مهر آیینین اولین‌ده جناب حداد عادیل نه اوچون «فارس دیلینین یئترلیلیگی» لاییحه‌سینی یئنی‌دن تاکید ائدیر؟

بیر مدت بون‌دان اول تحصیل ناظرینین معاوینی شووینیست‌لیک مفکوره‌سی اساسلارین‌دا قورولموش و کیفایت قدر قالماقالا سبب اولان «فارس دیلینین یئترلی‌لیگی» لاییحه‌سین‌دن سؤز آچان‌دان سونرا آذربایجان میللی مده‌نی فعاللاری و ضیالیلاری بونا سرت رئاکسییا گؤستردی. موقتی اولسا دا، بزه‌ن دانیلدی و یا گیزلدیل‌دی. تحصیل ناظرینین معاوینین‌دن سونرا فارس دیلی آکادئ‌مییاسینین رئیسی جناب حداد عادیل میدانا گله‌رک عینی لاییحه‌نی باشقا سؤزلرله مدافعه ائدرک، «چالیشیریق، ایکیدیللی زونالاردا اوشاقلارا معین تعلیملری کئچیلسین کی، فارس دیلینی داها آسان اؤیره‌نه بیلسینلر»، – دئییر.

حداد عادیل بیر حال‌دا «ایکیدیللی» اوشاقلاردان سؤز آچیر کی، اصلین‌ده بئیینلرینده عینی مفکوره گزن، لاکین شاه رژیمینه قوللوق ائد‌ن آداملارین سعیی سایه‌سین‌ده بیر عصردیر همین اوشاقلار آنا دیلین‌ده تحصیل آلماق‌دان محروم‌دورلار.

بئله‌لرینین مقصدی هئچ ده اؤلکه‌نین اینکیشافی دئییل. اصلین‌ده تورک دیلینین محو ائتمک اولوب. ماراق‌لی‌دیر کی، ائله شاه دؤورون‌ده ده بئله آددیم آتانلارین ایر‌لی سوردوکلری تکلیف حداد عادیلین تکلیفی ایله عینی نظریه اوزرینده قورولوب. گؤرونور، کئچمیشده شووینیستلرین ایر‌لی سوردوکلری، لاکین حیاتا کئچیره بیلمدیکلری لاییحه‌نی ایندی اونلارین معنوی تؤره‌مه‌سی اولان حداد عادیل حیاتا کئچیرمک ایستییر. بئله کی، اونلار تورکدیل‌لی اوشاقلاری والیدینلرین‌دن آییرماق و اونلارا فارسجا تعلیم کئچمک تکلیفی ایر‌لی سورسه‌لر ده، حداد عادیل «بیر سیرا تعلیملرین کئچیریلمه‌سی و فارس دیلینین داها یاخشی قاورانیلماسی» تکلیفینی ایر‌لی سورور. باخمایاراق کی، نئچه ایلدیر باغچالاردا و مکتبه حاضرلیق کورسلارین‌دا عینی لاییحه آرتیق باشلانیلیب، ایندی ده ایجرا اولونور. اگر بئله‌دیرسه اوندا حداد عادیلین ایر‌لی سوردویو تکلیف، دئمک اولار، باشقا بیر لاییحه‌دن خبر وئریر.

گؤره‌سه‌ن، تحصیل سکتورون‌دا فعالیت گؤسترن بعضی مسئول شخصلر طرفین‌دن ایر‌لی سوروله‌ن بئله بیر تکلیفلرین آرخاسین‌دا دایانان آتشه نه زامان سون قویولاجاق؟ پهلوی دؤوروندن باشلایان عدالت‌سیز لاییحه نتیجه‌سین‌ده آنا دیلین‌ده دانیشماغین اوشاقلیغین ایلک ۶ ایلینه محدودلاشماسی، گؤره‌سن، یئتمیر کی، جناب حداد عادیل «بیر سیرا تعلیملر»دن سؤز آچیر؟ اگر بونلار شووینیست مفکوره‌لری اساسین‌دا قورولان لاییحه‌لرینی حیاتا کئچیرمه‌یه موفق اولسالار، اوندا نؤوبتی آددیم‌دا اوشاقلاری ۳ یاشین‌دان آنا دیلین‌دن محروم ائتمه‌یه باشلاییب یئنی و داها عدالتسیز بیر لاییحه‌یه ایستارت وئره‌جکلر. بو اونا گؤره‌دیر کی، اونلارا موتیو وئرن اصلین‌ده تورک دیلیندن دلیجه ائتدیکلری نیفرت‌دیر.
بئله بیر تکلیفی ایر‌لی سورنلر گومان ائدیر کی، بو آددیملارین آتیلماسی ایله فارس دیلی اوزرین‌ده قورولان میللتلر آراسی بیرلیک داها دا محکملنیر. لاکین بیر حقیقتی بیلمیرلر کی، بئله تکلیفلرین ایر‌لی سورولمه‌سی ایله اونسوز دا پیک حده چاتان آیری-سئچکی‌لیک میللتلر آراسین‌دا اولان ضعیف باغلی‌لیغی داها دا ضعیفلدیرلر. بونلارین شووینیست بئینین‌ده یئر آلان و کئچمیش‌ده اولان معنوی آتالارین‌دان اونلارا ارث چاتمیش «بیر میللت – بیر دیل» «خیالی» اونلارا ایمکان وئرمیر کی، میللتین پروبلملرینین حلی اوچون بیر آددیم آتسین اصلین‌ده آتدیقلاری آددیملارین هامی‌سی فارس دیلی اولمایان باشقا دیللری محو ائتمه‌یه یؤنلیب. اونلار بونو حیاتا کئچیرمک اوچون گون‌ده حیله قورورلار. بو لاییحه‌نی پهلوی دؤورونون شووینیستلری حیاتا کئچیره بیلمه‌دی. لاکین ایندی ایران ایسلام رسپوبلیکاسی سایه‌سین‌ده الده ائتدیکلری صلاحیت و گوج‌دن سوی-ایستیفاده ائتمکله معنوی اجدادلارینین یئرده قالان آرزولارینی رئاللاشدیرماق ایستییرلر. بونلارا دئمک لازیم‌دیر کی، «سیناق‌دان کئچه‌نی بیر داها سینامازلار». بئله کی، گئجه-گوندوز بئیینلرین‌ده شووینیست فیکیرلر گزه‌ن پهلوی دؤورونون شووینیستلری ایندی تاریخین زیبیل قوتوسون‌دا اولسا دا، تورک دیلی یاشاییر و «اینکیشاف» ائتمک‌ده‌دیر. هم ده بیلملیدیرلر کی، کئچمیش‌ده اولان فاشیست معنوی اجدادلارینین بوساتینی محض آذربایجان دیلین‌ده دانیشان گنجلر یئر اوزوندن ییغدی.

تحصیل سکتورون‌دا فعالیت گؤستره‌ن بیر سیرا مسئول شخصلرین بئینین‌ده گزه‌ن بو داغیدیجی مفکوره‌لر بیر یانا، میللی رادیو و تلویزییانین دا گناهلاری باغیشلانمازدیر. اؤلکه‌نین بئله بیر چتین اقتصادی وضعیتین‌ده میللی رادیو و تلویزییا اؤلکه‌یه و میللته اوریی یانان، بیرلیک ایسته‌یه‌ن ضیالیلاری، متخصصلری دعوت ائدیب، چیخیش یولو آختارماق یئرینه، واختینی بئله‌لرینه آییریر کی، میللتلر آراسین‌داکی قیریلماق اوزره اولان بیرلیک و باغلی‌لیغی پوزسون. میللی رادیو و تلویزییا رهبرین سؤزلرینی هدفه آلاراق موختلیف مؤوضوع‌لاری موذاکیره ائدیب، حل یوللاری آختارماق یئرینه ائفیر واختینی غرضلی اینسانلارا آییریر کی، بئیینلرین‌ده اولان زهرلی و داغیدیجی مؤقعلرینی بیر تکلیف کیمی ایر‌لی سورسون. باشقا میللتلرین معصوم بالالاری نه اوچون آنا دیللرینی اونوتمالی‌دیر؟ حداد عادیلین سؤزلرین‌دن بئله چیخیر کی، اوجقار یئرلرده یاشایان و عادیلین لاییحه‌سین‌دن بهره‌له‌نمک ایمکانی اولمایان اوشاقلارین آرتیق طب کیمی اوستونلوک و ایمتیاز گتیرن ساحه‌لرده تحصیل آلماق ایمکانلاری اولمایاجاق. بونلار هانسی عدالت‌لی تحصیل کؤکون‌ده کؤکلنیر؟
بئله بیر مسئول شخصلره بیر داها تاکیدله دئییریک: آی بیلر! یئنه ده همیشه اولدوغو کیمی زورنانی گئن باشین‌دان چالماغا باشلامیسینیز! اوشاقلارا داها کیچیک یاشین‌دان فارس دیلی تعلیمی کئچمک تکلیفی ایله میللتلر آراسین‌دا اولان ضعیف باغلی‌لیغی بون‌دان داها چوخ گوج‌دن سالمایین! گؤره‌سه‌ن، نه زامان بیلجکسینیز کی، میللتلر آراسین‌دا بیرلیک و باغلی‌لیق سیزین شووینیست بئینینیزده گزه‌ن مفکوره‌لرین رئاللاشماسین‌دان داها اؤنملی‌دیر؟ بونو باشا دوشمک سیزین اوچون بو قدر چتین‌دیرمی؟

قید ائدک کی، سون زامانلار «ایکیدیللی میللتلر»، «ایکی دیللی اوشاقلار» و بونا اوخشار ایفاده‌لری بیر چوخ مسئول شخصلرین آغزین‌دان ائشیدیریک. مثلاً، عالی مدنی اینقیلابی شوراسینین عضوو مهدی گلشنی و عالی تحصیل شوراسینین صدری مهدی نوید عینی گون‌ده «ایکیدیل‌لی» سؤزونو ایشلدیب. بو سؤزون داها سونرا حداد عادیل طرفین‌دن ایشله‌نمه‌سی هئچ ده تصادفی دئییل، اصلین‌ده دوشونولموش بیر آددیم‌دیر. بیزی ده دوشوندورمه‌لی‌دیر. بونو چوخسای‌لی قزئتلر گئنیش یاییب و تأسف کی، بیزیم سویداشلاریمیز دا بونلارین آغزین‌دان قاپیب بیر داها ایستیفاده ائدیر. اوزوموزو سویداشلاریمیزا و مسئوللارا توتوب دئییریک، آی بیلر هئچ کیم ایکیدیللی اولمور. هر اینسانین بیر آناسی و او آنانین دا بیر دیلی – آنا دیلی اولور.

البته، باشقا میللتلره رغما بیز آذربایجان‌لیلارین باشقا بیر آناسی دا وار: آذربایجان. هان‌سی کی، اونوندا مین ایللر بویو دیلی محض تورک دیلی اولوب. اگر بیز شووینیست فارسلارین ایشلتدیی ایفاده‌لری بیر داها ایستیفاده ائتسک، اونلارین دییرمانینا سو تؤکموش اولاریق. شووینیستلر بو ایفادنی ایشلتمکله دئمک ایستییرلر کی، بو میللتلرین بیری فارس دیلی اولماق شرطی ایله ایکی دیلی وار. بیز ایسه دئییریک بیزیم بیر دیلیمیز وار، او دا فارس یوخ تورک دیلی‌دیر. اصلین‌ده فارس دیلی مجبوری قایدادا عدالتسیز اولاراق بیزیم اوشاقلارا اؤیردیلیر.