روسییا-تورکییه یاخینلاشماسینین قفقازا منفی تأثیری اولمایاجاق.

بو سؤزلری آخار. آذ-آ آچیقلاماسیندا پولیتولوگ قابیل حسین‌لی سؤیله‌ییب.

«بیر هفته اؤنجه تورکییه پرزیدنتی رجب طایییب اردوغان دا ایروانا گؤندردیی مئساژیندا آذربایجانا قارشی ایسته‌نیلن تخریباتین قارشیسیندا تورکییه‌نین دایاناجاغینی سؤیله‌دی. اوسته‌لیک، ناخچیوان‌دا تورکییه‌نین بازا ایستاتوسلو حربی قوه‌لری یئرلشدیریلیر. آذربایجان-تورکییه مناسیبتلری داها دا یوکسک سوییه‌یه قالخیر. تورکییه، آذربایجان و گورجوستان اوردولارینین بیرگه تعلیمینین کئچیریلمه‌سی، عینی زاماندا بؤلگه‌دن کئچن نفت-گاز کمرلرینین بیرگه قورونماسی حاقیندا عمومی راضیلیق الده اولونوب. آرتیق بیر دفعه بو اؤلکه‌لر بیرگه قرارگاه تعلیملری ده کئچیریبلر. تورکییه نه آذربایجان، نه ده گورجستانا منفی تأثیر گؤسترجک آددیم آتاجاق»، - دئیه او بیلدیریب.

پولیتولوگون فیکرینجه، تورکییه‌یه آذربایجان و گورجستانلا حربی اتفاق یاراتماق هاوا و سو کیمی لازیم‌دیر:

«تورکییه قافقاز دؤولتی‌دیر. ناخچیوانا گلینجه ایسه بورادا تورکییه‌نین خصوصی صلاحیتلری وار. قارص مقاویله‌سینه اساساً، ناخچیوان اوچون یارانان ایسته‌نیلن تهدید زامانی تورکییه بیرباشا مسئولیتی اوزرینه گؤتورور. ارمنیستانداکی روسییانین گومرو بازاسینا آلترناتیو اولاراق ناخچیواندا، ائلجه ده گورجستاندا تورکییه‌نین بازا یاراتماق ایسته‌مه‌سی منطیقه اویغوندور. روسییا بونا هئچ بیر حالدا اعتراض ائده بیلمز. تورکییه-روسییا مناسیبتلرینین درینلشمه‌سی معین بیر لیمیته قدر اولاجاق. بو لیمیتدن او یانا ایکی دؤولت آراسیندا یاخینلاشما اولمایاجاق. چونکی تورکییه ناتو دؤولتیدیر. روسییا-تورکییه مناسیبتلرینین درینلشیب ایستراتژی کاراکتر آلاجاغینی پروقنوزلاشدیرمیرام».

قید ائدک کی، سون زامانلار تورکییه-روسییا مناسیبتلرینده داها جدی یاخینلاشما وار. آرتیق طرفلر آراسیندا سورییا مسئله‌سینده راضیلیق الده اولونوب. اوسته‌لیک، روسییا رسمیلرینین تئز-تئز تورکییه‌یه سفرلری مشاهده ائدیلیر. تورکییه‌یه سونونجو دفعه روسییا مدافعه ناظری سرگی شویقونون سفر ائدیب، پرزیدنت اردوغانلا مخفی گؤروشمه‌سی ده بو قبیلدندیر.