آنا صحیفه کولت |
کوچورن: فرخ جرایدی
چوْخ تئز-تئز گؤرۆشۆردۆک . گؤرۆشمک و لازمی سؤزلری دانیْشماق اۆچۆن چئشیدلی یئرلر بللی ائدیردیک . گؤرۆشمهلرین سایی آرتدیْقجا نینا نین دا گؤرۆشمهلره ایستهگی آرتیْردی.
بعضن هر گۆن گؤرۆشۆردۆک . نهایت اوْنو باجیْسیندان آییرا بیلدیم.
نینا نیْ " میناسیان» نیْن ائوینده حاضرلانمیش اۆچ اوْتاغا کؤچۆردۆم . نینا دان ایش چکمهلی اوْلدوغوموزو ستارخانا دا سؤیلهدیم. اوْنون منه قارشی بؤیوک حرمت بسلهدیگینی ، بوُ حرمتین سئوگییه قدر واردیْغینی دا آرتیْردیم. ستارخان منی تبریک ائتدی ، مساله ایله سوْن درجه ماراقلاندی.
« آییق اوْل ، ساری تئل قیْز بیزی ساتماسین . » دئییب گۆلدۆ.
« منجه انسان-ی ساتان قیْز دگیل . فقط اوْنونلا چوْخ احتیاطلی داورانمالییق. کنسول خانادان ، اؤزل لیکله چئویرمنلر ائویندن ، بیر چوْخ لازمی وثیقهلرین الده ائدیلمهسینی بوُنون واسطهسیله موفق اوْلاجاغام .
« قی-ْزا بؤیوک وعدهلر ، حتا قاباقجادان هدیهلر ده وئرمک لازمدیر».
« بوُنلارین هئچ بیری لازم دگیل . اوْ منیم مقصدیمه عمل ائتمهگی هر بیر هدیهدن آرتیْق بیلر».
سردارین امری ایله میناسیان چاغریْلدی . میناسیان " هنچاک " فرقهسینین اۆیهسیدیر. اوْنا نینا و اوْنون اوْتاقلاری حاقیندا لازمی تاپشیْریق وئریلدی . سردار علاوه اوْلاراق اوْتاقلارین دؤشنمهسینی و هر باخیْمدان تکمیل اوْلونماسینی لازم اوْلان آداملارا تاپشیْردی.
نینا میناسیانین ائوینه کؤچدۆ. نینا اوْتاقلارین بئله زنگین بیر حالدا دؤشنمهسینی حتا بوُنون آز بیر زاماندا باشا گلمهسینه تعجب ائدیردی. گنج قیْز بوُندان چوْخ سئوینیب و منیم سئوگیمه اینانیردی . من دوْغرو دان اؤزۆنه بیلدیرمهدن اوْنو سئویردیم . اوْ خاصیت ده ، اوْ صمیمیت ده قیْزی سئومهمک اوْلمازدی . اوْنو آلداتماغی دوْغرو دان دا بیر خیانت حساب ائدیردیم . چۆنکۆ قیز بوُ سئوگی اۆچۆن اؤلومه قدر گئدهجگینی هر بیر حرکتینده بیلیردیم.
فقط من قیْزین سئوگی اۆچۆن دگیل ، انقلابا بیر انقلاب چی کیمی یاردیْم ائتمهسینی ایستهییردیم . بۆتۆن دانیْشیغیمیزدا سئوگیلی قیْزی انقلابا حاضرلاییر واوْنو اینقلابیْن گلهجگینه ایناندیریردیم.
« منیم بۆتۆن ماللاریمی اؤزۆمه قایتاردیلار . ایندی زنگین بیر آدامیْق .بوُ شئیلری ده سنین اۆچۆن آلمیْشام . »- دئدیکده نینا نین سئوینجدن گؤزلری یاشاردی و بیر داملا گؤز یاشی ایپک دوْنونون اۆزرینه دۆشۆب پارچالاندی.
« من سیزی اؤزۆمه بوُ قدر صمیمی بیلمهییردیم »- دئدی.
« سیز گلهجکده داها دا خوْشبخت اوْلاجاق سینیز. من اؤز صمیمی حرمتیمی سیزه گؤسترمک اۆچۆن داها باشقا امکانلار الده ائتمهگه چالیْشاجاغام.
«سیزه اۆرکدن اینانیرام . ایناندیغیمدا ایندی دگیل ، بیرینجی گؤرۆشدن دیر».
اوْ منه دوْغرو دان اینانیردی . اوْ لاپ دلیجهسینه سئون بیر قیْزین اؤز سئودیگی گنج-ه قارشی دوُرومو توُتموشدو . بوُنو بۆتۆن حرکتی ایله گؤستریردی . اوْ بوُنا حاقلی ایدی . من اوْنو ائیلندیرهجک و راضی سالا بیلهجک بۆتۆن وساییل لری حاضرلاماغا چالیْشیردیم. اوْنسوز یئمز ، اوْنسوز دا بیر یئره گئتمزدیم . اوْ دا بئله ایدی . لاکین من بوُرا دا اوُزون گئتمهگیمی آنلادیم ، چۆنکۆ منیم بوُ درین محبتیم گنج قیزین راحات لیغینی پوْزوردو.
اوْ منیم انقلاب حرکاتیندا ایشتراک ائتدیگیمی و اۆزریمه بللی گؤرهولر گؤتۆردۆگۆمی بیلمیردی . بوُنا گؤره ده سؤز وئردیگیم واقتلاردان یوُباندیقدا داریخیر، آغلاییر ، حتا باشقا سئوگی ایله ایلگیلی اوْلدوغومو ظن ائدیب قیْسقانیردی . نینا آرا-سیْرا منی بوُ گئجیکمه لر اوپۆچۆن دانلاماغا باشلامیْشدی .
بۆتۆن بوُ نمایشلر بیر سئوگییه ، لاکین دلی بیر سئوگییه ، هر جاندان کئچمهگه حاضر اوْلان بیر سئوگییه ، دلالت ائدیردی .
گنج قیْزین حرکت و داورانیْشلاری اوْنون قلبینده کی هیجانلاری آیدیْنجا سینا اوْخودوردو . اوْنون سئوینج ایله اۆرگی ، تیترک گؤزلرینین باجاسیْندان ، قوْللاریمین آراسیْنا آتیْلماق ایستهییردی .
اوْ دانیْشدیقجا آردسیْز اۆرگینین دؤیۆنتۆسۆنۆ بئله ائشیدیردیم . بوُنونلا برابر اوْ چوْخ اوُتانیْردی . بعضن لازمی سؤزلرینی دئمکدن بئله چکینیردی . سئوگی سؤزۆ هر بیر حرکتینده وار ایدی ، لاکین سؤزده و دیلده یوْخ ایدی . سئویرم دئمهگه اوُتانیْردی ، لاکین دانیْشیقلارینین هامیسی سئوگی اطرافیندا دوْلانیردی .
بیریمیز اوُتانیر ، دیگریمیز قوْرخوردو . اوْ سئوگیسینی اعلان ائتمکدن اوُتانیر ، من ایسه آماجیْمی اوْنا آچماقدان قوْرخوردوم . چۆنکۆ آماج اوْ سئوگیـدن داها بؤیوک ، داها دا اؤنملی ایدی .
بیر نئچه گۆن بئله دوام ائتدیک . بۆتۆن دانیْشیقلار اوْنون سئوگیسینی و منیم آماجیْمی آندیراجاق فلسفهلر و بوُلماجالاردان عبارت ایدی .
اوْنو هر سؤزده سیْناییر ، آند ایچدیریر ، قادیْن لارین تئز سئویب تئز ده آیریْلدیقلاری مسالهسینی اوْرتایا چکیب و دئییردیم:
« قادیْن لارین اۆرگی نازیک دیر . اوْنلار چوْخ تلهسیرلر . بیر کیشی نی هئچ تانیْمادان سئویرلر . قادینین اۆرگی آلدانیْر ؛ گؤزلری ، حرکتی ایسه آلدادیر. سوْنوجدا هم کیشی همده قادیْن هر ایکیسی بدبخت اوْلور . بۆُ جۆر آداملار هئچ واقت صمیمی بیر عایله باشچیسی اوْلمازلار . بوُنون اۆچۆن هم کیشی ، همده قادیْن اوُزون زامان بیر-بیرلرینی اؤیرنمهلی دیلر».
نینا دۆشۆندۆکدن سوْنرا اوُتانا-اوُتانا گۆلدۆ:
« منه قالیْرسا سئومهمهگین اختیاری انسانین اؤز الینده دگیل. اگر اختیار انسانین اؤز الینده اوْلارسا ، سئوگینین بوُ آغیْرلیقلارینا دؤزمک ایستهمز»
ایکی اۆزلۆلۆیو دوام ائتدیرمک مۆمکۆن دگیلدی . نینا نین هیجان و اضطرابینی حس ائدهرک روحی عذاب چکیردیم . اوْنا اینانماق یا ادراکسیْزلیق ، یا دا رحم سیزلیک ایدی . نینا چوْخ زاماندان بَری اتینده ، قانیْندا بسلهدیگی سئوگینی لال بیر حرکتله ایفا ائلهمکدن یوْرولموشدو.
اَن سوْنوندا اوْنو سؤزله ده دئدی:
« سئویرم ! منی چوْخ اینجیتمه !»
نینا بوُ سؤزۆ دئدیکده اوُتاندی و الینی گؤزلرینه قوْیوب یاتاق اوْتاغینا قاچدیْ . قاپیْنی آرخاسیْنجا قاپادیْ.
من ایسه آیاغا دوُروب ، ائویمه قاییتدیم.
تاریخ
2019.02.19 / 11:14
|
مولف
محمد سعید اردوبادی
|