بو گون گونئی آذربایجانین بویوک شاعری محمدحسین شهریارین آنیم گونودور.

Kult.az خاطیرلادیر کی، محمدحسین بهجت تبریزی (شهریار) ۱۹۰۶-جی ایلده تبریز شهرینین باغمئشه بؤلگه‌سینده، تانینمیش حقوق‌شوناس حاجی میرآغا خوشکنابی‌نین عائله‌سینده دنیایا گلیب.

محکمه‌ده وکیللیک ائتمکله عائله‌سینی دولاندیران آتاسی شعری و موسیقینی چوخ سئون بیر ضیالی ایدی. آناسی کوکب خانیم دا شفاهی خالق یارادیجیلیغیندان، کلاسیک ارثیمیزدن، خصوصاً سید عظیم شیروانی‌نین غزللریندن بعضی نمونه‌لری تئز-تئز اوغلو شهریار اوچون اوخویاردی.

حیاتینین بؤیوک بیر حصه‌سینی ایرانین مختلف شهرلرینده، آذربایجاندان اوزاقلاردا یاشاماغا مجبور اولان شهریار اؤزونون غریبلیک قسمتینی وطنین طالعییله مقایسه ائدیر، بو پاراللیکده رمزی بیر معنا گؤروردو:

«سندن آیری دوشسم ده من، عشقین ایله یاشاییرام،
یارالانمیش قلبیم کیمی، قلبی ویران آذربایجان...
وطن عشقی مکتبینده جان وئرمه‌یی اؤیرنمیشیک،
اوستادیمیز دئییب هئچ‌دیر وطنسیز جان، آذربایجان!
شهریارین اوریی ده سنینکی تک یارالیدیر،
آزادلیقدیر منه مرحم، سنه درمان، آذربایجان!»

شهریار تبریزده اورتا تحصیلینی بیتیردیکدن سونرا تهرانا گئدرک، اولجه ۱۹۲۱-جی ایلده تهران اونیورسیته‌سینده، سونرا ایسه طب فاکولته‌سینده عالی تحصیل آلماغا باشلاییب. لاکن فاکولته‌نین سونونجو کورسوندا تحصیلینی یاریمچیق قویوب دولت قوللوغونا گیرمه‌یه مجبور اولوب.

اونون ایلک شعر کتابی ۱۹۳۱-جی ایلده تهراندا اوچ بؤیوک شاعر و عالیمین – ملک‌الشعرا بهارین، سید نفیسی‌نین و پیمان بختیارینین مقدمه‌لری ایله نشر اولونوب.

شهریاری ۲۰-جی عصر آذربایجان پوئزییاسینین نهنگلری سیراسینا اوجالدان ایلک نؤوبه‌ده اونون اؤلمز «حیدربابایا سلام» پوئماسی اولوب. اثر اصلینده شاعرین اوشاقلیق یادداشیندا یاشایان اوجقار بیر کندین خفتی ایله یازیلسا دا، قدرتینین بؤیوکلویونه گؤره بوتؤو وطن حاقیندا داستان کیمی اوخونور. ملی ادبیاتین و مدنیتین قورونماسی و انکشافی اوغروندا فداکارلیقلا چالیشان وطنپرورلرین سعیی ایله «حیدربابایا سلام» اثری ۲۰۰۳-جو ایلین مارت آیندا تبریزده نشر اولونوب. همین نشره مقدمه یازمیش عالیملر – مهدی روشن ضمیر و عبدالهلی کارنگ اونو یوکسک قیمتلندیریب، بو پوئمانین دنیا ادبیاتینین بیر سیرا نادر اثرلری ایله عینی سویه‌ده دایاندیغینی گؤستریب.

شهریار «حیدربابایا سلام» اثری ایله آذربایجان تورکونون ملی حیاتینی بوتون جهتلری ایله گؤسترمه‌یه موفق اولا بیلیب. بو اثر قیسا بیر زماندا یارانماییب. بو اثر ایللردن بری وطندن آیری دوشموش، وطن حسرتی، وطنه قوووشماق آرزوسو ایله یاشایان، وطن اوچون قلبی یانان شهریارین اوریینده دؤنه-دؤنه تکرارلانیب. ساده بیر فورمادا یازیلان پوائما هله ال‌یازما شکلینده ایکن یاییلاراق شهرت تاپیب. پوائما ایکی حصه‌دن عبارتدیر. شهریار پوائمانین بیرینجی حصه‌سینی تهراندا، ایکینجی حصه‌سینی ایسه تبریزده یازیب.

قید ائدک کی، شهریار ۱۸ سنتیابر ۱۹۸۸ (۲۷ شهریور ۱۳۶۷) تهراندا یاتدیغی خسته‌خانادا وفات ائدیب و تبریزده شاعرلر مقبره‌سینده دفن ائدیلیب.

اونون تبریزده کئچیریلن ازدحاملی دفن مراسیمی اشتراکچیلارین ساییننین چوخلوغونا گوره تاریخی حادثه کیمی یاددا قالیب.