بشر تاریخین‌ده‌کی ایختیراعلار، کشفلر اینسانلارین حیاتینین داها دا یاخشیلاشماسینا، ماراقلی و راحت اولماسینا خیدمت ائتمیشدیر.

بو باخیم‌دان ۱۹-جو عصرده‌کی ایختیراعلارین چوخ بؤیوک اهمیتی اولموشدور. یئنی تاریخین اهمیتلی و چکیجی ایختیراعلارین‌دان بیری کیمی فوتو ایشی معاصر دؤوروموزده ده اؤز پوپولیارلیغینی قورویوب ساخلایا بیلیب.

اؤلکه‌میزده فوتوگرافییانین ۱۵۰ ایله یاخین یاشی واردیر. عزیزبالا حاجییئو اؤلکه‌میزده فوتوگرافییانین اساسینی قویانلاردان بیری حساب اولونور.

حاجییئو ۱۸۹۵ –جی ایلده تبریزده دوغولوبدور. آناسی سکینه خانیم همین واخت قوهوملارینین توی مراسیمینده ایشتیراک ائتمک اوچون تبریزده ایدی. تبریزده دونیایا گلمه‌سی ده سونرالار اونون سوویت دؤولتی طرفین‌دن رپرسییا اولونماسی اوچون بیر اساس اولاجاقدی. اونون آتاسی محمده‌لی حاجییئو اصلا قوبادان ایدی. حاجییئو سلاح ساتیشی ایله مشغول اولوردو. آناسی سکینه خانیم ایسه ایپک و مخمر اوزرینده تیکمه ایشی ایله تانینیردی. عائله باکی‌دا آشاغی داغلی محله‌سین‌ده آتا-بابا مولکونده یاشاییردی. عزیزبالانی آتاسینین اؤلوموندن سونرا عائله‌نین یاخین قوهومو ، میلیونچو حاجینسکی حمایه ائتمیشدیر.

قید ائتمک لازیمدیر کی، بو صنعتله مشغول اولماق اوچون شهر قوبئرناتورونون خصوصی اجازه سندی اولمالی ایدی. ۲۰-جی عصرین اوللرین‌ده نفت باکی‌سیندا فوتو ایشی ایله اساساً یهودیلر، روسلار و ارمنیلر مشغول اولوردو. او زامانلار باکی‌دا ایلک فوتوستودییا بازار کوچه‌سینده ( ایندیکی آذربایجان پروسپکتی ) یئرلشیردی. عزیزبالا دا اولجه بورادا فوتوگرافلار آرتئلینده چالیشیردی. فوتوگرافییایا سونسوز هوه‌سی و ماراغی اولدوغو اوچون اؤز شخصی فوتوستودییاسینی آچماق قرارینا گلیر و بو مقصدله باییل قصبه‌سینده یئر گؤتوره‌رک فوتوستودییانی آچا بیلیر. فوتوستودییا اوچون لازیم اولان بوتون آوادانلیقلاری ، هر جور خیردالیغی دا داخیل اولماقلا،او، آلمانییادان سیفاریش ائدیب گتیزدیریردی.
حاجییئوین صنعتی ایله باغلی اولاراق چوخلو دوست و تانیشی وار ایدی. اونون ان یاخین دوستلارین‌دان بیری حسین جاوید ایدی. جاوید یئنیجه چاپدان چیخمیش اثرلرینین تام کوللیاتینین بیر نوسخه‌سینی اونا هدییه ائتمیشدی. چوخ گومان کی، بو هدییه ده فوتوگرافا چوخ باها باشا گلدی. آذربایجان‌لی فوتوگراف ، ایشینه – صنعتینه وورغون و ان اساس دا پایتخت‌دا ایلک دفعه فوتوستودییالاردان بیرینین یارادیجی‌سی کیمی بو دفعه عزیزبالا معلم ارمنی فیتنه‌سینین قوربانی اولدو. اونو حبسه آتدیران دا بیر ارمنی فوتوگرافی اولدو. همین بو ارمنینین فوتوستودییاسی حاجییئوین ایش یئرینین یاخینلیغیندا یئرلشیردی. او ، ایرانلا علاقه‌سینه ، قاچاقمالچیلیغا، ه. جاویدله دوستلوق ائتدیینه گؤره اتهام اولوندو. اوسته‌لیک اونون بوتون املاکی مصادیره اولوندو، ایستودییاسی ایسه داغیدیلدی.

آرخانگئلسکده سورگونده اولارکه‌ن عزیزبالا معلمین ،نئجه دئیرلر ، «بختی گتیردی «. زونا ناچالنیکینه فوتوگراف لازیم ایدی. آذربایجانلی فوتوگراف سندلر اوچون محبوسلارین شکیللرینی چکیردی. اصلینده ، سئودیی پئشه‌سی اونو اؤلومدن بئله قورتاردی. سورگون ایللرینده محبوسون آدینا وئریلمیش سندلردن آیدینلاشدیردیق کی، او ، آرخانگئلسک ویلایتینده اونقلاق آدلی یئرده جزا چکمیشدیر. چوخ گومان کی، همین یئر قصبه اولموش‌دور. رپرسییا قوربانی اولموش دیگر محبوسلار کیمی عزیزبالا دا سورگوندن تامام باشقا بیر آدام کیمی قاییدیر. عذاب-اذیتلر چکمیش، حیاتدان کوسموش حاجییئو بیر داها اؤز سئویملی صنعتینه قاییدا بیلمیر. باکییا دؤندوکدن سونرا بیر مدت منزیل-ایستیثمار ایداره‌لریندن بیرینده مدیر وظیفه‌سینده چالیشمیشدیر. آذربایجان رسپوبلیکاسینین ۱۹۲۰-۱۹۳۷- جی ایللرده فعالیت گؤسترمیش ایلک فوتوگرافی عزیزبالا حاجییئو ۱۹۷۳-جو ایلده وفات ائدیب.