کولت. آذ محمد چالغینین "درد" آدلی شعرینی سیزه تقدیم ائدیر.

درد شیرین
خیاوان قیزلارینین اوره یینی سرینله دن آکواریومداکی شووه رن

درد آجی
حالال قادینلارین حارام قازانجی
برانکاردلاردا دوغوم ائولرینه گؤتورولن سانجی
دردیانی باجی

درد تانیش
بی آر تی اوتوبوسلاریندا خانیملارین اورالارینا اوزانان اللر

درد یابانجی
ایرانسل جنابلارینین سنه باغیشلادیغی آوانس
قارا بانکین قاباغیندا پاپیونلانمیش شانس
قارداشینی اؤلومه گؤتورن الگانس

درد باش آغریلارینی توختادان حب دیر
گوجون چاتیرسا قورخما درد ایندی دب دیر
قونقا باشیندا آیاق یالین قاچیر دونموش آرابانین آردینجا
قورد مئیدانیندا اوستونه قار یاغمیش دردین

درد دوشونجه
سطیر سطیر اوخودوغون کتابلار
گؤردوکلرینین یانیندا گؤرمه دیکلرین
گورمه دیکلرینین یانیندا گؤردوکلرین
سئومه دیکلرینین یانیندا سئودیکلریندیر

درد یانی غورورون ویترینلره ال آچماسی
گؤزلری آنامین شوه مونجوغونا بنزه ین قیزین عزراییلله قوشولوب قاچماسی

درد یانی من
قانادیندان یارالانمیش گؤیرچینم ائله کئچمه بؤیرومدن

درد یانی سن
گؤی مسجیدین حیطینده کی دردلرین چوخ سویو شیریندیر گیله م
اوووووی تبریزیم
درد لرینی گؤرنده اؤلورم