فیلملرین فجر فستیوالینا بوراخیلماماسی تورک دیلی و بو دیلده اولان اثرلره قارشی آیری-سئچکیلیین تظاهرودور.

Kult.az خبر وئریر کی، بونو گونئی آذربایجانلی آکتیور ناصر هاشمی ایراندا آذربایجان تورکجه‌سینده چکیلن فیلملره، او جمله‌دن «قولچاق» فیلمینه قارشی اؤگئی مناسبتی تنقید ائدرکن دئییب.

او, سون گونلر تبریزده نمایش اولونان و آذربایجان‌لیلارین گئنیش رغبتی ایله قارشیلاشان عسگر یوسیفی‌نژادین «قولچاق» فیلمی ایله باغلی فیکیرلرینی پایلاشیب:

«تورک دیلینده باشقا بیر فیلمین ده فئستیوالدا اشتیراک ائتدیینی بهانه ائدیب، «قولچاق» فیلمینین فجر فیلم فئستیوالیندا اشتیراکینا اجازه وئرمه‌دیلر. نیه گؤره؟ بو نئجه اولور کی، فئستیوالدا فارس دیلین‌ده چکیلن ۲۰-۲۵ فیلم اشتیراک ائتدیی حال‌دا تورک دیلینده ۲ فیلمین اشتیراک ائتمه‌سینه اجازه وئریلمیر»،-او دئییب.

او، آذربایجان کینو ساحه‌سینین محو ائدیلدیینی و بو صنعت ساحه‌سینین یالنیز کؤلگه‌سینین قالدیغینی سؤیله‌ییب:

«اگر مقصدینیز آذربایجان مستقیل کینوسونو محو ائتمک ایدی‌سه سیزی تبریک ائدیره‌م، بونو باجاریب، نایل اولا بیلدینیز. آرتیق آذربایجانلی رژیسسور و پرودوسئرلر تبریزی، آذربایجانی ترک ائدیب، باشقا یئرلره، تهرانا کؤچمه‌یه مجبور اولوبلار. دنیانین هئچ بیر یئرینده کینولاری، صنعت اثرلرینی چکیلدیکلری، یارادیلدیقلاری دیله گؤره قیراغا قویماق تجربه‌سی یوخدور. آنجاق بونو بورادا ائله‌دیلر. اؤزلرینین گوجلو صنعت اثری اولدوغونو اعتراف ائتدیکری فیلملرین فستیواللاردا اشتیراکینا اجازه وئرمه‌دیلر».

قید ائدک کی، «قولچاق» فیلمینین رژیسسورو بوندان اؤنجه تورک دیلینده چکدیی «ائو» فیلمی ایله گونئی آذربایجان‌لیلارین رغبتینی قازانان تانینمیش رژیسسور عسگر یوسیفی‌نژاد ۱۳ سنتیابر ۲۰۲۲-جی ایلده دنیاسینی دییشیب.