کؤچورن: فرخ جرایدی

داها سونرا سئچگی‌لر باشلانماقدادیر. مرکزده روس علیه‌دار لاری گۆنو-گۆندن چوخالیر، روسیه سیاستی مغلوب اولور، اونون ایران توپراغینا کئچمه‌سی ضیالی طبقه‌نین نفرتینه سبب اولموشدور، بونون اۆچون‌ده روسیه حکومتی هله اؤز یئرینی برکیتمه‌میش مشروطه‌لی حکومتی یئنی تهلکه قارشیسیندا قویماغا چالیشماق ایسته‌ییر. بو پلان ایران-ی تمامیله روسیه-انگلیس نفوذونا تسلیم ائتمک پلانی‌دیر. "

" بس نئجه اولاجاقدیر؟ " دئیه نینا سوروشدو.

" محمدعلی‌نی ایراندان رذیل بیر حالتده قوواجاقلار، او سفریندن هئچ بیر شئی قازانمایاجاقدیر. "

مجید بیزدن آیریلیب گئتمیشدیر. هله دانیشیغیمیزی بیتیرمه‌دن مجید ایله حسینعلی عمی‌نین چکیشدیگینی ائشیتدیک. مجید یئنه‌ده حوضدا‌کی بالیقلاردان بیریسینی ایسته‌ییردی، حسینعلی عمی ایسه وئرمک ایسته‌میردی.

" سن یئنه‌ده حیوانی اؤلدوروب پیشیگه وئره‌جکسن. "دئییردی.

سریه خالا ارینی مذمّت ائدیر و اوشاغی راضی سالماسینی تاکید ائدیردی.

بیز دانیشیغیمیزی بورادا قورتارماغا مجبور اولدوق. شام وقتی ایدی. مشدی کاظم آغا دا گلمیشدی. شام-ی بیر یئرده یئدیک. دانیشیغیمیز گئجه ساعت ۱۲یه قدر اوُزاندی. ۱۲دن سونرا نینانی و تهمینه خانیمی ائوینه آپارماق اۆچون مشدی کاظم آغا ایله بیرلیکده ائودن چیخدیق.