آذربایجان خزر دنیزینین دایازلاشماسی پروبلمینین حلی ایله باغلی روسیانین تکلیفلرینی دستکله‌ییر.

Axar.az خبر وئریر کی، بو باره‌ده روسیانین خارجی ایشلر ناظیری سرگی لاوروو مسکوادا آذربایجانین خارجی ایشلر ناظیری جیحون بایراموولا دانیشیقلاردان سونرا بیرگه مطبوعات کنفرانسیندا بیلدیریب.

روسیا خارجی ایشلر ناظیرینین سؤزلرینه گؤره، طرفلر خزرین اکولوژی مسئله‌لرینه، او جمله‌دن اونون دایازلاشماسی پروبلمینه دقت یئتیریبلر.

«بیر داها خاطیرلادیم کی، بو پروبلملرین نظردن کئچیریلمه‌سی تشببوسونو محض آذربایجان پرزیدنتی ایر‌لی سوروب. او جمله‌دن آذربایجانلی همکارلاریمیز کونکرت اولاراق دایازلاشما پروبلمی ایله باغلی روسیا طرفینین تکلیفلرینی دستکله‌یه‌جکلرینه سؤز وئریبلر»، - دئیه لاوروو قید ائدیب.

او، همچنین وورغولاییب کی، روسیا اکولوژی وضعیتی بلاواسطه یئرینده اؤیرنمک اوچون متمادی اولاراق هیدروگرافیک گمیده اکسپرتلرین سفرلرینی تشکیل ائدیر و خزرین اکوسیستمینین قورونماسینا یؤنلمیش ایسته‌نیله‌ن تشببوسلری دستکله‌مک نیتینده‌دیر.

بوندان علاوه، روسیالی ناظیر خزر دنیزینین حقوقی استاتوسو حاقیندا کنونسیانین راتیفیکاسیا پروسسینین تئزلیکله باشا چاتدیریلماسینین واجبلیینی وورغولاییب:

«ایران استثنا اولماقلا، بوتون خزریانی دولتلر آرتیق سندی راتیفیکاسیا ائدیب. بو، خزرین حقوقی تنضیمله‌نمه‌سی مسئله‌لرینین نهایت باغلانماسی اوچون واجبدیر. باخمایاراق کی، خزر رگیونو اؤلکه‌لری کنونسیادا یئر آلان فوندامنتال عهده‌لیکلری پراکتیکی اولاراق یئرینه یئتیرمه‌یه چالیشیرلار».