تورکیه پرزیدنتی رجب طیب اردوغانین آذربایجانا سون سفری، منجه، یالنیز ظفر گونونون بیرگه کئچیرمک آرزوسوندان ایر‌لی گلمیردی. دوزدور، تورکیه ایله آذربایجان آراسیندا معین سرینلیی اولدوغو ایندیکی زمان‌دا بو تشببوسه بؤیوک احتیاج واردی و ایکی اؤلکه‌نین لیدرلری یئنیدن بیر آرایا گلمه‌لی، دنیایا «بیز بیر یئردییک» مساژی وئرمه‌لی ایدیلر و چوخ شوکور کی، بو آرزوموز رئاللاشدی. بونونلا بئله، اردوغانین شوشایا سفرینین بیر باشقا چوخ اؤنملی و پراگماتیک سببی ده واردی.

بو سؤزلری Axar.az-آ آچیقلاماسین‌دا پولیتولوق حیدر اوغوز دئییب.

اونون فکرینجه، ان اؤنملی سببلردن بیری «بیر یول، بیر کمر» لاییحه‌سینه جنوبی کورئیانی جلب ائتمکله باغلی اولا بیلر:

«تصادفی دئییل کی، رجب طیب اردوغان آذربایجان زیارتینه جنوبی کورئیا سفری عرفه‌سینده قرار وئرمیشدی. سئول یولچولوغوندا آذربایجانین و قازاخیستانین هوا مکانیندان کئچرکه‌ن ایکی قارداش اؤلکه‌نین خالقینا و پرزیدنتلرینه ایستی مساژلار وئره‌رک یولونا داوام ائتمیش، سئولدا رسمی گؤروشلرینی بیتیردیکدن سونرا کئچیردیی مطبوعات کنفرانسین‌دا ظفر گونو مناسبتیله آذربایجانا گئده بیلجیینی آچیقلامیشدی. فکریمجه، بو، سئول گؤروشونون طلبلریندن ایر‌لی گلن ضرورت ایدی. بئله کی، جنوبی کورئیا پرزیدنتی ایله گؤروشده اردوغان اساساً ۵ ساحه‌ده امکداشلیق اوچون راضیلیغا گلدیکلرینی بیان ائتدی. بو ساحه‌لری قیساجا بئله اؤزتله‌مک اولار:

۱) اقتصادی علاقه‌لری گئنیشله‌ندیرمک، ایکی دولت آراسیندا تجارت دورییه‌سینی ۱۱ میلیارد دلاردان ۱۵ میلیاردا یوکسلتمک؛

۲) نادر تورپاق المنتلرینین ائمالی، بیر سیرا قاباقجیل تخنولوگیا ساحه‌لرینده، خصوصاً ده باتارئیا استحصالی، صونعی اینتلکت و یاریم‌کئچیریجیلر ساحه‌سینده امکداشلیق؛

۳) نووه انرژیسی و یئنی سانتراللارین قورولماسیندا بیرگه فعالیت؛

۴) حربی صنایع ساحه‌سینده امکداشلیق؛

۵) اورتاق بازارلار یاراتماق.

گؤروندویو کیمی، اردوغانین جنوبی کورئیایا سفری بؤیوک استراتژی اهمیت داشییردی. و بو هدفلرین مرکزی آسییا و آذربایجانلا دا بیرباشا علاقه‌سی وار. قید ائدیم کی، اردوغانین بو سفریندن هارداسا ۴۵ گون اول، ۱۶ سنتیابر ۲۰۲۶-جی ایل تاریخینده جنوبی کورئیا پرزیدنتی لی جی میونگ مرکزی آسیا اؤلکه‌لرینین باشچیلارینی سئولا دعوت ائتمیش و سی۵+کی فورماتیندا ایلک زیروه توپلانتی‌سی کئچیرمیشدی. زیروه‌نین اساس مقصدی مرکزی آسییا اؤلکه‌لرینین نادر تورپاق المنتلرینین جنوبی کورئیایا داشیما یوللارینین مذاکره‌سی ایدی.

مسئله بوراسیندادیر کی، قازاخیستانین و اؤزبکیستانین زنگین احتیاطلاری، جنوبی کورئیانین ایسه بو ماتریاللارا بؤیوک احتیاجی وار. سئول تورکیستانین بو پوتنسیالیندان فایدالانا بیلسه، چینه اولان باغلی‌لیقدان جانینی قورتارار. بئله کی، سئول یئنی تخنولوگیالارین استحصالیندا احتیاج دویدوغو نادر تورپاق المنتلرینین ۸۲%-نی چیندن آلیر. چین ایسه بو ثروتیندن استراتژی سلاح کیمی استفاده ائدیر و ایستدیی آن اخراجی دایاندیریر. نتیجه‌ده آلیجی اؤلکه‌نین صنایع‌سی آلت-اوست اولور. ۲۰۱۰-جو ایلده بونا بنزر حادثه‌نی یاپونییانین باشینا گتیرمیشدی. جنوبی کورئیا دا عینی وضعیتله اوزلشمه‌مک اوچون یئنی آلترناتیولر تاپمالیدیر. ان یاخشی آلترناتیو ایسه مرکزی آسییا اؤلکه‌لری اولا بیلر».

بو مسئله‌ده اؤنملی بیر پروبلم اولدوغونو خاطیرلادان حیدر اوغوز اساس مسئله‌نین لوگیستیکادان قایناقلاندیغینی وورغولاییب:

«درد بوراسیندادیر کی، جنوبی کورئیا ایله مرکزی آسیا آراسین‌دا بیرباشا علاقه یوخدور. بونون اوچون سئول حاکمیتینین قارشی‌سیندا بیر نئچه واریانت وار، اما بو واریانتلارین هامی‌سی دشمن و یا رقیب اؤلکه‌لرین اراضی‌سیندن کئچیر. مثلاً، جنوبی کورئیادان مرکزی آسیایا شمال استقامتیندن گئتمک اوچون مطلق شمالی کورئیا و روسیا اراضیلریندن کئچمه‌لیسه‌ن. شمال-غرب استقامتینده ایسه چین کیمی نهنگ دایانیر. دئمه‌لی، شمالی کورئیا اوچون ان اوپتیمال واریانت مرکزی آسیانین نادر تورپاق المنتلرینی اؤز اؤلکه‌سینه داشیماق یوخ، یئرینده‌جه ائمال ائدیب، حاضر محصول کیمی گتیرمکدیر. محض بو مقامدا تورکیه‌یه احتیاج اورتایا چیخیر.

اولا، اونا گؤره کی، مرکزی آسیایا قویولاجاق اینوستیسییانین مدافعه‌سی و محافظه‌سی طلب اولونور. بونون اوچون ایسه مرکزی آسیا اؤلکه‌لرینی دشمنلردن قورویان گوجلو اردو قورولمالیدیر. تورکیه‌نین ده تورک دنیاسی پروژسی اولدوغونو نظره آلساق، بو واریانتدا قارداش اؤلکه ان یاخشی و اعتبارلی سئچنک کیمی گؤرونور.

ایکینجی‌سی، اونا گؤره کی، تورکیه برک آیاقدا هم ده لوگیستیک اؤتوروجو رولو دا اویانایا بیلر. یعنی مرکزی آسیادان همین ماللار خزر دنیزی و آذربایجان اوزریندن تورکیه‌یه، تورکیه‌دن ایسه دنیز یولویلا کورئیایا داشینا بیلر. دوزدور، بو یول خیلی اوزوندور، اما دار آیاقدا، هئچ بیر واریانت قالمایاندا گؤزدن کئچیریلمه‌سی ممکوندور.

اوچونجوسو، اونا گؤره کی، تورکیه‌نین اؤزو ده نادر تورپاق المنتلری ایله زنگین اؤلکه‌دیر. گله‌جکده اونون بو پوتنسیالیندان فایدالانماق اولار».

حیدر اوغوزون فکرینجه، کورئیا ایله باشلایان بو تشببوسه یاخین گله‌جکده یاپونیا دا قوشولا بیلر و بو پلانلار مرکزی آسیا اؤلکه‌لری ایله یاناشی، آذربایجانین دا، تورکیه‌نین ده ماراقلارینا تام اویغوندور:

«ان گؤزل طرفی ایسه اودور کی، کورئیا و یاپونیا کیمی لوگوستیک پوتنسیالی گئنیش اولمایان اؤلکه‌لرین بو پروژنی حیاتا کئچیرمه‌سی رگیونال دولتلرین ده معاصر صنایع قوروجولوغوندا اهمیتلی رول اوینایا بیلر. باشقا سؤزله دئسک، بیز آرتیق خاممال دولتی اولماقدان چیخیب صنایع‌لشمیش اؤلکه‌یه چئوریله بیلریک».