شرقی آذربایجان ویلایتینین مدنیت و ایرشاد ایداره‌سینین باش کاتیبی محمد محمدپور آذربایجان تورکجه‌سین‌ده مختلیف لهجه‌لرده ایشله‌نه‌ن سؤزلرین عینیلشدیریلمه‌سی (ادبی دیل یارادیلماسی ایستیقامتین‌ده ایلک آددیم – رئد.) و آذربایجانین یئنی انسیکلوپدییاسینین (دایره المعارف) یازیلماسینا باشلاندیغینی بیلدیریب.

بو باره‌ده کولت. آذ-آ شرقی آذربایجان ویلایتینین مدنیت و ارشاد ایداره‌سینین اجتماعی علاقه‌لر شعبه‌سیندن معلومات وئریلیب. ایداره‌دن بیلدیریلیب کی، بو ساحه‌ده آپاریلان فعالیت شرقی آذربایجان والی‌سی و ویلایتین ضیالیلاری طرفیندن دستک‌لنیر:

«اؤتن ایللرده بو ساحه‌ده بیر چوخ فایدالی ایشلر گؤرولوب و بوتون ایشلریمیز والی و ضیالیلار طرفیندن دستکلنیب».

مدنیت و ارشاد ناظری، شرقی آذربایجان ویلایتینین والیسی و بیر سیرا ضیالیلارین آذربایجان مدنیت، اینجه صنعت و ادبیات مرکزینده گؤروشو زامانی محمد محمدپور بیلدیریب کی، پرزیدنتین دیلله باغلی وعدلرینین یئرینه یئتیریلمه‌سی ایله باغلی مرکز تبریزده فعالیته باشلانیلیب و بیر سیرا مثبت ایشلر گؤرولوب. اونون سؤزلرینه گؤره، مرکز تبریزده پروین اعتصامینین تاریخی ائوینده یئرلشیر و یارانان گوندن داواملی اولاراق مختلیف ایجلاسلار کئچیره‌رک آذربایجان دیلی، مدنیتی و اینجه صنعتینین اینکیشافی ایله باغلی بیر چوخ لاییحه‌لر حاضرلاییب.

آذربایجان مدنیت، اینجه صنعت و ادبیات مرکزینین مدیری علی محمدی مرکزین فعالیتی حاقیندا معلومات وئریب:

«بیر چوخ ضیالی، تاریخ شناس و اونیورسیتتلرین آراشدیرماچیلارینین ایشتیراکی ایله «آذربایجان والیلری» کیتابی حاضیرلانیب و بیر آیا چاپ اولوناجاق. همچینین آذربایجان ضیالیلاری و عالیملری باره‌ده ده انسیکلوپدییانین حاضرلانماسینا باشلانیلیب. بو ایل عرضینده آذربایجان دیلی و تاریخی مؤوضوعسوندا بین الخالق فوروم دا کئچیریله‌جک».