کولت. آذ آذربایجانین گؤرکه‌م‌لی یازی‌چی‌سی فرمان کریمزادنین " تبریز ناموسو" آدلی تاریخی رومانینی تقدیم ائدیر:

اولی بورادا

کؤچور‌ن آینوره مممدووا

یئسوگئی دیرسکلندییی دری اوزلو یاستیغی کنارا ایته لییب، دیک قالخدی:

دئ گوروم، اوغلاندیمی؟

اوغلاندی، بویوک یئسوگئی.

یئسوگئی شیر کیمی اونون اوستونه آتیلدی، ساچی آرخاسینجا یئللندی.

نوکر سنی قویدوم یوزباشی.

باهادیر!

نه دی! داها نه وار؟

نوکر آشاغی اییلیب، باش ایمک ایسته دی، اما یئسوگئی اونون یاخاسیندان یاپیشیب قالدیردی.

اییلمه، منه دئ گوروم، نه اولوب؟ او اوشاغا بیر شئی اولوبسا، سنین بئلینی سیندیراجاغام.

باهادیر، قوربان اولوم، اوشاق سلامتدیر، ماماچالار دئدیلر کی، ساغ الینی یومروق کیمی سیخیب، آچمیر.

نئجه آچمیر؟

آچمیر، اونلار دا قورخورلار زورلا آچماغا. دئدیلر شامانا دئمک لازیمدیر، دعا اوخوسون.

یئسوگئیین کئفی لاپ آچیلدی:

اوغول منیمدیرسه، اونون بارماقلارینی هئچ کیم آچا بیلمز. او، ایندیدن اولوسدا حاکمیتینین سکانیندان یاپیشیب، اونو هئچ کسه وئرمیر. تئز اول، شامانی یانیما چاغیر، یوزباشی. اوز یوز آتلینلا منیم اوغلومون کئشییینی چکه جکسن.

اولدو! گوزلریمی ایتیره رم، اما یوممارام.

تئز اول!

چادیرا گیرنه قدر نوکر اولان بو آدام، اوردان چیخاندا یوزباشی ایدی.

شامان خیلی دعالار اوخودو، سونرا دئدی:

یئسوگئی باهادیر، بو نادیر بیر علامتدیر کی، اوشاغین بویوک گله جه ییندن خبر وئریر، او، خوشبخت اولدوزون نوروندا دوغولوب.
کورپه نینت اوزونو گورمه لییم. اونون یومولموش اووجوندانه سه بیر حکمت وار. کورپه جیک اووجونو عادی آداملارا یوخ، یالنیز آتاسینا و شامانا آچاجاق. اونلار آغ چادیرین اونونه گلدیلر.

باهادیر و شامانین گلدییینی ایچری خبر وئردیلر. یئسوگئی قاباقدا، شامان ایسه آرخادا چادیرا گیردیلر. شامانین دری پاپاغینین آلتیندان پیرتلاشیق ساچلاری کوره یینه توکولموشدو. گودکجه سینین اتکلری ده، یویولوب دارانمیش ساچلاری کیمی، داغینیق و تیکه- پارچا ایدی.
چادیر ایکی بولمه یه آیریلمیشدی، ماماچالار قایناشان گوزده تزه جه آزاد اولوب، یورغانین آلتیندا اوزانیب، ارینی گورن کیمی گولومسه ین اولون اکه چوخ خوشبخت ایدی. اوشاغی چیندن گتیریلن بزکلی گوموش بئشییه قویموشدولار.

باهادیر هایقیردی:

خاتونوم، سن کی، منه اوغول بخش ائله دین، سنی قیزیل آلاچیقدا ساخلایاجاغام!

اوشاغی توتان ماماچا تئز اسکییه بوکولموش کورپه نی گتیریب آتاسینا گوستردی.

نئجه ده آغیردیر، ایگید!

او سوزلرینی دئسه ده، گوزلری اوشاغین صیففتیندن قاباق ساغ الینه دیکیلدی. دوغوردان دا، ساق الی یومروق کیمی دویونلو ایدی، سول الینین بارماقلاری ایسه هورومچک آیاقلاری کیمی ترپه نیردی.
داوامی وار