کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

کؤچور‌ن آینوره مممدووا

اولی بورادا

بو چوخ آنی بیر حس ایدی. آغرینی دا حس ائتمه میشدی. اونا یقین اودو کی، قاینی یئکه نیدون بو گئجه خنجرینی چوپور داشلا ایتیلییر، اونون هیسینی، پاسینی تمیزلییر، اووخالاییر. خنجرین آغزیندا آوخلانان کیچیک پولاد قلپه لر یئره توکولمور، کیچیک قامقااالاق کیمی تییه ده ایلیشیب قالیر. اری تئز-تئز خنجری ایتیلییردی، صوس و صبرله او، غلافی سیلیب، پولادی پاریلداتمایانا قدر ال چکمزدی. قاینی ایسه خنجرینی، قیلینجینی آز-آززز بئلینه تاخاردی.

ایلخی، داوار اوتاراردی، تاتارینی، چوماغی قیلینج و خنجردن داها چوخ ایشله دردی.

یئکه نیدون میندییی توکلو آتدان ایکی دفعه هوندور، یالان اولماسین، آلاچیق ائنلییینده ایدی. طایفالار آراسی داعوالارا گئدنده کناردا دایانیب، دشمنین اوره یینده خوف، قورخو، واهمه یارادیردی. بلکه ده بوتون طایفالار ایچریسینده بویجا اونون کیمی هوندور چییینجه ائنلیسی یوخ ایدی.

یقین کی، ایندی اوخنجری اونا، امجه یی نین اوستوندن یئدیریپ، بیر ضربه ایله قتله یئتیرمک اوچون مشق ائله ییر. سحره یاخین کنیزلر آلاچیغا گلیب، کورپه لری آپاراجاقلار. لاپ کیچییینین دوداقلاریندان آنا سودو دامجیلایا- دامجیلایا گئده جک. بلکه ده هئچ یوخودان دا اویانمایاجاق...

کنیزلردن سونرا یئکه نیدون ایکی قات اولوب، اوغرو کیمی آلاچیغا گیره جک و یاخینلاشیب تئز-تله سیک خنجرینی چاپاجاقدیر. آلان- قوا اولومو نئجه قارشیلایاجاغی باره ده فیکیرلشمیشدی. او، هئچ گوزلرینی ده آچماق فیکرینده دئییلدی. ساغ بویرو اوسته اوزانمیشدی. یورغانی بیرآز آشاغی چکمیشدی. دوشونون اوستونه بیر طول آتمیشدی. یقین کی، سحرین آلاتورانیندا بو قیرمیزی تولون آلتیندا اونون دوشونون چییه لک دویمه سی گورونمه یه جکدی. بئله جه ده اوزانیب، اولومونو گوزله ییردی.

سحره یایاخین ایتلر اولاشدی. هارداسا خوروز بانلادی. یاخینداکی ایلخیدا آیغیرین کیشنرتیسی، مادیانلارین دیرناق سسلری ائشیدیلدی. بیر آز آرالیدا سوروده کی قویونلا اوسکوروشدو. اما اونون اولوموندن خبر وئره جک شبهه لی و تهلکه لی بیر شئی یوخ ایدی. تزه دن کورپه سینی سول دوشونه سالدی. ائله بیل کی، سوسدورولاجاق اوره یی نین چیرپینتیلارینی اوزوندن سونرا یاشایاجاق، کیم بیلیر، طالعیی نئجه اولاجاق کورپه سینی زورلا ائشیتدیرمک ایسته ییردی. هئچ اولماسا، بویوینده هردن- بیر آناسینین ایینی، عطرینی یا دا سالسین و اونون اوره یی نین دویونتولرینی ائشیتدییینی بیر قادر قوه نین کومه یی ایله دویسون.

او گئجه ایله دوروب، کورپه لری قوجاقیندا آتاسینین طایفا یوردونا قاچا بیلردی. اونون ایندی یه دک میندییی آتلارر یئل کیمی اوچوردو. اما ائلین قانونلاری واردی. آتا اوجاقیندان ار ائوینه گئتدینسه، اورادان بیرجه یولون وار-تورپاق آلتینا، قبره- قورو- قانا. گئتسه، قاچسا، اولومدن بتر بدناملیق گلیردی اونون نسلیلینه. جوان واختیندا دا دول قالمیشدی. طایفانین یازیلمامیش قانونلارینا گوره او حکما آرینین یانینا گئتمه مه لییدی. حکما!...

داوامی وار...