کؤچورن: فرخ جرایدی

" مقصدین نه‌دیر؟ " دئیه سوروشدوم.

" گزمه‌یه گئدک. "

تهمینه خانیم:

" گئتسه‌نیزده ائوه تئز قاییدین، گئجه دیر. "دئدی.

"اوزاق گئتمه‌یه‌جه‌ییک، یا سیزه گئدیب قیزلاری گؤره‌جه‌ییک، یا دا یولداشین تَزه ائوینی گؤرمه‌یه گئده‌جه‌یم. " دئیه نینا اونو آرخایین ائتدی.

دیشاری چیخدیق. تهمینه خانیمین ائوی یولوموزون اۆستونده ایدی. ایچه‌ری گیردیک. نینا قیزلارا و گلین لری نازنین خانیما قاییدیب:

" تئز گئیینین، قوناق گئدیریک. " دئدی.

" هارا؟ " دئیه نازنین خانیم سوروشدو.

" یولداشیمین تزه ائوینه. بیز اورانی گؤرمه‌میشیک، او بیزی قوناق چاغیرمیشدیر. "

قیزلار و گلین هئچ بیر سؤز دئمه‌دن گئتدیلر. حسن آغا دا بیزیمله یول بیر اولدو. یول اوُزونو من دۆشونوردوم:

" ائوده هر شئی ممکن ایدی، لاکن ائویمه ایلک دفعه گلن قیزلارا و گلینیمیزه بیر هدیه وئرمک لازم‌دیر. "

حیاطا گیررکن حسینعلی عمی بیزی قارشیلاییب:

" آی بالا هاردا قالدین؟ "دئیه مندن چوخ نگران قالدیغینی بیلدیردی.

" گئدندن دئمیرسن کی، هارا گئدیرم، آغا گیلدن ده دؤرد دفعه گلیب سوروشوبلار."

حسینعلی یانیمداکی تبریز قادینلارینا بنزه‌مه‌ین دؤرد نفر قادینی گؤروب شاشیردی، او گاه منه، گاه اونلارا باخماغا باشلادی.

حسینعلی عمی‌نین آروادی سریه خالا دا بورادا ایمیش، او دا ایره‌لی گلیب قیزلاری گؤزدن کئچیردی و یاواشجا اَرینه:

" اوخشویورلاردا، اوخشامیرلاردا، ساچلاری قارادیر ماتوشقایا اوخشامیرلار. " دئدی.

حسینعلی عمی یاواشجا اونا آجیقلانیب:

" آروادلیغینا سالما، سنین نه بورجون واردیر. " دئیه گۆللری سولاماغا باشلادی.

نینا و قیزلار ایلک حیاطی گزدیلر. نینا حیاطی داها ماراقلا گؤزدن کئچیریردی.

اوتاقلاری دا گزدیک. سونرا حوضون اؤنونده‌کی ماسانین چئوره‌سینده اوتوردوق.

بوگۆن باغچا سوواریلدیغیندان حوضا چوخ سو بوراخیلمیشدی، فواره شدّت‌له ووروردو. حسینعلی یئنه ده سریه خالا ایله دانیشیر و دالاشیردی. یئنه ده دانیشیق قیزلارین روسلوغو اۆزه‌رینده گئدیردی.

بیراز کئچدیکدن سونرا مشدی کاظم آغانین قوللوقچوسو گلیب منی سوروشدو. حسینعلی عمی اونا:

" آغا گلیب دیر، قوناقلاری دا واردیر. "دئیه جواب وئریب یولا سالدی.

نینانین ائو و باغچا چوخ خوشونا گلدی. اودور کی " منیم اۆچون ده بئله بیر حیاط تاپمالی ایدین! " دئدی.

" دگیشدیرمک ممکن‌دور " دئدیکده، فکرینی دگیشیب اعتراض ائتدی:

" منه بئله حیاط یاراماز. حوض واردیر، مجید اۆچون قورخولودور. " دئدی.

مشدی کاظم آغا گلدی. حیاطا گیرمک اۆچون اجازه ایسته‌دی، من اؤزوم اونو قارشیلاییب ماسانین یانینا گتیردیم، قیزلارا و گلینه قاییدیب:

" بو آدام منیم یاخین دوستوم مشدی کاظم آغا دیر. " دئدیم.

سونرا ماسا باشیندا اوتورانلاری بیر-بیر مشدی کاظم آغایا تانیش ائتدیم.

" بو منیم یولداشیم و حقینده سیزه سؤیله‌دیگیم نینا خانیم دیر. بونلاردا منیم باجیلاریم صنوبر و تحفه خانیملاردیر، بو دا بیزیم محترم گلینیمیز نازنین خانیم دیر. "

مشدی کاظم آغا گؤزلرینی اینانمیردی. او خیالینا گتیره بیلمه‌دیگی شئیی حقیقتده گؤروردو. تبریزلی قیزلاری باش آچیق، آوروپالی قیافه‌سینده اولاراق کیشی لرله بیر ماسا باشیندا اوتورموشدو. هله قیزلارین نینا ایله روسجا دانیشمالاری مشدی کاظم آغانی تمامیله حیرته بوراخمیشدی. مشدی کاظم آغا گؤردوکلریندن چوخ ممنون ایدی. چۆنکو او دا تبریزده قادین آچیقلیغینین بیرینجی طرفدارلاریندان ایدی.