سوریانین دئوریلمیش لیدری بشار اسدین دمشقین سقوطوندان سونرا روسیایا قاچدیغی و چتین بیر دور کئچیردیی ادعا ائدیلیر. حیات یولداشی اسما اسدین بیر داها اوندان بوشانماق قرارینا گلدیی و بونونلا دا ائولیلیکلرینه سون قویدوغو و اسدین آغیر پسیخولوژی ایسترس‌دن اذیت چکدیی ادعا ائدیلیر.

Axar.az خبر وئریر کی، سوریانین دئوریلمیش لیدری بشار اسد، آلمانیا مطبوعاتیندا یئر آلان ادعالاردان سونرا یئنی‌دن بین‌الخالق دقت مرکزینه چئوریلیب. بو ادعالارا گؤره، ۲۰۲۴-جو ایل دکابرین ۸-ده بعث رژیمینین سقوطون‌دان سونرا روسیایا قاچان اسد سورگونده چتین بیر دور یاشاییر.

«بیلد» قزئتینین اؤز منبع‌لرینه استنادا وئردیی خبره گؤره، «صحرانین گولو» لقبی ایله تانینان اسما اسد بشار اسددن بوشانماق قرارینا گلیب. ادعا اولونور کی، اونلارین ائولی‌لییی فاکتیکی اولاراق سونا چاتیب و بو پروسس اسدین شخصی حیاتین‌داکی اوچورومو داها دا درینلشدیریب. بوندان علاوه، اسدین آغیر پسیخولوژی ایسترس‌دن اذیت چکدیی ادعا ائدیلیر.

بؤیوک بریتانیادا یئرلشن اوک دکلاسیفید طرفین‌دن درج ائدیلدیی بیلدیریله‌ن سندلره اساس‌لانان ادعالاردا اسما اسدین ۱۹۹۰-جی ایللردن اعتباراً بریتانیا داخلی کشفیات خدمتی می۵ ایله علاقه‌ده اولدوغو ادعا ائدیلیر. لاکین بو ادعالاری مستقل منبع‌لر تصدیقله‌مه‌ییب.

بو ادعالار اؤتن ایل ده اورتایا چیخمیشدی. لاکین کرملین سؤزچوسو دیمیتری پسکوو اسد جوتلویو ایله باغلی ادعالاری تکزیب ائد‌رک دئییب: «خیر، بونلار رئاللیغا اویغون دئییل».

بو آرادا، آلمانیانین هفته‌لیک «دی زیت» قزئتین‌ده اسدین گونده‌لیک حیاتی ایله باغلی تعجب‌لو دتاللار پایلاشیلیب. معلوماتا گؤره، کئچمیش سوریا لیدری واختینین بؤیوک بیر حیصه‌سینی کامپوتر قارشی‌سیندا و ویدئو اویونلار اویناماقلا کئچیریر.