نئچه ایل‌دیر یونئسکو وریندن فئورییه آیینین ایرمی بیری دونیا آنا دیللری گونو آدلانیب دیر.

دونیادا ساییسی یاخلاشیق آلتی مینه چاتان دیل‌لردن اوچ مینی آز-چوخ آرادان گئتمک آشاماسیندادیرلار و اگر هر دیلی او دیلده دانیشانلارین دونیا گؤروشونو و کولتورونو گلن قوشاقلارا کئچیردن ان اؤنملی آراج تانیساق، بو دونیا اوزَرینده کولتورلرین بیر چوخونون محو اولماسی دئمکدیر.

بیز ایسه آزربایجان تورک‌لری اولاراق اؤز آنا دیلیمیزین قوروماق گؤره‌وینی داشیماقداییق، بئله لیکله ده بئله فورصت‌لری الده ائدیب بو اؤزل گون‌لری دَیَرلندیریب چوخ قولای و اوجوز یول‌لارلا بؤیوک ایشلر گؤره بیلریک.

ایندیکی چاغدا هامیمیز مجازی دونیایا قاتیلماقداییق، لاپ کیچیک بیر ایکی یوز باش اویه‌سی اولان قوروپو ساناق، هر اویه ساده‌جه بئش مین تومن یاردیم ائتسه، بیر میلیون تومن پول ییغیشار. بیر میلیون تومن‌له، ان آزیندان ایکی یوز دنه اوشاق ادبییاتی ساحه‌سین ده کیتاب آلماق اولار و بو کیتاب‌لاری هر شهرین قالابالیق آلانلارینین بیرین ده اوشاقلار آراسین دا یاییملاماق اولار.

ایزدیحاملی آلان دئمکدن آماجیم حرکتین گؤزه گلمه یی و شهرده رئکلام کیمی، مجازی دونیادا ایسه هشتگ قازانیب دیلدن دیله گزمه‌یی دیر.
بو ایش منجه نئچه یؤندن چوخ یارارلی اولا بیلر:

۱.اوشاق ادبیاتی ساحه سینده چالیشان یولداشلاریمیز، یازارلار و شاعیرلر کیتاب‌لارینین ساتیلماغیندان چوخ ماراقلانیب و داهادا آرتیق چالیشماغا آلقیشلاناجاقلار.

بیلدییینیز کیمی، بیزیم چاغداش ادبیاتیمیز اوشاقلار ساحه‌سینده یوخسوندور و بو یؤن ده قات_قات آرتیق ایشله‌مه‌ییمیز گرکیر.

۲.سایین ناشیرلر بیر یئرده، یوخاری ساییدا کیتاب ساتماقدان چوخ ممنون قالیب کیتابلارینی نئچه فاییز اندیریمله وئره‌جکلر و بو آلاندا داهادا گوجلو ایشله‌مه‌یه ماراقلاناجاقلار.

چاغیمیزدا یاییم ائوی دولاندیران وطنداشلاریمیز، چوخلو سورونلارلا باش_باشا دیرلار، توپلوموموزدا ائکونومیک دورومون گرگینلییی، گئنه‌لده اوخوماغا ماراقسیزلیق و اؤزه‌للیکله ده آنا دیلیمیزده یازیلان و ایشیق اوزو گؤرن بیتیک‌لرین چوخ چتین ساتیلماسی(ایرشاد باخانلیغیندان تؤره نن سیخینتیلار قیراق دا دورسون)، بو سورونلارین بیر سیراسیدیر.

۳.بو حرکتین ان اؤنملی یاراری اؤز توپلوموموزا و اوشاقلاریمیزا قاییدیر.

اوشاقلار هدیه آلماغی چوخ سئورلر، بونو هامیمیز بیلیریک، اوسته‌لیک ائله بیر هدیه کی بلکه هئچ بو گونه دک تایی او اوشاغین الینه چاتماییبدیر (تورکجه کیتاب).

بیر اوشاغی آناق کی آتا آناسی ایله قالدیریم دا آتدیملاماقدا، بیر گولر اوزلو گنج قیز یا اوغلان، اؤنونده دیزه اوتوروب و اونون الینه بیر کیتاب وئریر. او اوشاق بو حرکتله اؤنملی اولماق حیسسی یاشایاجاق، بو اوزدن ده ماراقلا کیتابی قبوللانیب و کسین لیکله اونو اوخوماغا چالیشاجاق. اوسته لیک اؤز یاشیت یولداشلاری ایله ده بو قونویو بیر هیجانلی اولای کیمی پایلاشیب، کتابی اونلارا گؤستره جک، اونلار دا اوشاقلیق عالمینده ذؤوق ائدیب کیتاب ایسته یه جکلر حتی آتا آنالارینا کیتاب آلدیرماغا دیره‌نه‌جک لر و بو داها دا آرتیق کتاب اوخوماغا ندن اولاجاق.

۴.تورکجه ده ده یازیب اوخوماق اولارمی مگر؟

زوموزو آلداتماغا قالخماساق اگر بئله بیر سورو هله ده بیزیم توپلوموموزدا سورولماقدادیر، بو بیر دانیلماز گئرچکدیر.

بورادا دارتیشیلان حرکت، کتابی آلان اوشاغین آتا آنا سین نئجه ده ائتگیله یه بیلر بیر دوشونسک.

بلکه هئچ عؤمرونده تورکجه کیتاب ساتان بیر توکانین اؤنونده آیاق دا ساخلاماییبدیر آما جاندان شیرین کیچیجیک اوغلو یا قیزی بونو ایسته سه، آختاریب تاپاجاق و بلکه اؤزونه ده بیر کیتاب آلدی.

بو یازی بیر اؤنری اولاراق دیلداشلاریمیزا سونولور و بیر تئوریدیر، گئرچه یه چئوریلمه‌یی ده ایش آپاراجاق آما منجه هر یوز کیتاب آلان اوشاقدان اون نفری، بو مقاله ده گلن تئپگینی گؤستریرسه، امه‌ییمیز هئچ ده بوشونا گئتمیش اولمایاجاق.