استاد عیسا خان ۱۲۹۵ گونش ایلی باکی شهرینده آنادان اولموش. سراب‌ین شیروانجیق کندیندن اولان آتاسی، اسماعیل، بیر چوخ وطنداش‌لاری کیمی، کئچیم ساغلاماق (تامین معاش) اوچون، آیریجا او گون‌لرین فئودال جامعه‌‌سینین ظولوم‌کار زنجیرلریندن قورتولسون دئیه باکی‌یا گئدیر و اوردا ائوله‌نیر. عیساخان اونلارین تکجه اؤولادلاری ایدی.

عیساخان یئنی‌یئتمه چاغیندان، علم‌ین کناریندا موسیقی درس‌لری ده آلیر. او، ۱۵ یاشیندا کلوپ فیلوتو کونسئرواتوارینا (کلوپپ فیلوتوو کونسئرواتواری) گیردی، تارچالما مرحله‌لرینی کامیل بیتیردیکدن سونرا دوکتور لیانسیان-ین ۳۵ نفرلیک اورکئستری‌نین جمعینه قوشولدو.

او، اینگیلیز و روس دیل‌لرینه ده کامیل تسلوطو وار ایدی. عیساخان‌ین پارلاق یئته‌نه‌یی اونون اورکئسترادا گؤزه‌گلیم رول اویاندیغینا سبب اولاراق اونون بیر سولیست اولاراق تانینماسینی ساغلاییر.

اوستاد عیساخان ۱۳۱۵ گونش ایلینده آتاسی و سئودییی تار ایله، آرازین او تاییندان سورولن ایران‌لی مهاجیرلرله بیرلیکده گلیب سراب شهرینده ساکین اولور. عیساخان سراب شهرینده، سرابین کندلرین اولان عسگرآباد کندلیسی اسدالله قاوالچی ایله بیرلیکده ایفا ائدیییی باشاریلی اجرالار هر زامان جماعاتین رغبت وماراغینی قازانیر. اونون ایستی سسی و اویغون مئلودی‌لری همراه ائتمه‌سی ائشیدن‌لری والئه ائدیر. جماعاتی طرفیندن اوستادا یاغادیریلان آلقیشلار و خوش قارشیلامالار اونون جماعاتا و جماعاتلا اولماغا ذؤوقونو، عشقینی داها دا آرتیریر.

۱۳۵۳ گونش ایلینده اوستاد معده خیته‌لییینه دوچار اولور. اونون خسته‌لییی بوتون دوستلار، تانیش‌لار، حتتا بوتون آذربایجانی اوزوب، غمگین ائدیر. آقای محققی‌دن بئله نقل اولور کی، بیر هفته اؤلومونه قالا، اونون گؤروشونه گئدیر. اوستار یاتاق ایچیندن تارینی ایستیر. تارینی آلیب بیات شیراز دستگاهیندا چالاندان سونرا «آیریلیق» ماهنیسینی چالیر. اورداکی‌لاردان سوروشورلار "اوستاد نیه «آیریلیق»ی اوخویورسان؟ اوستاد دئییر:

-بونا گؤره کی، سیزلردن آیریلیرام!

اوستادین بو سؤزوندن اوردا اولانلار ائتکی‌لنیب اوزولورلر... نئچه گون سونرا اوستاد عیساخان همیشه‌لیک جماعاتی و سراب تورپاغیندان ویداع‌لاشیر. اوستاد سراب شهرینده تورپاغا وئریلیر. اونون صنعتچی‌لییینه سایغی و سئوگی نیشانه‌سی اولاراق مزاری‌نین اوزه‌رینده چنگ شکلی قازیلیب. اوستاد عیساخان عؤمرونو آذربایجان موسیقیسی‌نین گلیشمه‌سی و چیچک‌لنمه‌سی اوغروندا توکتدی، نتیجه‌سینی ایسه، شاگیرلرینده گؤردو جماعات.