کؤچورن: فرخ جرایدی

آمریکا کنسول خاناسی منی دوْغو دیللرینین چئویرمنی و گیزلی ایشلر باشچیسی بللی ائتمک ایسته‌ییر. بوُ قوْنو دا تهراندان دا تلگراف‌لا سوْروشوب اجازه آلیْنمیشدیر. ایندی سیز سؤیله‌یین، تبریزده قالماق، باشلادیْغیمیز ایشی دوام ائتدیرمک ممکن اوْلاجاق‌می دیر؟ »

« نه اۆچۆن ممکن اوْلماسین ؟ »

«من دوْغو دا بیر چوْخ یئرلری گؤرمۆشم، لاکن تبریز اوْنلارین هئچ بیرینه بنزه‌میر، بوُنو کنسولون اؤزۆده خانیْمی دا منه سؤیله‌میشدیر. بوُرانیْن محیطی مرّکب و باش گیجلدیجی محیط دیر. بوُرادا یاشاماق اۆچۆن هر آددیمی یوْخلاماق، هارا قدم قوْیدوغونو بیلمک لازم دیر. هر حالدا من یالنیز سیزه اینانیرام. فکرینیز نه‌دیر ؟ »

« قوْرخولاجاق بیر شئی یوْخدور، یئرلی خالق یابانجیْلار حقینده اوْلدوقجا محبت‌لی دیرلر، اؤزللیکله آمریکالی‌لارا

قارشیْ آزاجیْقدا گیلئیلی‌لیک حس ائدیلمز. بلکه اوْنلارا قارشیْ محبت بسله‌ییرلر. سیزین کنسول خانا گؤره‌ولی اوْلدوغونوز منی اۆرکدن سئویندیردی و سیزه قوُتلو اوْلسون دئییرم. اوُشاقلاری خسته‌لردن آلیْب تربیه ائتمک ایشینده ده یئرلی‌لر سیزه حرمت بسله‌یه‌جکدیر. ایسته‌دیگینیز اینانیلمیش آداملارا گلدیکده اوْنلاری دا من اؤزوم تانیْدیغیم، گۆوه‌ندیگیم گنج‌لرین آراسیْندان سئچیب وئره‌جه‌گم. اوْ آداملار یالنیز تشکیلاتینیز اۆچۆن لازم اوْلانلاری آلماقدا دگیل، بیر اوْلای اۆز وئردیکده آمریکالی‌لاری اسلحه‌لری ایله ده قوْرویا بیلرلر. ایسته‌دیگینیز زمان بوُ آداملاری گتیره بیله‌رم. »

میس هاننا سئوینجیندن بیر داها دا الیمی سیْخدی، رنگی قیْزاردی، وجودو تیتره‌دی، لاکن بوُنو حس ائتدیرمه‌مک اۆچۆن ایکینجی چایی سۆزمه‌گه باشلادی.

من دوْغرودان دا چیْخیلماز بیر دوُرومدا ایدیم. قیْزین آماجیْنی لیوارجان یایلاسیْندا ایکن حس ائتمیشدیم. اوْنو ردّ ائتمک منه چوْخ آغیْر گلیردی. بیر بوُ کی آمریکالی لارین یاردیْمینا احتیاجیمیز وار ایدی، ایکینجیسی ده بوُ کی منه اۆرکدن اوْلاراق باغلانماق ایسته‌ین بوُ گنج-ی هر بیر بهانه اوْلمادان ردّ ائتمک، اوْنون یاشامیْنین تاریخینده سیلینمه‌ین و اوُنودولماز بیر تحقیر لکّه‌سی اوْلوب قالاجاق ایدی. باشقا طرفدن ده منیم اوْنا باغلانماغیْم اوْندان داها گئنیش اۆرکلی، داها گؤزل اوْلان حتی انقلابدا اؤنملی روْل اوْینایان نینانی کیچیلتمک دئمک ایدی. اوْنسوُز دا من نینانین راحتلیگینی پوْزموش و آی‌لاردان بَری بللی اوْلمایان بیر دوُرومدا قوْیموشدوم.

میس هاننانین انقلابا قارشیْ داورانیْشی دا آیدیْن دگیلدی. منجه، آمریکالی قیْز روس لارین و انگلیس لرین استیلاسیْنا قارشیْ آمریکا باخیْشینا نفرت بسله‌سه‌ ده مساله ایران-آمریکا منافع-ی مساله‌سینه گلدیکده، اوْنون یئنه ده بیر مستملکه و کاپیتالیست بیر عنصر اوْلاراق قالاجاغی گؤزله‌نیله بیلردی.

من اوْنون گئرچک بیر انقلابچی اوْلدوغونو بیلسه ایدیم، هئچ ده چتینلیک چکمز ایدیم، اۆره‌گیمده‌کی لری اوْنا آچار، حیاتیمین باشقا بیریسی ایله دوْلاشیْق دۆشدۆگۆنۆ اوْنا سؤیلردیم. اوْ دا بیر انقلابچی کیمی منی دینلر، باشقاسینین حیات یوْللاریندا اوْلماقدان واز کئچردی، حیات یوْلداشلیْغیندان محروم اوْلسادا مسلک، عقیده یوْلداشلیْغینی دوام ائتدیرَردی.

لاکن ائله بیر قیْزین، ائله بیر گؤزه‌لین، سئوگینی مسلک یوْلداشلیْغی ایله عوض ائدن بیر قیْزین، میس هاننا اوْلدوغونا اینانا بیلمه‌ییردی.

دۆشۆنجه‌لردن بیر شئی چیْخمایاجاق ایدی. بوُرادا مساله‌نین حل-ینی گله‌جه‌گین الینه وئرمک لازم ایدی.

باشقا طرفدن اوْنون ائتدیگی تکلیف بیزیم اؤنملی بیر احتیاجیمیزی قارشیْلایاجاقدیر. حسن آغا و تۆتۆنچۆ اوْغلونو اوْنلارین پایان کندینده‌کی ایشلرینه دۆزلتدیکدن سوْنرا الینده عاجز قالدیْغیمیز سلاحلاری دا تبریزدن اوْرا داشیْدا بیلردیک.

چای ایچدیک. آخشام یئمه‌گینه قدر بیر چوْخ مساله‌لردن دانیْشدیق. دانیْشیغیمیزین تملی روس لارین آزربایجانداکی حرکت‌لری تشکیل ائدیردی.

« اوْنلار آمریکالی‌لارا دا خوْش گلمیرلر .» دئیه میس هاننا روس لار حقینده فکرینی آنلاتماغا باشلادی.

« قابادیْرلار، یئرلی دوُروملاری دۆشۆنمۆرلر، نه اۆچۆن گلدیکلرینی گیزله‌دیرلر »-و بیر قدر دۆشۆندۆکدن سوْنرا « هتل-ه گلمک سیزین اۆچۆن چتین دگیل کی؟ » دئیه سوْروشدو.

« بوُنو نه اۆچۆن سوْروشدونوز ؟ »

« اوْنو دئمک ایسته‌ییرم کی بوُرا گلمک چتین اوْلسا باشقا بیر ائو توُتا بیله‌رم. »

« سیزه هانسی بیری ال وئریشلی ایسه اوْنو سئچمه‌لی‌سینیز. »