بو گون ماهنیلاری ایله یادداشلاردا درین ایز قویموش، گؤرکملی بسته‌کار، خالق آرتیستی ائلزا ابراهیمووانین آنادان اولماسینین ۸۶-جی ایلدؤنومو تمام اولور.

Kult.az خبر وئریر کی، ائلزا ابراهیمووا ۱۹۳۸-جی ایلده حاجی‌قبول شهرینده آنادان اولوب.

آصف زیناللی آدینا اورتا اختصاص موسیقی مکتبینین بسته‌کارلیق صینفینی، ۱۹۶۴-جو ایلده عزیر حاجیبیوو آدینا آذربایجان دولت کنسرواتورییاسینین بسته‌کارلیق شعبه‌سینی بیتیریب. هله اوشاق یاشلاریندان موسیقییه اولان بؤیوک محبتی والدینلری طرفیندن دیرلندیریلیر و او موسیقی مکتبینه یازیلیر.

ائلزا ابراهیمووا ایلک ماهنی‌سینی ۱۹۶۹-جو ایلده بسته‌لییر. ممد راحیمین سؤزلرینه بسته‌لنمیش "یالان ها دئییل" ماهنی‌سینین ایلک ایفاچی‌سی شوکت علکبرووا اولور. آذربایجان‌دا تانقو ریتمینی استرادایا گتیرن ایلک بسته‌کارلاردان بیری اولان ائلزا ابراهیمووانین رفیق ذکانین سؤزلرینه بسته‌لدیی "قربان وئرردیم" اثری سووئت دؤورونده بدیعی شورا طرفیندن او قدر ده یاخشی قارشیلانمیر. چونکی تانقونون بورژوا آهنگینین سووئت روحونا اویغون گلمدیی بیلدیریلیر. اما سونرادان "قربان وئرردیم"له برابر "سن منه لازیمسان" (سؤز. علی آغا کورچایلی)، "باغچادان کئچمیسه‌ن" (سؤز. ع.علیبیلی) و سایر تانقو ریتمینده یازیلمیش موسیقیلر بسته‌کارین سئویله‌ن ماهنیلاری سیاهی‌سینا قوشولور.

ائلزا ابراهیمووا ۱۹۹۲-جی ایلده آذربایجان رسپوبلیکاسینین امکدار اینجه‌صنعت خادمی، ۲۰۰۸-جی ایلده آذربایجان رسپوبلیکاسینین خالق آرتیستی آدینا لایق گؤرولور.

یارادیجیلیغیندا بیر-بیریندن ماراقلی، ارژینال ماهنیلارلا برابر رمانسلار، سوناتالار، کوارتتلر ده بسته‌له‌ییب. بسته‌کارین رشید بهبودووون ایفاسیندا سسلنه‌ن "ای وطن" اثری بوتون دنیادا آذربایجانی ترنم ائد‌ن ماهنیلاردان بیری اولدو. آذربایجان شاعرلرینین یوزلرله شعیرلرینه و روس دیللرینده اونلارلا پویتیک نمونه‌یه موسیقی یازان بسته‌کار بختیار واهابزادنین، واحد عزیزین، واقیف صمدوغلونون، روزگار افندیئوانین، رامیز حیدرین شعیرلرینه یازیلمیش یوزلرله ماهینین مؤلفیدیر.

ماهنیلاری بهبودوو، اوقتای آغایئو، فلورا کریمووا، آکیف اسلام‌زاده، المیرا رحیمووا، گولاغا ممدوو، اسلام رضایئو، ایلهامه قولیئوا طرفین‌دن سئویله‌رک ایفا ائدیلیب. ماهنیلارینین اکثریتینی فلورا کریمووا اوچون یازیب.

۲۴ یاشین‌دا اؤزوندن یاشجا خیلی بؤیوک اولان پروفسور عادیل علکبروولا عائله قورسا دا بو ائولیلیین عمرو اوزون اولماییب. جمعی بیر ایل داوام ائد‌ن عائله حیاتیندان جوتلویون زهرا آدلی قیزلاری دنیایا گلیب. قیزلارینین ۱ یاشی اولمامیش عادیل علکبروو نامعلوم سببله ائلزا ابراهیمووانی ترک ائدیر. حتی قیزینین اوزونو بئله گؤرمک ایسته‌میر. یاشادیغی بو اوغورسوز عائله حیاتیندان سونرا صنعتکار بیر داها ائولنمیر.

ناکام عائله حیاتنین تأثیریندن یازدیغی بیر-بیریندن دویغولو ماهنیلاردان ان چوخ سئویله‌نلردن بیری ده «من تزه‌دن سئومک اوچون گلرم حیاتا»بسته‌کارین شاه اثرلریندن ساییلیر:

"کاش اونوم سنه یئته،

کاش سسیم سنه چاتا،

سن یادیما دوشنده،

من تزه‌دن گلرم،

سئومک اوچون حیاتا..."

عمرونون سونلارینا یاخین دپرسیایا دوشن صنعتکار هئچ کیمی گؤرمک و دانیشماق ایسته‌مه‌ییب. عمرونون سون بیر آییندان ایسه یئمک ایچمکدن امتنا ائدیب. اوزون سورن خسته‌لیکدن سونرا ۱۱ فورال ، ۲۰۱۲-جی ایلده ۷۴ یاشیندا دنیاسینی دییشدی، ایکینجی فخری خیاباندا دفن اولوندو.