کؤچورن: فرخ جرایدی

صحبت چوْخ درین گئتمشدی . من حس ائدیردیم کی ، قیْزلارین دۆشۆنجه‌سی بوُ سؤزلری چکمیر و منیمسه‌مکدن عاجز قالیْر ، چۆنکۆ نینا چوْخ درین دۆشۆنجه‌یه دالمیْشدی . مرند شهری گؤرۆنۆردۆ . هر بیریمیز شهرین اطرافینی ، باغلاری و شهردن کنار خیْردا محلله‌لری گؤزدن کئچیریردیک . صحبتین آراسی کسیلمیشدی . کۆچه‌لره گیردیکده ، بؤیوک- کیچیک فایتوْنوموزون دؤوره‌سینه توْپلاشمیش ایدی . یوْرغون آتلار چوْخ یاواش گئدیردی . چوْخ غریبه سسلر ائشیدیردیک.
-« محمد آغا ماتوشکالارا باخ ! »

-« آغا بالا ، قوْیما گلدی ... »

- « بؤیوک آغا ، مالدی هاااااا.
.
.
بۆجۆر سسلردن چوْخ ائشیتدیک. ائشیدیلن سسلر گؤستریردی کی مرند شهرینده آغا بالا ، محمد آغا ، بؤیوک آغا آدیْنی داشیْماق چوْخ بؤیوک عادتدیر.

بیزی " شجاع نظام "-یْن مهمان خانا سینا قدر یوْلا سالدیْلار . شئی‌لریمیزی گؤتوروب پیلله‌لردن یوُخاری چیْخینجایا قدر « ماتوشکایا باخ » سسینی ائشیدیردیک.

مهمان خانا چوْخ تمیز دگیلدی . لاکین یئنه ده راحات اوْلماق اۆچۆن ال وئریشلی ایدی . ایکی اوْتاق گؤتۆردۆک . شام ائتمک و چای ایچمک اۆچۆن قیْزلاردا منیم اوْتاغیمدا ایدیلر . ساماوار قاینایا-قاینایا گتیریلدی . چایا لازیم اوْلاجاق شئی‌لرین هر بیرینی بیر آدام گتیریردی . شئی‌لرین گتیرنلرین هر بیری سی ، بللی بیر سؤز سوْروشمامیش گئری قاییتمیردی . اؤرتولو سوْروشدورما بیتندن سوْنرا بیز چای ایچمه‌یه باشلادیْق . فقط یئنه ده قاپینی آچیْب ، اؤرتنلر ده وار ایدی . بوُنلار هامیسی شجاع نظام-ین ( مرند ژنرال ناییبی ) گیزلی آداملاری ایدی . تبریز-ه نه کیمی آداملار گئتدیگینی اؤیرنمه‌گه چالیْشیردیلار.

چای-دان و یئمک دن سوْنرا وثیقه‌لری ده یوْخلاماغا گلدیلر . قاباقجا قیْزلار اؤز وثیقه لرینی وئردیلر . وثیقه ییغانلار اوْخویا بیلمیر دی . اوْخوماق اۆچۆن منه گلدیلر . اوْخویوب ، روُس کنسول خانا سینا گئتدیکلرینی سؤیله‌دیم . احترام ائتدیلر . باشلارینی اییب « عفو ائدین » دئیه باییرا چیْخدیلار . منیم وثیقه‌می سوْروشمادیقلاری کیمی ، داها قاپیْنی دا تئز-تئز آچیْب باخماقدان واز گئچدیلر.

سحر تئزدن قالخیْب یوْلا دۆشمک لازم ایدی . آخشام یئمه‌گینی ساعات اوْن دا بیتیریب یاتماغا حاضیرلاشدیق . قیْزلارین اوْتاغی مُحکم ایدی . منیم اوْتاغیْملا یان-یانا ایدی. قوْرخموردولار . قاپیْنی ایچه‌ریدن باغلاییب یاتدیلار. اوْتاقلارین کیرایه‌سینی و یئمک خرجینی آخشامدان وئریب اوْتاغیْمیزا قاپاندیْق.