آنا صحیفه کولت |
گونلرین بیر گونو کوراوغلونون آشیغی آشیق جونون ارضرومدا جعفرپاشانین مجلیسینده اوخویوردو، جعفرپاشانین تئللی خانیم آدلی بیر گؤزل قیزی واریدی،آتاسینین مجلیسینده آشیق اولدوغونو بیلیب آتاسینین یانینا بیر آدام گؤندهریب آشیق جونونون اونون مجلیسینده اوخوماسینا ایذین ایسته سین،جعفرپاشا ایذین وئريب آشیق جونون قالخیب تئللی خانیمین مجلیسینه گئتدی، تئللى خانيمين يانيندا قيرخ اينجه قيز ايلشميشدي،آشیق جونونو گؤروب دئدی:
آشیق هارالیسان آدین ندی؟
آشیق جونون دئیيب:
_آی خانین چنلی بئلليیم،،آدیم آشیق جونوندور. تئللى خانيم چنلى بئلين آدين ائشيدميشدي،،كوراوغلونون قير آتينين تعريفى قولاغينا يئتيشميشدي ،دئدى:
_آی آشیق جونون چنلی بئل نئجه يئردي كی اورانین آتی دلی؟ ایگیدی دلی؟ آشیغی دلی؟
جنلی بئلده قوچ كوراوغلو تانيییرسانمي؟
آشيق دئدى:
بلى چوخ ياخشى تانيییرام.
تئللی خانیم دئدی:
پس کوراوغلودان اوخو بیر آز قولاق آساق.
تئللی خانیمین جوابیندا گؤرک آشیق جونون نه دئیير:
ايلشميشدي چنلى بئلين ائلينده
دیيل ايشلرينده ناشى كوراوغلو
ميصري قیلینج حاماييلدى بئلينده
گئیر هر واخت آل قوماشی کوراوغلو
بیر هئی دئسه آغیر توپلار باسیلار
قانچیر عادان قاتلی باشلار آسیلار
بیر ایچگیده یئتمیش قوزو کسیللر
وئرير آشی آغ لاواشی کوراوغلو
بیر جیداسی واردی باشی قوشا پر
میدانا گیرنده اسرهمیش بیر نر
پاشالار تیترهییر،شاهلار توک تؤکر
یئتمیش یئددی دلی باشی کوراوغلو.
آشیق جونون گلیب بوردا قالماسا
شیرین جانین عشق اودونا سالماسا
تئللی خانم کیمی گؤزل آلماسا
چکر، ییخار داغی داشی کوراوغلو
تئللی خانم آشیق جونوندان کوراوغلونون تعریفینی ائشیتدی، اول اونا خلعت وئردی، سونرا الینه قلم آلیب کوراوغلویا بیر نامه یازدی:
«کوراوغلو سنین ایگیدلیک تعریفینی ائشیتدیم.گلیب منی آپاراسان بو هونر سنه حلال اولسون، آپارا بیلمه سن،کیشیلیگینی یئره قوی، باشیوا یایلیق اؤرت!»
آشیق جونون نامه نی گؤتوروب چنلی بئله یولا دوشدو. بیر نئچه گوندن سونرا گلیب چنلی بئله چاتدی. آشیق جونون او زامان چنلی بئله چاتدی کی کوراوغلو کئف مجلیسی قورموشدو. آشیق جونون تئللی خانمین نامه سین کوراوغلويا وئريب احوالاتيدا ديل اوجو نقل ائله دی. کوراوغلو احوالاتی بیلیب بوینونا دئیین دوشدویونو آنلادی. دلیلرین هامیسی کئف مجلسينده كوراوغلونون يانيندايديرلار،كوراوغلو دليلرى باشسيز قويوب ارضروما،تئللى خانمى گتیرمهیه گئده،کئف اوسته ايدى بير بارداق شراب دولدوروب الينه آلیب اؤزونو دليلره دوتوب دئدی:
_كيم كوراوغلونون خاطیرين ايستهیيرى،كيم باشينين قدريني بيلير آلسين شرابي ايچسين،گئدسين ارضرومدان جعفرپاشانین قیزی تئللى خانمي گتیرسین.
دلیلردن سس اولمادی،کوراوغلو بیر ده تکلیف ائله دی،یئنه دلیلردن سس اولمادی،کوراوغلو اوچونجو دفعه تکلیف ائیلهینده دميرچى اوغلو دلى حسن آيريليب گلیب کوراوغلونون الیندن شرابی آلیب ایچیپ دئدی:
قوچ کوراوغلو ایذین وئرسن من گئديم ارضرومدان تئللى خانمى گتیریم.دمیرچی اوغلو بو قدر کی کوراوغلونون یانیندایدی،هله اوزاق سفره گئدمه ميشدى،يانى بركه بوشا دوشمه ميشدى.
كوراوغلو دئییب:
اوغول ایذینلر گئت یاراقلان حاضیرلان.
دمیرچی اوغلو گئتدی، ایکی قیلینج، ایکی قالخان،ایکی جدا، ایکی گورز،ایکی توبپوز گؤتوردو، کوراوغلونون یانینا قاییدیب. کوراوغلو گؤروب دمیرچی اوغلو او قدر یاراق گؤتوروب کی آلتیندان ترپنه بیلمهییر،دئییب :
دمیرچی اوغلو ارضروما واراندا
ارضروم دئییلن گوله نیسبتدیر
چوخ یاراق گؤتورمک باشا بلادیر
قیلینج حماییلدیر بئله نیسبتدیر.
سؤیله، سؤزلریمی ائیله دیل ازبر
شیرین نصیحتیم قیل سینه دفتر
ایگیته لازیمدی گورز، قالخان ششپر
جدا بیر بوینوزلی کهله نیسبتدیر.
کوراوغلو تک، دوشمنلری سسله مک
های دئینده یاغی اوسته قصد دئمک
آرپا وئریب جاندان بتر بسله مک
عرب آت دئدییین یئله نیسبتدیر.
دمیرچی اوغلو ائله بیلیردی کی ایگیدین ایکی الی وار،هر الینه بیر یاراق گؤتورمه لیدیر.کوراوغلونون بو سؤزوندن سونرا دمیرچی اوغلو یاراقلارین هره سیندن بیرین گؤتوروب قالانین آتیب.
کؤراؤغلو بو دفعه اونا دئیب:
اوغلوم آتلارین هانسبن مینمک ایستیرسن مین گئت،
دمیرچی اوغلو گئدیب تؤیله دن عرب آتین چکیب یَهرله ییب ،مینیب کوراوغلونین قاباغینا جیخاندا عرب آتا بیر قامچی ووروب . کوراوغلو اونون بو ایشینه دئدی:
سحردن میدان باشینا
عرب آت جارخاچی گرك
عرب آتين نه دور سوجو
بير ايگیت مینیچی گرك
ايگیدین ایگیت دستینه
گیرنده آبدال پوستونه
یولداش یولداشین اوستونه
دارگونده دونوجی گرك
كوراوغلونون سؤزو اوخدور
پاشالاردان قورخوم یوخدور
بودونیادا ایگیت چوخدور
ایگیتده نر گوجو گرك
تاریخ
2020.04.08 / 20:44
|
مولف
Axar.az
|