بو گون بؤیوک آذربایجان خواننده‌سی، خالق آرتیستی خان شوشینسکی‌نین دوغوم گونودور.

Kult.az بو مناسیبتله خان حاققیندا ماراقلی فاکتلاری تقدیم ائدیر:

اصل آدی اسفندیار اولان بؤیوک صنعتکار ۱۹۰۱-جی ایل آوگوستون ۲۰-ده قاراباغین مشهور طایفالاریندان اولان جوانشیر سلاله‌سینه منصوب آسلان بَیین عائله‌سینده دونیایا گؤز آچیب. آنجاق سووت (شوروی)حاکمیتی قورولدوقدان سونرا شوشانین باللیجا کندینده مولکو و دؤرد کندی اولان آسلان بَیین بوتون وار-دولتی مصادیره ائدیلیر. بو حادثه‌دن سونرا آسلان بَی برد شهرینه کؤچور. خان شوشینسکی ملاخانادا تحصیل آلیب، عرب الفباسییلا یازیب-اوخوماغی باجاریب. فارسجا دا بیلیب.

بیر گون قاراباغ مجلسلرینین بیرینده گونئی آذربایجانین بؤیوک خواننده‌سی ابوالحسن خان اقبالین «کورد-شهناز» موغامینی دینلییرلر. خواننده اسلام عبدوللایئو اوزونو شاگردی اسفندیارا (خان شوشینسکی‌یه) توتور:
-بئله اوخویا بیلرسن؟

خان شوشینسکی جواب وئریر:

-بیر دفعه ده دینله‌سم، اوخویارام!

موغامی بیر دفعه ده دینلییرلر و خان «کورد-شهناز»ی نئجه اوخویورسا، اسلام عبدوللایئو حیران قالیر. او، شاگردینه باخیب راضی‌لیقلا گولومسه‌یه‌رک دئییر:

-ابوالحسن ایرانین خانی‌دیر، سن ده بو گوندن اولدون آذربایجانین خانی!

او واخت‌دان گنج اسفندیارا هامی خان، بیر آز یاشلاناندان سونرا ایسه خان عمی دئیه مراجعت ائدیر.

خان شوشینسکی گنج یاشلاریندان پاپیروس چکسه ده، سونرادان جبار قاریاغدی‌یئو اوغلونون مصلحتی ایله قلیان چکمه‌یه باشلاییب و عؤمرونون سونلارینا قدر بو مشغولیتیندن ال چکمه‌ییب.

جوانلیغیندا آت سورمه یی، اوو-اوولاماغی خوشلار، ایتی گؤرمه قابیلیتی و جلد حرکتی حسابینا سرراست گولـله آتماغی باجارارمیش. گؤزل ده نرد اوینایار، نادر حاللاردا اودوزاردی. لاکین سوادی ائله ده اولماییب.

حافظه‌سی گوجلو اولدوغوندان حتی عمرونون اختیار (یاشلی)چاغلاریندا بئله یادداشیندا مینه یاخین شعیر و غزلی تحریفسیز ساخلاییب، سؤیله‌یه و اوخویا بیلیردی. عینی زاماندا معاصرلریندن، اساساً ده علی آغا واحیددن ایلک دفعه او غزل اوخویور و اونلاری مشهورلاشدیریر.

خان شوشینسکی اوزون ایللر اولاد حسرتی ایله یاشاییب. اوزون ایللردن سونرا دؤرد اولادینین اولماسی اونو چوخ خوشبخت ائدیب.

خان ایلک حیات یولداشی تووز خانیملا ۳۵ ایل ائولی اولور، لاکین اولادلاری اولمور. تووز خانیم اؤزو خانین ایکینجی دفعه ائوله‌نمه‌سینی ایسته ییر. بئله‌لیکله، خان شوشینسکی ایکینجی دفعه ۵۶ یاشیندا اؤزوندن ۳۰ ایل جوان صوغرا خانیملا ائولنیر. و خان هر ایکی حیات یولداشی ایله عمرونون سونونا کیمی بیر یئرده یاشاییر. لاکین ایلک خانیمینی اینجیتمه‌مک اوچون اونون یانیندا ایکینجی حیات یولداشینا هئچ واخت ایستی مناسیبت گؤسترمیر.

بیر گون خان شوشینسکی موسیقی‌چی یولداشلاری ایله تویدان گلنده قولدورلار اونلاری سویماق اوچون فایتونلارینی ساخلادیرلار. صنعتکار اولدوقلارینی بیلنده خاندان اوخوماسینی ایسته ییرلر. خان نئجه اوخویورسا، اوزون مدت ائو-ائشییندن اوزاق دوشن قولدورباشینی آغلاماق توتور، اونلارا خلعت وئریب ساغ-سالامات شوشایا یولا سالیر.

قادین ایفاچی ایله ایلک دویتین تشببوثکاری و ایفاچیسی خان عمی اولوب.

اوزئییر بَی حاجی‌بیلی ۱۹۲۰-جی ایلین پاییزیندا قاراباغ‌دا گنج ایفاچیلار آختاریشینا چیخیر. خان شوشینسکی اوزئییر بَیین حضوروندا اوخویور، بؤیوک بسته‌کار اونون سسینی چوخ بَیَنیر و بئله‌لیکله موغننی‌نین صنعت کاریئراسی باشلاییر.

سونرالار اوزئییر حاجی بَیلی خان شوشینسکی‌نین سسینی و یارادیجیلیغینی یوکسک قیمتلندیره‌رک، اوندان ذوق آلدیغینی دیله گتیریر.

مسکوادا، بؤیوک تئاتردا آذربایجان مدنیتی اون گونلویونده سارا قدیم اووا و شوکت علکبر اووا ایله بیرلیکده «قاراباغ شیکسته‌سی» ایفا ائدیر. زیل پرده‌لری نئجه اوخویورسا، کولیسده دورموش تئاترین آپاریجی سولیستی، اس.اس.ار.ای خالق آرتیستی ایوان سمیونوویچ کوزلووسکی حیرته گلیر، ایکی اَلی ایله باشینی توتور و «آمان تانریم، بو نئجه سس‌دی؟ » دئیه قیشقیراراق صحنه آرخاسیندا وار-گل ائتمه‌یه باشلاییر.

خان عمی اؤلومونه ۱۰ ایل قالمیش هئچ واخت اَلینه قاوال آلیب بیرجه آغیز بئله اوخومور و طبیعی کی، صحنه‌یه چیخمیر. بو، آذربایجانین مدنیت تاریخینده واختیندا صحنه‌دن گئتمه‌یین ان آغایانا نمونه‌سی حساب اولونور.