آخار. آذ سئویله‌ن گنج ایفاچی، جنوبی آذربایجاندا دا بؤیوک رغبتله قارشیلانان آلماخانیم احمدلی ایله موصاحیبه‌نی تقدیم ائدیر:
قید ائتمک یئرینه دوشر کی، ۲۰۱۴-جو ایلین اوکتیابر آیینین ۷-دن تلویزییا اکرانلارین‌دا چیخیش ائدیر. حال-حاضردا آمریکانین ۷، آوروپانین ۴ تلویزییاسیندا ایفالاری یاییملانیر. رپرتواریندا مغام دستگاهلاری، بستکار و خالق ماهنیلاری ایله یاناشی تورک، عرب، فارس و اینگیلیس دیللرینده اوخودوغو نغمه‌لر یئر توتور.
۲۰۱۷-جی ایلین ایون آیینین ۱۲-ده حیدر علیئو فوندو، آذربایجان دؤولت تلویزییاسی، مدنیت و توریزم ناظرلیگی و مدنیت فوندونون بیرگه تشکیل ائتدیی ۶-جی موغام موسابیقه‌سینین غالیبی - باش موکافاتچیسی اولموش، «قران پیرای» موکافاتی ایله تلطیف اولونان آلماخانیم احمدلینین موسابیقه عرضین‌ده اوخودوغو دستگاهلار تلرادیونون "قیزیل فوند"اوندا ساخلانیلاجاق.
- آلماخانیم، ائله آدینیزدان باشلایاق... بو آدی سیزه کیم وئریب؟
- ننه‌مین آدیدیر، بو آدی آتام وئریب. فیکیرلشیرم کی، بو آدا من شؤهرت گتیره بیلمیشه‌م.
- بعضی صنعت‌چیلر داها تئز یادداشدا قالماق اوچون آدینی بعضا یا قیسالدیر، یا دا دییشیکلیک ائدیرلر. بو باره‌ده دوشونموسوز؟
- خئیر. اونسوز دا آدیم فرقلیدیر. دوغرودور، یاخینلاریم آدیمی قیسا چاغیریر. اما اونو دییشمک و یا قیسالتماق فیکریم اولماییب.
- اساساً هانسی ژانرا مراجعت ائدیرسیز؟
- موغام ژانرینا... اما دیگر ژانرلاردا دا ایفالاریم اولور. کلاسسیک، بستکار ماهنیلارینا، خاریجی موسیقیلره ده مراجعت ائدیره‌م. مثلاً، بو یاخینلاردا یئنی ماهنیمی یازدیردیم. بو، دئمیس روسوسون ماهنی‌سی ایدی. بیرینجی بندده اینگیلیس، ایکینجی بندده تورک واریانتینی، اوچونجو بندده ایسه عاریف بابایئوین دشتی‌سینی سینتز ائتمیشیک. یعنی خاریجی موسیقی ایله میللی موسیقیمیز سینتز ائدیلیب.
- بو صنعت‌ده دایینیز عزت باغیروو سیزه دستک اولورمو؟
- صنعتیمه باشلایان گون‌دن داها چوخ آتام منه دستک، دایاق اولور و بو، حاضردا دا داوام ائدیر. داییم دا منه ماهنی یازیب، اونون «آذربایجان-تورکییه» ماهنی‌سینی اوخوموشام. یعنی، داییمین منه دستیی بئله اولوب.
- اما تدبیرلرده، سوسیال شبکه‌لرده سیزی بیر آرادا گؤره بیلمیریک...
- دئمزدیم. چونکی ائفیرلرده بیر نئچه دفعه بیر یئرده اولموشوق، موناسیبتلریمیز چوخ یاخشی‌دیر.
- مطبوعات‌دا دا معلوماتلار یاییلمیشدی کی، آتانیز ایله دایینیز آراسیندا بیر سویوقلوق وار...
- دوغرودور، بعظا یازیرلار، اما سهو معلوماتلاردیر. هئچ واخت بئله بیر شئی اولماییب.
- بس، ایفانیز ایله باغلی مصلحتلر وئریرمی؟
- ایفا ژانریمیز باشقا اولدوغو اوچون من اؤز معلملریمدن کؤمک آلیرام. ایفالاریمدا یوخ، اما دایی کیمی دستک اولور.
- ایفاچی‌لیق تحصیلینیز وارمی؟
- بلی، موسیقی مکتبینین ۵-جی سینفینده خواننده‌لیک اوزره اوخویورام. بو ایل سندلریمی کونسرواتورییایا وئرمیی دوشونوره‌م.
- بس، نه زامان گئنیش کوتله طرفیندن تانینماغا باشلادیز؟
- ایکی ایل بوندان اول... ۱۳ یاشیمدا اوکتیابرین ۲۷-ده ایلک دفعه اولاراق، تلویزییا افیرینه چیخمیشام.
اما بو آز واخت عرضین‌ده خئیلی اوغورلار الده ائده بیلمیسیز...
- ایکی ایل بوندان اول اولوب. یاریم ساعتلیق مجلیس‌دن قازانج الده ائتمیشدیم. اما یاشیم ائله یاش دئییل کی، قازانج خطرینه تویلارا گئدیم. موغه‌ننیلر عائله صاحبی اولدوغو اوچون موتمادی تویلارا گئدیرلر. گلهجکده البته کی، من ده تویلارا گئده‌جم، لاکین حاضردا صنعتی‌می موکممللشدیرمه‌یه چالیشیرام. تویلارا گئدنده ده صنعتیمه دستک اوچون گئدیرم.
- خئیر. اکثر ماهنیلار بستکار ماهنیلاریدیر. اما آتامین سؤزلرینه اولان ماهنیلاری دا ایفا ائتمیشم. مثلاً، «آذربایجان-تورکییه» ماهنی‌سینین سؤزلری آتامین، موسیقی‌سی داییمیندیر.
- آتانیزین هانسی شعیرلرینی سئویرسیز؟
- دوشونوره‌م کی، آتامین وطنپرورلیک مؤوضوعسون‌دا اولان شعیرلری داها چوخ قلبه توخونور.
- بیر آز اؤنجه سوسیال شبکه‌لردن سؤز آچدیق. بیر چوخ صنعت‌چیلریمیز سوسیال شبکه‌لرده تنقید و حتی تحقیر اولونور، سونرادان بو قالماقالا چئوریلیر و س. بو جور حاللارلا راستلاشمیسیزمی؟
- من اؤزومو تاماشاچیلارا ائله چاتدیریرام کی، باره‌مده تنقیدلر اولماسین. شوکور کی، هئچ واخت اولماییب کی، کیمسه منی تنقید ائتسین. فیکریمجه، اصلین‌ده بو، موغننی‌دن آسلیدیر کی، تنقیده توش گلیر.
- بو یاخینلاردا دایینیز سوسیال شبکه‌لرده خئیلی تنقید اولوندو. یقین کی، بیلیرسیز، عاشورا گونونده زنجیر ووردوغونا گؤره... بو قالماقالی گؤره‌ن‌ه نه دوشوندونوز؟
- همین قالماقالی گؤره‌ن‌ده چوخ عصبیلشمیشدیم. داییم دیندار اینساندیر، ناماز قیلیر، بو یاخینلاردا مشهددن گلدی، عینی زاماندا ۴ دفعه حج زیارتین‌ده اولوب. فیکیرلشیرم کی، اونو یازانلار اؤزلرینی رکلام ائدیردیلر. فیکریمجه، اورادا قالماقاللی بیر شئی یوخ ایدی، عاشورا گونو ایدی و داییم زنجیر وورموشدو. حتی اونو دا بیلیرم کی، داییمی تنقید ائد‌نلر کافیر ایدی.
- بس، اؤزونوز دینله مشغول اولورسوزمو؟
- ناماز قیلمیرام، اما گلهجکده دوشونوره‌م.
- هر زامان عینی ایمیجده‌سیز. گئییم و یا اوسلوبونوزدا دییشیکلیک ائتمیی دوشونورسوزمو؟
- بو یاخینلاردا ایدمانلا مشغول اولوب، ۹ کیلو آریقلامیشام. ایمیجی‌می بئله دییشیرم. تخمیناً بیر نئچه کیلو دا وئرمیی دوشونوره‌م. صحنه‌ده آرتیق چکی دوز گلمیر.
- هانسی تلویزییا پروقراملارینی ایزلییرسیز؟
- داها چوخ کینولارا باخیرام.
- بس، کینویا چکیلمیی آرزولاییرسیزمی؟
- تکلیف اولماییب، اما گلهجکده اولسا، چوخ ایستردیم.
- ایفاچی‌لیق‌دان باشقا داها هانسی باجاریقلارینیز وار؟
- کامانچادا، پیانینودا و آزاجیق دا اولسا، گیتارادا ایفالار ائده بیلیرم.
- تاماشاچیلارینیز اوچون هانسی یئنی‌لیکلرینیز اولاجاق؟
سؤزلری و موسیقی‌سی بستکار روسلان احمدوغلونا مخصوص اولان «قایی‌داجاقسان» ماهنیم تام حاضردیر و تاماشاچیلارا تقدیم ائد‌جم. بستکار ناعیله میرممدلی ده یئنی ایکی ماهنی گؤندریب، داها سونرا اونلار اوزرینده ایشلیجییک. ان بؤیوک آرزوم ایسه گلهجکده خاریجی اؤلکه‌لرده موسیقیمیزی لاییقینجه تمثیل ائتمکدیر. آذربایجان موسیقی‌سی دیگر خالقلارین موسیقی‌سیندن خئیلی زنگیندیر.
