آذربایجانین عراق‌داکی سفیرلیینین موقتی ایشلر وکیلی رامیز قفاروو داهی آذربایجان شاعری محمد فضولینین کربلا شهرین‌ده‌کی مزارینین داغیدیلماسی باره‌ده یاییلان خبرلره مناسیبت بیلدیریب.

قفاروو پوبلیکا. آز-آ آچیقلاماسیندا دئییب کی، سؤزوگئدن خبرلر تصدیقینی تاپماییب:

«بو گون من سؤزوگئدن مسئله ایله علاقدار عراقین مدنیت ناظرلیگی ایله علاقه ساخلامیشام. اورادان منه بیلدیریلیب کی، بئله خبر دوغرو دئییل و محمد فضولینین مزارینا هئچ نه ائدیلمه‌ییب. ایندی من دیگر یئرلرله ده علاقه یارادیب، دقیقلشدیرمه آپاریرام. یقین کی، اؤزوم ده یاخین زامانلاردا نجف و کربلا شهرلرینه سفر ائدیب، وضعیتله یئرینده‌جه تانیش اولاجام. دقیقلشدیرمه آپاراندان سونرا دا ایجتیماعیته معلومات وئریله‌جک».

اونو دا بیلدیرک کی، محمد فضولینین مزاری ۱۹۸۴-جو ایلده عراقین دئوریلمیش دیکتاتورو صدام حسین طرفیندن داغیدیلیب. همین واختی مزارین داغیدیلماسینا هئچ بیر تورک دؤولتی اعتراض ائتمه‌ییب. آنجاق آذربایجان مستقیل‌لیک قازاندیقدان آز سونرا - ۱۹۹۴-جو ایلده پرزیدنت حیدر علیئوین داواملی ایسراریندان و قطعیتلی مؤوقعیین‌دن سونرا محمد فضولینین اورتالیقدا قالمیش سوموکلری یئنی‌دن دفن ائدیلیب، داغیدیلمیش مزاری و عابده‌سی برپا اولونوب. داها سونرا ایسه فضولی آدینی داشییان توربه اینشا ائدیلیب.

حتی، ۱۹۹۴-جو ایلین ۱۷ سنتیابر تاریخینده آذربایجان حکومتینین تشببوسو ایله بغدادا «محمد فضولی کنگرسی» تشکیل اولونوب. همین تدبیره آذربایجاندان باش ناظرین معاوینی ائلچین افندیئوین رهبرلیک ائتدیی ۱۲۸ نفر تاریخچی و ادبیاتچی عالیم قاتیلیب.

معلوماتلارا گؤره، همین دؤورده صدام حسین حاکمیتی فضولینین مزارینی برپا ائتدیرمه‌یه راضی‌لیق وئرمیرمیش. آنجاق سؤزوگئدن کنگرسده چیخیش ائد‌ن ائلچین افندیئو محمد فضولینین مزارینین داغیدیلماسینا سرت شکیلده اعتراضینی بیلدیریب.

همین واختی «فضولینین مزاری برپا ائدیلمدن بغداددان هئچ بیر یئره گئتمریک» دئیه‌ن ائلچین افندیئو عراقین مدنیت ناظیرلیینه گئده‌رک، اوچ گئجه اورادا گئجه‌لییب. یالنیز بوندان سونرا عراق حکومتی محمد فضولییه توربه اینشا ائدیلمه‌سینه راضیلیق وئریب. محمد فضولی اوچون اینشا ائدیلن توربه ۱۹۹۵-جی ایلده حاضر اولوب.

خاطیرلاداق کی، تورکمن ائلی جبهه سی. کوم خبر سایتی محمد فضولینین عراقین کربلا شهرینده‌کی مزارینین داغیدیلماسی باره‌ده معلومات یاییب.

معلوماتدا دئییلیر کی، یئرلی حکومت بونو کربلاداکی مقدس مکانلاری گئنیشلندیرمک اوچون ائدیب.