Axar.az-این گونئی بؤلمه‌سی «کلوب هاوس» سوسیال شبکه‌سین‌ده «گونئی آذربایجان مطبوعاتینین بوگونکو دورومو: پروبلملر و هدفلر» مؤوضوسوندا ایلک مذاکیره‌سینی کئچیریب.

Axar.az خبر وئریر کی، مسئله‌نی مذاکیره ائتمک اوچون گونئی‌لی ژورنالیست و آراشدیرماجی اینصافعلی هدایت، آ.ان.ت تلویزییاسینین رهبری و مرکز پارتییاسینین باشقانی صالح کامرانی، گونئی‌لی ژورنالیست و میللی فعال جواد ایسماییلبیلی اساس چیخیش‌چی اولاراق دعوته قوشولوب.

ایکی ساعت یاریم عرضین‌ده ۳ چیخیش‌چی و ۷۰-ا یاخین قوناق اشتراکچیلار مؤوضو اطرافیندا دیسکوسییا آپاراراق، آکتیو اشتراک ائدیبلر.

علیرضا زمانی‌نین مدراتورلوغو ایله باش توتان گؤروشده گونئی آذربایجان مطبوعاتینین حاضیرکی دورومو، اوزلشدیی پروبلملر، اونون حلی یوللاریندان دانیشیلیب.

گونئی‌لی ژورنالیست و آراشدیرماچی اینسافعلی هدایت مطبوعاتین پروبلملری آراسیندا، سواد، دونیاگؤروش و پئشه‌کارلیغین واجیبلیینه دقت چکیب:

«ژورنالیستیکا دیگر ساحه‌لرده یاخشی ایش تاپماق اوچون بیر واسطه‌یه چئوریلیب. دوشونجه فورمالاشدیرماق واجیبدیر. ایران بیزیم بئش نسل اولاراق بینیمیزی یوماقلا اؤزونه قایناق ائدیب».

مرکز پارتییاسینین صدری و آ.ان.ت تلویزییاسینین تاسیس‌چیسی صالح کامرانی تلویزییا و مطبوعاتدا کادر چاتیشمازلیغی، تکنیکی هئیتین آزلیغینا توخونوب.

«گونئی آذربایجان مطبوعاتی طرف توتمامالی، بیانات وئرمه‌مه‌لیدیر و مطبوعات پرینسیپلری اساسیندا حرکت ائتمه‌لیدیر».

دیگر اشتراکچی قوناق، گونئی‌لی ژورنالیست جواد ایسماییلبیلی اسارت آلتین‌دا اولان گونئی آذربایجان مطبوعاتینین حاضیرکی دورومونون رئال وضعیته اویغون مذاکیره اولونمالی اولدوغونو قید ائدیب.

مذاکیره‌یه آوروپا، آمریکا و دیگر اؤلکه‌لردن قوشولان قوناقلار گونئی آذربایجان مطبوعاتین انکیشاف ائتدیریلمه‌سینده مادی و و معنوی دستیین واجیبلیینی، لهجه و دیل مسئله‌لرینین یولونا قویولماسینی، دوشونجه طرزی و دونیاگؤروشونون اینکیشاف ائتدیریلمه‌لی اولدوغونو، پئشه‌کار ژورنالیستلرین یئتیشدیریلمه‌سینی پروبلمین حلی اولاراق دیرلندیریبلر.

تانینمیش ژورنالیست، «تریبون» ژورنالینین تاسیس‌چی‌سی علیرضا اردبیلی، سیاسی فعال جواد عباسی، میللی فعال، گونئی آذربایجان میللی قورتولوش حرکاتینین باشقانی ائلدار قاراداغلی و دیگر اشتراکچیلار Axar.az-این رئاللاشدیردیغی بو لاییحه‌نی یوکسک قیمتلندیریب.