Axar.az مشهور اوزان آراز ائلسه‌سین Publika.az-ا مصاحیبه‌سینی تقدیم ائدیر:
- ایران‌دان گئتمزدن اول نه ایله مشغول اولوردونوز، آراز بی؟
- عسگرلیکده ایدیم، حربی خیدمت مدتیم باشا چاتان کیمی، بیر نئچه آی ایچینده اؤلکه‌دن چیخدیم.
- تورپاغا باغلی‌لیق، یقین کی، عائله‌دن گلیر. اوشاقلیغینیزی نئجه خاطرلاییرسینیز، نئجه عائله‌ده بؤیوموسونوز؟
- بالاجا بیر شهرده و چوخ ساده بیر عائله‌ده دوغولموشام. طبیعت وورغونویام، تئز-تئز داغلارا گئدردیم، عمومیتله داغچی‌لیق و چؤلچولوک حیاتی منه همیشه ماراقلی اولوب. سولدوزون ایسه چوخ گؤزل داغلاری، سولاری، بولاقلاری و چایلاری وار ایدی.
- اؤولادلارینیزی دا عینی روحدا بؤیودورسونوز؟
- بیر قیزیم، بیر اوغلوم وار، اونلار اوچون یاخشی آتا اولماغا چالیشیرام. آتالیق میسییامی لاییقینجه یئرینه یئتیرمک اوچون الیم‌دن گلنی ائدیره‌م. اینانیرام کی، یاخشی آتا اولسام، اونلار دا ایدئالاریمی عینی درجه‌ده سئوه‌جک و یورودویوم یولدا آچدیغیم جیغیرلا گئده‌جکلر.
- دده-بابا یوردونوزدان آیری دوشندن سونرا هانسی چتینلیکلرله اوزلشدینیز؟ بو حکایه‌ده سیزی ان چوخ اینجیدن نه اولدو؟
- آیریلیغین یاشی ۳۰-او کئچیب... ائنیشلی-یوخوشلو، آغریلی-آجیلی عمور یولوم اولسا دا، شیرین خاطره‌لریم ده چوخ‌دور. ایندی دایاندیغیم نقطه‌دن گلدییم نقطه‌یه باخساق، حیاتیمین هر حکایه‌سی منه عزیزدیر. چونکی بو حکایه‌ده بوتون یوللار حاقا آپاریر. ایری آددیملارلا یولون سونونداکی ایشیغا یاخینلاشماغا چالیشیرام. او ایشیق ملتیمین یوکسلیشی و بوتؤولویودور.
- بس وطن حسرتی سیزدن نلری آلدی؟
- یوردومو، اونون هاواسینی و سویونو، چایلارینی، بولاقلارینی، عائله‌می و دوستلاریمی، قوهوملاریمی و داها چوخونو! اما قازاندیردیغی دیرلر ده اولدو. بو حسرت ایچیم‌ده سؤنمز بیر یانغییا دؤندو و یورودویوم یولدا منی یورولماغا قویمادی. ملتیمین، یوردومون دردینی هایقیران بیر آداما چئویردی منی.
- آزادلیق و یئنی‌لمزلیک روحو نه زامان یارادیجیلیغینیزین آیریلماز پارچاسینا چئوریلدی؟
- تورپاغیمدان و میللتیمدن. یوللار منه دئییر کی، یورولما، یورو، یولون سونونا آز قالیب... زامان دا بونو گؤستریر، اینانیرام کی، چوخو گئدیب، آزی قالیب.
- اوزانلار موسیقی و شعیر دیلی ایله هانسی مئساژلاری اؤتورمه‌لیدیر؟ عمومیتله موسیقیچیلرین ماهنیلاردا سیاسی مئساژلار وئرمه‌سینه مناسیبتینیز نئجه‌دیر؟
- بئله ده اولمالیدیر. موسیقی‌چیلر ده، ادبیاتچیلار دا اطرافدا باش وئره‌ن سیاسی اولایلارا اؤز مناسیبتینی بیلدیرمه‌لیدیر. دونیانین هر یئرینده بئله‌دیر، کیمی شعیری، کیمی کیتابی، کیمی موسیقی‌سی، کیمی ده فیلم واسیتسیله اؤز یاناشماسینی اورتایا قویور کی، جمعیتین اینکیشافینا و عمومی رایین فورمالاشماسینا تأثیر گؤسترسین. دموکراتیک جمعیتلرده بونلارین اولماسی نورمال و بیر او قدر واجیب‌دیر، توپلومون گلیشمه‌سینده مهم رول اویناییر.
- چیخیشلارینیزین بیرین‌ده گونئی آذربایجانلیلارین آزادلیغی اوچون «اولادیغینیزی» دئمیسینیز. آذربایجانین بوتؤولویونو گؤرمک و اونو یاشاماق سیزین ان بؤیوک آرزونوزدور. سیزجه، بو گون گونئی‌لی آذربایجانلیلارین هامی‌سی سیزینله عینی فیکیرده‌دیر؟ «اولوسوم، اویان» چاغیریشلارینیز اورادا نئجه قارشی‌لانیر؟
- قورتولوش سؤزو قوردلا باغلیدیر و قوردون اولاماسی دئمکدیر. نئچه ایللردیر کی، آذربایجانیمیزین گونئیینده اون مینلرله آذربایجانلی داغلاردا و میدانلاردا توپلاشیب قورد کیمی اولاییر. بونو «تراکتور» فوتبول کلوبونون اویونلاریندا دا گؤرمک اولار. اونلارین اولاماسی یوردوموزو و ملتیمیزی قورتولوشا چاغیران بیر سس‌دیر. اینانیرام کی، یاخین گله‌جکده قورتولوشموزا چاتاجاغیق و قوزئییمیزله بیرلشیب بؤیوک و بوتؤو بیر آذربایجانا چئوریلجییک. اورادا اینسانلارین بؤیوک اکثریتی آذربایجانی بوتؤو گؤرمک ایستییر، جنوبی آذربایجانی ایران ایچینده گؤرمک ایستمیریک.
- آرازین آرازلا گؤروشو نئجه کئچدی؟
- اینانیلماز اولدو، آرازلا گؤروشمیی چوخدان آرزو ائدیردیم. آرازین قوزئیین‌ده، بایراغیمیزین دالغالاندیغی نقطه‌ده دایانیب گونئیه تماشا ائتدیم. شان‌لی بایراغیمیزین خودآفرینین گونئیینده ده دالغالاناجاغی گونلر یاخیندادیر. آذربایجان بایراغی خودآفرینین جنوبوندا دالغالانان، بیزیم اولمایان و بیزه یاراشمایان بایراغا میدان اوخویوردو. اینانیرام کی، ملتیمیز آیاغا قالخاجاق، او تورپاغین اوزرین‌ده دالغالانماغا لاییق اولان آی-اولدوزلو اوچرنگلی، شان‌لی بایراغیمیزی اؤز سمالاریندا دالغالاندیراجاق.
- ایران‌دا باش وئره‌ن سون پروسئسلر حاقیندا نه دوشونورسونوسوز؟ حادثه‌لرین یئکون نتیجه‌سی نئجه اولاجاق، رژیمین دئوریلمه‌سی ممکن‌دورمی؟
- پروسئسلر دؤرد آیا یاخین‌دیر کی، داوام ائدیر و یئنی ایلده ده داوام ائد‌جک. یازدا داها بؤیوک حادثه‌لرین باش وئرجیی گؤزلنیلیر، ایندی قیشدیر، بیر آز ساکیتلیک وار. اینسانلار دا، حاکمیت ده معین حاضرلیقلارینی گؤرور. ائتنیک منصوبیتین‌دن آسیلی اولمایاراق، هر کس ایران‌داکی عدالتسیزلییه اعتراض ائدیر. ایرانین ملا رژیمی دئوریلنه قدر اعتراضلار دایانمایاجاق.
عینی زامان‌دا ملی پروبلملریمیز ده وار. ایران‌داکی ملتلر آرتیق اؤز بای‌راقلاری آلتیندا یاشاماق ایستییر. ایران‌دا بو رژیم چؤکرسه، آذربایجان تورکلرینین ملی ایستکلرینی حیاتا کئچیرمه‌سی اوچون گؤزل بیر ایمکان یاراناجاق. آذربایجانین بوتؤولشمه‌سی اوچون ملت اولاراق بونا حاضرلیقلی اولمالیییق. الیمیزه وئریلن فورصتی قاچیرمادان آذربایجانیمیزی بوتؤولشدیرجییک. ۲۰۰ ایل کیفایت‌دیر، بو حسرت آرتیق بیتسین!
- جنوبی آذربایجانین مستقیللیینه دایر اینانجینیز نه قدردیر، بونون اوچون نلر ائدیلمه‌لیدیر، مهاجیرت‌ده اولانلارین تشکیلاتلانماسی هانسی سوییه‌ده‌دیر؟
- جنوبی آذربایجان سؤزو اونون ایران‌دان قورتولدوغو آنا قدر کئچرلی‌دیر. جنوبی آذربایجان رسپوبلیکاسینین قورولماسی آنلام‌سیزدیر، آرازین قوزئیین‌ده دولتیمیز وار، اودور کی، یئنی‌دن بیر دولت قورماغیمیزا احتیاج یوخدور. آذربایجانین گونئیی آیاغا قالخیر، قورتولور و ایران چتیرینین آلتیندان چیخیب قوزئی‌ده‌کی دولتی ایله بیرلشیب، بوتؤو آذربایجانا چئوریلیر. اوردا یاشایان باشقا ملتلردن فرقیمیز اولدور کی، حاضر دؤولتیمیز وار.
- ایران‌دا مینلرله آدام اعداما محکوم اولوب، اونلار آراسین‌دا تانیدیقلارینیز، یاخود موسیقی‌چی دوستلارینیز وارمی؟
- نه یازیق، او جغرافییادا بیر چوخ ابتدای حاقلاری الده ائتمک اوچون اینسانلار آغیر سیناقلارا معروض قالیرلار. ۲۱-جی عصرده اعدام حکملرینین وئریلمه‌سی اینسانلیق اوچون اوتانجوئریجی‌دیر. بو آددیملاری ایله اؤز حاکمیتلرینین عمرونو داها دا قیسالدیرلار. اعدام حکملری اونلارین اؤزلرینی چؤکوشه آپاراجاق، باشقا یول یوخدور.
- ایران حکومتینین آذربایجان موسیقی‌سینه قارشی باسقیلاری و محدودیتلری حاقیندا نه دئمک ایستردینیز؟
- ۳۵-۴۰ ایل اول وضعیت داها سرت و مرکب ایدی. آذربایجان موسیقی‌چیلرینین کنسرت وئرمه‌سی، موسیقی گئجه‌لری حاضرلاماسی چوخ چتین ایدی. زامان کئچدیکجه بعضی گذشتلره گئتمه‌یه مجبور اولدولار. نیسبتا دوزلسه ده، پروبلملر هله ده وار. ایدئولوگییا باخیم‌دان موسیقی چوخ گوجلو سلاحدیر، اؤزللیکله، اینسانلارین اویانیشین‌دا.
- ایران‌دا یاشایان مختلیف خالقلارین تشکیلاتلاری بو اؤلکه‌ده‌کی اتنیکلرین آزادلیق مباریزه‌سی، داوام ائد‌ن اعتراضلار فونون‌دا قارشی‌دا دوران هدفلرله باغلی بیانات یاییب. بیانات‌دا چوخ مهم مسئله‌لر یئر آلیر. سیزجه، ایران بو بیاناتا نئجه جواب وئره‌جک؟
- چوخ ملت‌لی اؤلکه‌لر بیرلیکده یاشایا بیلمدیی زامان آیریلیر و بایراقلارینی قالدیریرلار. ایران چوخ ملت‌لی اؤلکه اولدوغو اوچون ملتلر یارانمیش فورصتدن ایستیفاده ائد‌جکلر. بیز اتنیک دئییلیک، ۴۰ میلیون آذربایجان تورکو وار. اودور کی، بیزیم اوردا هانسی مؤوقعی توتاجاغیمیز اؤنملی‌دیر. عربلرین، کوردلرین و دیگر ملتلرین وئریله‌ن فورصتدن ایستیفاده ائدیب، ایستدیی کیمی یاشاماق حاقلاری وار. آنجاق باشقا ملتلرین نه ائدجیی اؤز ایشیدیر، آذربایجان تورکلرینین ایستدیی بیزیم اوچون داها اساسدیر.
- بو یاخینلاردا ۵۱ یاشینیزی قید ائتدینیز. ساچلارینیز ایسه چوخدان بیازلاماغا باشلاییب.
- دوغرودور، ۵۱ یاشیندایام، ساچلارا گلدیکده، اونلار اؤز ایشینده، من ده اؤز ایشیمده‌یه‌م...
