ارسطو موجرد ۱۹۷۳-جو ایلده ایران آذربایجانین موغان شهرینده آنادان اولوب و حال حاضیردا اردبیلده یاشاییر. تبریز آزاد اونیوئرسیتئتین‌ده سوسیولوگییا فاکولته‌سینین ماگیستراتورا پیلله‌سینی بیتیریب. او، ۱۹۹۴-جو ایلده‌ن ادبی فعالیته باشلاییب.

شاعر-یازیچی ارسطون موجرردین آخار . آذ-آ موصاحیبه‌سینی تقدیم ائدیریک:

- ارسطو بَی، سون زامانلار یارادیجیلیغینیز نه یئرده‌دیر؟

- آنتونی گیددئنس مودئرنیته‌نی قدیم یونان زامانیندا ایشله‌دیله‌ن «جاقارناوت» آدلی بؤیوک آرابایا بنزه‌دیر . «جاقارناوت» حرکت ائتدیکده چارخلاری آلتیندا ازیلمه‌سین دئیه، هامی اونون گؤیرته‌سینه مینیرمیش، یوخسا قارشیسین‌دا دایانان هر کسی اَزیب کئچیرمیش. مودئرنیته بئله‌دیر، آیاقلاشماق لازیمدیر. لاکین یئنیلییه اولان آشیری مئیل آرتیق بیزیم کیمی کئچید دؤورونو یاشایان اؤلکه‌لرده هر ایشی یاریمچیق قویماقدا بؤیوک رول اویناییر. دولاشیق اجتماعی علاقه‌لر دؤورون‌ده و هابئله مئتانئریشئن لرین دانیلدیغی بیر چاغدا یازیچینین یارادیجیلیغی چوخ واخت ناتامام دوشونجه‌لرله احاطه‌لَنیر. بو ایسه ادبی یارادیجیلیق پروسئسینه تاثیرسیز اؤتوشمور. بو تأثیرین نتیجه‌لری گونئیده بیر یاندان قئیری-رسمی دیلده یازان و بیر یاندان ایسه سون یازیچیلیق اوسلوبلارینی حیاتا کئچیرمک ایسته‌یه‌ن بیر یازیچییا ایکی قات چتینلیکلر یارادیر. بیر سؤزله، ان قاباقجیل تفککور ساحه‌سیله آیاقلاشماق هوَسی اوجباتیندان ایشلریم چوخ واخت یاریمچیق قالیر... آنجاق بونا باخمایاراق، نئجه دئیرلر شاعیرلیک و یازیچیلیق آکتیولیینی قوروماغا چالیشیرام. اؤنجه‌لر چاغداش ادبی دونیامیزا ایتحاف ائتدییم یئنی شعیر فورماسی اولان «نانو شعیر» اوسلوبونو داها دا بعضی معاصر ادبی طلبلره جاواب وئره بیله‌جک شکیلده تکمیلله شدیرمه‌یه چالیشیرام. همچینین یئنی فورمادا داهی شاعریمیز محمد فضولینین مشهور اثری اساسیندا یازدیغیم «لئیلی و مجنون» پیئسینی تئلئه رادیو تاماشاسی قالیبینده وئریلیشه بوراخیلماسینی پلانلاشدیریریق. اؤنجه سیزین دیرلی سایتینیزدا آدی چکیله‌ن بعضی کیتابلاریمی دا، سون ال گزدیرمه‌لردن سونرا چاپا وئرمه‌یه حاضیرلاییرام. بو قدر.

- اوخوجولارینیزلا نه درجه‌ده تماسدا اولورسونوز؟

- ایگیرمی ایلده‌ن آرتیق‌دیر کی، ادبیات دونیاسی ایله علاقه‌ده‌یه‌م. بیر واختلار شعیرلریم و یازیلاریم وار اولان (ایندی بونلارین چوخو یوخدور) دؤورو مطبوعاتدا چاپ اولونوردو. واختی ایله اردبیل شهرینده یاییملانان «آوایئ اردبیل»، «یارپاق»، خیاو شهرین‌ده چاپ اولونان «وراوی» و طلبه درگیلری اولان «دان یئلی»، «قارتال»، هابئله موغان بؤلگه‌سینده یاییملانان «نئدایئ موغان» درگی‌سی و باکی شهرین‌ده نشر ائدیله‌ن «آلاتوران» ادبی ژورنالی و سونرالار ویرتوال دونیا حیاتیمیزا آیاق آچدیغین‌دا داها دا گئنیش اوخوجو کوتله‌سینی ائهتیوا ائد‌ن چئشیدلی اینتئرنئت صحیفه‌لری، ادبی سایتلار، بلوگلار، فئیسبوک، سون زامانلار ایراندا یایقین اولان تئلئگرام کاناللاری واسطه‌سی ایله حؤرمتلی اوخوجولارلا زامان-زامان اونسیتده اولموشوق.

- گونئیلی اوخوجولار اورادا یارانان ادبیاتا نه درجه‌ده ماراق گؤستریرلر؟

- آنا دیلینده رسمی تحصیل آلماماق پروبلئمله رینی نظره آلساق، تأسف کی، ادبیات دونیامیز بیر قدر موطالعه و اوخوجو گرگینلیگی ایله هله ده اَل به یاخادیر. چوخلارینا بو دیلده اوخویوب دوشونمک طبیعی کی، چتیندیر. آنجاق بونا باخمایاراق، بو گون آذربایجان ادبیاتینا ماراق آرتماقدادیر. گونئیده دئمک اولار کی، اؤز آنا دیلیمیزده ایشیق اوزو گؤره‌ن کیتابلار ان آزی کمیت باخیمیندان چوخالماق اوزره‌دیر .

- آذربایجاندا گونئی ادبیاتینا ماراق وار و بونا بوتؤو ادبیاتیمیزین ترکیب حیسه‌سی کیمی باخیلیر. بس گونئیلی لر آذربایجان ادبیاتینا نه موناسیبت بسله ییر؟

- ویرتوال عالمین واسطه‌سیله یارانمیش اینفورماسییا پارتلاییشی بو گون خصوصیله بیزیم کمکیمیزه چاتیر. قاباقلار الده ائتمک ایمکانی چوخ آز اولان آذربایجان یازیچی لارینین و شاعرلرینین اثرلرینی بو گون آذربایجان ادبیاتی ماراقلی لاری چوخ آسانلیقلا الده ائدیر. بؤیوک دراماتورگ جعفر جاببارلینین اثرلریندن توتموش یوسیف وزیر چمن زمینلی، میرزه ایبراهیموو، ائلچین افندیئو، خلیل رضا، ایسماییل شیخ‌لی، آنار ریضا، مؤولود سولئیمانلی، اکرم ایلیس‌لی، آفاق مسعود، کمال عبدالله، رامیز رؤوشن، یئنی نسیل یازیچی و شاعرلریندن راسیم قاراجا، واحید قاضی، نرمین کمال، گونئل مؤولود، سئوینج پروانه و سایرلرین قیمتلی اثرلرینی تاپماق اولدوقجا آسانلاشیب. بو گون یوخاریدا سادالادیغیم یازار و شاعرلرین بیر چوخونون اثرلری پی دی اف و ائلئکترون کیتاب شکلینده ان تئز بیر مدتده اوخوجو طرفیندن الده ائدیله بیلیر. بو کیتابلارین بیر چوخو «کؤچورگه» پروگرامی واسطه‌سیله آز بیر زاماندا لاتینجادان عرب الیفباسینا کؤچورولوب، نیسبته‌ن راحت اوخونولا و یاخود چاپ اولونا بیلیر. ان چوخ آذربایجان ادبیاتی ایله مشغول اولان یازیچی و شاعیرلرین ماراغینی قازانیر. طبیعی کی، بو ایشلرین هامیسی آذربایجان ادبیاتینا اولدوقجا یوکسک بیر رغبت و خوش بیر موناسیبتدن ایر‌لی گلیر.

- گونئیده معاصر ادبیاتدا فلسفی جریان داها چوخ هانسی ایستیقامتده‌دیر؟

- بلکه بو باره‌ده اؤرنک اوچون بیر یازیلی اثر کیمی ایشیق اوزو گؤرموش و هانسیسا فلسفی بیر دوشونجه داشییان کیتابی گؤسترمک، هله‌لیک چتین اولار. آنجاق بوتؤولوکده باخساق، ان یئنی ادبیاتدا غرب فیلوسوفلاری آنتونی گیددئنس، ژاک دئرری‌دا، سلاووی ژیژئک، میشئل فوکو، اومبئرتو ائکو، پیئر بوردیئ و لییواتارد کیمی مودئرن و پوست مودئرن نظریه‌چی لرین تاثیرلرینی آچیق آشکار گؤرمک اولور.