عملیاتلاریندا، او جمله‌دن آویاسیایا قارشی هجوملاردا استفاده اولونا بیلر. بو جور سیستملر آرتیق مختلف مناقشه‌لرده، خصوصیله آسیممتریک محاربه شرایطینده افکتیولیینی گؤستریب».