تبریزلی قادین آوارچکه‌ن و ایران میللی آوارچکمه کومان‌داسینین عضوو پرستو مهنمای اقده‌م بون‌دان سونرا فعالیتینی آلمانییادا داوام ائتدیره‌جک.

آخار. آز-این معلوماتینا گؤره، تبریزلی ایدمان‌چی ایران آوارچکمه فئدئراسییاسینین اونو حمایه ائتمه‌مه‌سی اوزون‌دن اؤلکه‌نی ترک ائدیب.

"شرقی آذربایجان آوارچکمه فئدئراسییاسین‌دا یارانان پروبلئملر و خانیم شقاقینین منه قارشی محکمه شیکایتین‌دن سونرا منی ساخلاماق اوچون دفعه‌لرله بیزیم ائوه گلمیش‌دیلر،» پرستو مهنمای اقده‌م ناسر News سایتینا موصاحیبه‌سین‌ده بیلدیریب. «منیم ایدمان فعالیتلریمه قاداغا قویولماسین‌دان سونرا موهاجیرت ائتمه‌یه قرار وئردیم. منیم موهاجیرت ائتمه خبریم دوغرودور بونو اؤز اینستاگرام حسابیم‌دا دا بیلدیرمیشه‌م."

اقده‌م کانوئ ایدمان نؤوون‌ده بئینلخالق آذربایجان رئسپوبلیکاسی کوبوکو موسابیقه‌لرین‌ده ۲۰۰ مئتر و ۵۰۰ مئتر مسافه موسابیقه‌لرین‌ده ایکی قیزیل مئدال قازانمیش‌دی. چین‌ده تشکیل ائدیله‌ن ساکیت اوکئان سو مارافونو دونیا کوبوکون‌دا او، ۴۲ ایدمان‌چی آراسین‌دا ۷-جی اولموش‌دو.

تبریزلی آتلئت داها اؤنجه ایرنا خبر آگئنت‌لیگی ایله موصاحیبه‌ده ایران میللی کانوئ کومان‌داسین‌دان آیریلما سببینی ایضاح ائدرکه‌ن آوارچکمه فئدئراسییاسینین ایدمان‌چیلارلا عدالت‌سیز رفتارینا گؤره تنقید ائتمیش‌دی.

ایران‌لی ایدمان‌چیلارین اؤلکه‌نی سیاسی-اقتصادی سببلر اوزون‌دن ترک ائتمه‌سی آنورمال حال دئییل.

بو یاخینلاردا ایران‌لی جودوچو دونیا جودو چئمپیوناتین‌دا ایران حاکمیتینین ایسرایل‌دن اولان رقیبی ایله اوزلشمه‌سینه قویدوغو قاداغا اوزون‌دن قصداً دیگر ایدمان‌چییا مغلوب اولان سید موللای مونقولوستان وطنداش‌لیغی آلاراق آرتیق بو اؤلکه آدین‌دان یاریشلاردا ایشتیراک ائدجیینی بیلدیریب.