قاجارلار سلاله‌سینین ان پارلاق علم، معریفت و فضیلت صاحبلرین‌دن اولموش شاهزاده نادیر میرزا (۱۸۲۷-۱۸۸۵) آستراباد (ایندیکی گرگان) شهرینده دونیایا گؤز آچسا دا، عمرونون بؤیوک حیصه‌سینی تبریزده کئچیریب.

مؤلفی اولدوغو اثرلردن اونون مکممل تحصیل آلدیغی، دوغما تورک و دؤولت فارس دیللریندن باشقا عرب و فرانسیز دیللرینی ده یوکسک سوییه‌ده بیلمه‌سی معلوم اولور. نادیر میرزانین ایستعدادلی بیر قلم صاحبی اولدوغو اونون یازدیغی بیر نئچه کیتابدان، او جمله‌دن: آشپازلیق مؤوضوعدا فارس دیلینده «کارنامه»۱، عرب آتالار سؤزلری و ضرب المثللری حاقین‌دا عرب دیلین‌ده «نوادیرالامثال»، آناتومییا علمی اوزره یئنه عرب دیلین‌ده «تشریح الانسان» ریساله‌لریندن بیلینیر. حال-حاضردا تقدیم اولونان «تاریخ و جغرافیای دارالسلطلنه تبریز به ضمیمه شرح حال بزرگان»، و یا ساده‌جه «تاریخ تبریز» کیتابی ایسه، سؤزسوز کی، اونون ان مشهور و موهوم اثریدیر. نادیر میرزانین قیرخ ایل‌لیک مشاهیده‌لرینین بهره‌سی اولان بو کیتاب قدیم زامانلاردان توتموش ۱۹-جو عصره قدر بؤیوک دؤورو احاطه ائدیر. یازیلماسی ۱۸۸۴-جو ایلده تماملانمیش اثر تبریز شهرینه حصر اولونسا دا، عمومی‌لیکده آذربایجانا دایر ماراقلی بیلگیلرله زنگیندیر. بورادا یوزه یاخین تاریخی سنددن، او جمله‌دن مکتوبلاردان و فرمانلاردان ایستیفاده اولونموش و همین سندلر کیتابین صحیفه‌لرین‌ده تقدیم ائدیلیب. اثرین آدیندان بیلیندیی کیمی، مؤلف تکجه تاریخی حادثه‌لری شرح ائتمکله کیفایتله‌نمه‌ییب، تبریزین عمارتلری، مسجیدلری، قبیریستانلیقلاری، باغلاری، چئشمه‌لری، چایلاری، داغلاری، کهریزلری و محله‌لری، بورادا بیته‌ن میوه‌لر، هابئله یئرلی اهالینین عادت عنعنه‌لری، مراسیملری و بیشیردیکلری خؤرکلری حاقین‌دا دولغون معلومات وئریر و عینی زامان‌دا گؤرکملی حکومت و دین خادیملرینی، عالیملری، شاعرلری و تبریزین تاریخین‌ده ایز قویموش ساده ساکینلری خاطیرلاییر.