بو گون ۱۹۴۱-جی ایل یانوارین ۳-ده اردبیل‌ده دونیایا گلن و ۵ مای ۲۰۱۴-جو ایلده دونیاسینی دییشن گونئی آذربایجانین تانینمیش شاعری صالح آسیم کفاشین (آسیم اردبیلی) دوغوم گونودور.

Axar.az خبر وئریر کی، ایلک و اورتا تحصیلینی اردبیل شهرین‌ده آلان شاعر تهران اونیورسیتتینین "اینگیلیس دیلی و ادبیاتی" بؤلمه‌سینی بیتیردیکدن سونرا اردبیله گئری قاییدیب و اینگیلیس دیلی معلمی کیمی فعالیت گؤستریب.

۱۹۷۹-جو ایلده‌ن ادبی یارادیجیلیغا باشلایان آسیم اردبیلی اثرلرینین چوخونو تورکجه یازیب.

اونون مختلیف ایللرده آذربایجان دیلینده یازدیغی "قانلی سحر"، "یارالی دورنا"، "نیسگیل‌لی گولوشلر"، "سؤزلو گؤزلر"، "ال مندن اتک سندن"، "کؤزلو سؤزلر"، "قانلی قیام" آدلی شuر کیتابلاری بوراخیلیب.

آسیم اردبیلی آذربایجان‌لیلار و ادبیات آداملاری آراسین‌دا داها چوخ "جهنم‌ده بیتن گول" پویماسی ایله تانینیب.

اییوب آدلی اردبیل‌لی اوغلان، حربی خیدمتینی «معلم عسگر» اولاراق کئچیرمک اوچون قزوین ایالتینین «الموت» بؤلگه‌سینده‌کی «قازورخان» کندینه گؤندریلیر. ایوب بو کندده‌کی سورونون شاگیرد اولدوغو بیر صینیف‌ده معلم اولور. سورو گنج معلمه عاشیق اولور و بو، سورونون تخمیناً یاریم عصرلیک آجیلی حیات طرزی یاشاماسی ایله نتیجه‌لنیر.

اییوبون حربی خیدمتی باشا چاتدیق‌دان سونرا سورویه اونونلا ائولنجیینی وعد ائدیر. آنجاق عسگرلیک دؤورو باشا چاتدیقدان سونرا او، دوغما شهرینه قاییدیر.

بیر نئچه آی مکتوبلاشاندان سونرا ایوب سورونون مکتوبلارینا جواب وئرمیر.

ایوبا عاشیق اولان سورو، خبرسیزلییه دؤزمور و ایوبو تاپماق اومیدی ایله ائوینی و عائله‌سینی ترک ائدیر، اردبیله یولا دوشور. اردبیل‌ده سوراقلاشاراق ایوبون ائوینه گلیر و اونون عائله قوردوغونو اؤیرنیر.

خیاللاری قیریلان سورو بیر داها قزوینه گئری قاییتمیر و بونونلا دا اونون اردبیل‌ده‌کی آجیناجاقلی حیاتی باشلاییر.

اردبیل‌ده سئوگی سیموولونا چئوریله‌ن سورو، ایوب‌دان گؤردویو پیسلیین قارشیلیغین‌دا اردبیل‌لیلرین قایغی‌سی ایله احاطه اولونور و ۱۴ فورال ۲۰۲۱-جی ایل-ده دونیاسینی دییشیر.

«جهنمده بیتن گول»

فلکین قانلی الین‌دن بیر آتیلمیش یئره ائندی

بیر فلاکت آنانین جان شیره‌سین سودون امدی

بوللو نیسگیل شله‌سی چینینه آلدی

تای-توشون‌دان دالا قالدی، ساری گول میثلی سارالدی...

گونو تک باغری قارالدی،

درد الین‌دن زارا گلدی،

گونو-گوندن قارا گلدی،

خانچوبان‌سیز سئله تاپشیرسین اؤزون

یوردوموزا بیر سارا گلدی.

بیر وفاسیز یار الین‌دن سانا گلمز یارا گلدی

بیر یازیق قیز، جان الین‌دن جانا گلمز، جانا گلدی...

کئچه‌جک‌ده الموت دامنه‌سیندن بورایا درمانا گلدی

بیر آدام‌سیز «سورو» آدلی، علی باغلی، دیلی باغلی!

سورو کیم‌دیر؟

سورو بیر گولدو جهنمده بیتیب‌دیر

سورو بیر دامجی‌دی گؤزدن آخاراق اوزده ایتیب‌دیر.

سورو یول یول‌چوسودور، ایریده یوخ، دوزده ایتیب‌دیر،

سورو بیر مرثییه‌دیر، اوخشایاراق سؤزده ایتیب‌دیر،

او کؤنوللردکی ایتمیشدی ازلدن، اودو گؤزدن ده ایتیب‌دیر.

سورو بیر گؤزلری باغلی، اؤزو داغلی، سؤزو داغلی،

اولوب هاردان هارا باغلی؟ بوشلاییب دوغما دیارین،

اوموب البته یارین‌دان، ال اوزوب هر نه واریندان،

قورخماییب شهریمیزین قیش‌دا آمان‌سیز بورانین‌دان

نه قارین‌دان...

گزیر آواره تاپا یاندیریجی دردینه چاره، تاپا بیلمیر،

چوخ ایستر عشقی باشین‌دان آتا، اما آتا بیلمیر،

اووا باخ اووچو دالینجا قاچیر، اما چاتا بیلمیر.

ایش دؤنوب، لیلی دوشوب چؤللره مجنون سوراغین‌دا،

شیرین الده تیشه داغ پارچالاییر، فرهاد اوتورموش اوتاغین‌دا،

تشنه‌لب قو نئجه گؤر جان وئریر دریا قیراغین‌دا،

وارلیغین سون اثری آز قالیر ایتسین یاناغین‌دا،

سانکی بیر کؤزدو بورونموش کوله وارلیق اوجاغین‌دا،

کؤزریر پیلته کیمین یاغ توکنیب‌دیر چیراغین‌دا،

بوی آتیر رنج باغین‌دا، قوجالیر گنج چاغین‌دا.

بیر آدام‌سیز «سورو» آدلی، علی باغلی، دیلی باغلی!

سورو جان اومما فلک‌دن، فلکین یوخ‌دو وفاسی،

نه قدر یوخ‌دو وفاسی، او قدر چوخ‌دو جفاسی،

کؤهنه رقاصه کیمین هر کسه بیر جوردور اداسی،

او آیاق‌دان دوشنی ایستر آیاقدان سالان اولسون،

او تالانمیشلاری ایستر گونو گوندن تالان اولسون،

او آتیلمیشلاری ایستر هامی‌دان چوخ آتان اولسون،

او ساتیلمیشلاری ایستر قول ائدرکن ساتان اولسون،

نئیله‌مک... قورقو بو جوردور،

فلکین نظمی ازلدن اولوب اظدادینه باغلی،

قاراسیز آغلار اولانماز، دره‌سیز داغلار اولانماز،

اؤلوسوز ساغلار اؤلنمز...

گرک هر بیر گؤزه‌له بیر دنه چیرکین ده یاران‌سین،

بیری ائنسین یئره گؤی‌دن بیری ارشه اوجالان‌سین،

بیری چال‌سین ال-آیاق غم دنیزین‌ده،

بیری ساحل‌ده سئوینج ایله دایان‌سین،

بیری ذلت پالازین باشا چکیب یات‌سا دا، آنجاق

بیرینین بختی اویان‌سین، بیری قویلانسا دا، نعمتلره یئرسیز،

بیری ده قانا بویانسین.

آی آدامسیز سورو آدلی، ساچلارین‌دان دارا باغلی!

نئیله‌مک ایش بئله گلمیش، چور گلن‌ده گوله گلمیش،

فلکین ایری کمانین‌دا اولان اوخ آتیلان‌دا دوزه دیمیش،

دیل‌سیزین باغرینی دلمیش، ایری قالمیش دوز اییلمیش.

اونو خوشلار بو فلک ائل ساراسین سئللر آپارسین،

بولبول حسرت چکرک گول ثمرین یئللر آپارسین،

قیسی چؤللرده قویوب لیلینی محمیللر آپارسین،

خسروو شیرین ایله ال-اله وئرسین، فرهادین قامتین ایسین،

باخاراق چرخ زامان نشعه‌یه گل‌سین، کئفه دولسون،

«سورولار» سول‌سا دا، سولسون

بیری باش یول‌سا دا، یولسون...

سیسقا بیر اولدوز اگر اولماسا اولدوزلار ایچین‌ده،

بو سما ظلمته باتماز،

داش آتان کول باشی قویموش داشینی

اؤزگیه آتماز،

سن یئتیش‌سن هدفه اوندا فلک مقصده چاتماز،

داها افسانه یاراتماز...

سورو، آی باشی بلالی، زامانین قانلی غزالی!

سورو بیر قوش‌دور خزان آیری سالیب‌دیر یوواسین‌دان،

ال اوزوب‌دور آتاسین‌دان،

جوجه‌دیر حیف اولا سود گؤرمه‌ییب اصلا آناسین‌دان،

او زلیخا کیمی یوسف ایین آلمیر لیباسین‌دان،

بونا قاندیر تنفس ائیلییر یار هاواسین‌دان،

درد وئره‌ن درده سالیب، اما خبر یوخ داواسین‌دان،

آغلاییب سیتقایاراق بهره آپارمیر دعاسین‌دان.

او بیر آینادیر رسم چکیب اوستونه زنگار،

اوندا یوخ قودرتی گفتار، اوزو چیرکین دیلی بیمار،

گنج وقتین‌ده دیل آزار،

گؤره‌ سن، کیم‌دی خطاکار؟

گؤره سن کیم‌دی خطاکار؟!