گونئی آذربایجان اؤیرنجی حرکاتینین (آزوه) سؤزچوسو امیر مردانی‌نین Axar.az-آ مصاحیبه‌سی:
- آذربایجان اؤیرنجی حرکاتینین فعالیت ایستیقامتی ندیر؟
- میللی منفعتلرین و بوتون حاقلارین الده اولونماسینی اؤزوموزه هدف سئچمیشیک. بو، بیزیم مانیفئستیمیزده ده قید اولونوب. میللتین اؤز مقدداراتینی تیینئتمه یولوندا حاقینین برپا اولونماسینی ایستییریک. موستقیل گونئی آذربایجانا، یاخود دا بوتؤو آذربایجانا نایل اولدوغوموز گونه کیمی الیمیزده اولان بوتون ایمکانلاردان فایدالانماغا چالیشیریق. اودور کی، آزوه–اون گؤردویو ایشلر سیراسین‌دا ایرانین داخیلین‌ده، یاخود دا خاریجده آکسییالارین کئچیریلمه‌سی، موختلیف چاپ واسطه‌لری ایله پایلاشیملاریمیز، سمینار و کونفرانسلارین تشکیلی، دیوار یازیلارینین یازیلماسی کیمی ایشلرین اولدوغونو دئیه بیلره‌م. میللی دوشونجه‌یه عایید اولان سؤزلری ائولرین دیوارینا یازماق بلکه عادی گله بیلر، اما تأثیری بؤیوکدور. بو ایشلری هر زامان ائتمیشیک. سون ۵ آی عرضین‌ده ایران‌دا وضعیتین گرگینلشمه‌سی ایله وظیفه‌لریمیز داها دا آرتدی. بونلاردان بیری گونئی آذربایجاندا آکسییالارین قورولماسی ایدی. همچینین، ایچریده باش وئرن حادثه‌لری، خبرلری گئنیش شکیلده و سرعتله پایلاشماق لازیم ایدی. توتولانلارین سون دورومونو ایزله‌مک و بو باره‌ده مئدیالارا بیلگی پایلاشماق مهم اولدوغوندان اساس بو ایستیقامتده فعالیتیمیزی داوام ائدیردیک.
- گونئی آذربایجانین هانسی پروبلئمینی قابارتمیسینیز؟
- اورمو گؤلونون اکولوژی فلاکته اوغراماسینی گون‌ده‌مه گتیرمک اساس مقصدلریمیزدن بیری اولوب. بونون اوچون سئمینار و کنفرانسلار تشکیل ائتدیک. آوروپانین ۴۰-آ یاخین پارلامنت نماینده‌سی و آمریکا سناتینین بعضی شخصلری ایله گؤروشلریمیز اولوب. نهایت، آوروپا کومیسییاسین‌دان ایرانین اورمو گؤلونون قوروماسینین قارشی‌سینی آلماغا دایر بیر قرار آلینماسینا نایل اولدوق. بئله مسئله‌لرده دیگر میللی فعاللاریمیز دا بیزیمله بیرگه اولور. لاکین فارس مخالیفتینین الین‌ده اولان مئدیا بیزیم سسیمیزی باتیرماق اوچون دورمادان چالیشیر. آوروپا پارلامئنتینین نماینده‌لری ایله گؤروشه گئتدییمیز زامان معلوم اولدو کی، بیزیم حاقیمیزدا اونلارا دوغرو اولمایان خبرلر چاتدیریلیب. سونرا بیز حاق‌لی اولدوغوموزو اثباتلایا بیلدیک. بوتون بو چتین‌لیکلره باخمایاراق، ایشلریمیزی داوام ائتدیریریک. تورکییه‌ده، شیمالی آذربایجاندا متمادی اولاراق سمینار و ایجلاسلار تشکیل ائدیریک. بو ایش بیرلییمیزی درینلشدیرمک نیتیندییک. همچینین، بعضی تشکیلاتلارلا امکداشلیغیمیز وار. ایران‌دا یاشایان غیری-فارس میللتلرین تمثیل اولوندوغو قوروملارلا دا دانیشیقلاریمیز اولوب و اونلارلا گله‌جکده امکداشلیق قورماغا جهد ائدیریک.
- ایران‌دا باش وئره‌ن سون اعتراضلاردا آذربایجان‌لی طلبه‌لر نه طلب ائدیردیلر؟
- اعتراض ائد‌ن نماییش‌چیلرین یاشی ۲۰-۳۰ آراسیندا ایدی. بو اعتراضلارا قاتیلانلارین چوخو دا طلبه‌دیر... همچینین، گونئی آذربایجاندا باش توتان آکسییالاردا دا اؤن سیرادا گنجلر و طلبه‌لر ایدی. طلبه‌لرین بو فعال‌لیغی هر زامان اولوب. گونئی آذربایجان‌لی گنجلرین آکتیولیینی ایران‌دا باش وئره‌ن بوتون اعتراضلاردا گؤره بیلریک. فارس و یا غیری-فارس میللتلره باخدیغیمیزدا اونلارین اعتراضلارداکی فعال‌لیغی حاقین‌دا بیرمعنالی دانیشماق اولمور. اما آذربایجان‌لیلار، استثناسیز اولاراق، اؤن سیرادادیلار. «تراکتور»اون اویونلارینا اونمینلرله آزارکئش قاتیلیر. اونلار دا میللی شعارلار سسلندیریر. اویونو ایزله‌یه‌نلرین چوخو گنج و طلبه‌لردیر. فعال‌لیق گؤستردیی اوچون توتولانلار آراسیندا طلبه‌لرین سایی چوخ اولور. اعتراضلاردا داها چوخ دؤرد طلبیمیزین حیاتا کئچیریلمه‌سینی ایستییردیک. بونلار گندر برابرلیگی، دینی تولرانتلیق، حاکمیتده تمثیل اولونان بیر گروپ اولیقارخین اؤلکه ثروتلرینی منیمسه‌مه‌سینه سون قویماق، غیری-فارسلارا اولان آیری-سئچکی‌لیک سیاستینین قارشی‌سینی آلماق‌دیر. طلبلریمیز قطعی ایدی و حاقلاریمیزین برپاسی یولوندا اؤل‌ن، توتولان و هله ده خبر آلا بیلمدییمیز اؤیرنجیلریمیز اولدو.
- تبریز اونیورسیتئتینین طلبه‌سی آیلار حقینین قاتیللرینین نه واختسا جزالاناجیغینا اومید ائدیرسینیزمی؟
- آیلار حقینین قاتیللرینین نه واختسا جزالاندیریلماسی بو رژیم‌ده ممکن اولمایاجاق. بو، بیرینجی دفعه دئییل و تأسف کی، سونونجو دا اولمایاجاق. بنزر حادثه‌لر چوخ اولوب. حتی قتل تؤره‌دن شخصلر بل‌لی اولسا دا، اونلارا هئچ بیر جزا وئریلمه‌ییب. ۲۰۰۶-جی ایل مای قیامین‌دا بیزیم بیر چوخ شهیدیمیز اولدو. قاتیللری معلوم ایدی، عائله‌لر شیکایت ائدیب، اونلارین جزالاندیرلماسینی ایسته‌دیلر. مجبور قالیب بو ایشلری گؤره‌ن شخصلرین آدلارینی آچیقلادیلار، لاکین جزا وئرمه‌دیلر. دئمه‌لی، بو سیستم هئچ بیر زامان ایستمیر کی، اؤز آداملارینی موهاکیمه ائتسین. یئری گلن‌ده گنجلرین قاتیللری مکافاتلاندیریلیر و وظیفه‌لرینی آرتیریرلار.
- هله ده ایران حبسخانلارین‌دا اعتراضلار فونون‌دا ساخلانیلان، همچینین اونیورسیتتدن خاریج ائدیله‌ن طلبه‌لر وار...
- سون آکسییالاردا میللتیمیزین نماینده‌لرین‌دن چوخ اینسان توتولموشدو، آدلارینی بئله قید ائده بیلممیشیک. اونلارین آدینین مئدیادا ایشیقلانماسینا نایل اولماغا سعی گؤستریریک. بلکه، بونون بیر یاردیمی دیر و رژیم توتولانلارا قارشی سرت داورانماز. تبریز اونیورسیتتینین طلبه‌سی اولان پورییا فریدی ده سس-سوراق آلا بیلمدییمیز گنجلردن‌دیر. سون معلوماتا گؤره او، یانوارین ۸-ده سحر واختی تبریزده اؤز ائوین‌ده توتولموشدو. بوندان آرتیق بیر بیلگی الده ائتمک ممکن اولماییب. رژیم بودفکی اعتراضلاردا توتولانلارا قارشی داها سرت و آمانسیز داورانیر و اؤز وحشی سیماسینی اورتایا قویوب. کئچمیش واختلاردا بو قدر قورخونج دئییل‌دیلر. ایندی رژیم گئتمک قورخوسونو حس ائتدیین‌دن الیندن گلنی ائدیر.
- ایران‌دا طلبه، خصوصیله ده آذربایجان‌لی طلبه اولماق نه دئمکدیر؟
- آذربایجان‌لی طلبه‌لرین ایران‌دا اوخوماسینی بیر چوخ کاتگورییادا دیرله‌ن‌دیرمک مومکون‌دور. ایلک اولاراق آزادلیق‌دان دانیشماق لازیم‌دیر. مستقیل حیاتا قدم قویان اینسان ظن ائدیر کی، آزاددیر و اونون ایفاده، سؤز و بیر سیرا حقوقلاری وار. بئینین‌ده اولان دوشونجه‌لری دیله گتیرمک، مباحثه ائتمک و فیکیر بیلدیرمک ایستییرسن. بونلارین هامی‌سینی گنج اولاراق اینسان یاشاماق ایستییر. ایران‌دا سن بونلارین هامی‌سین‌دان محروم‌سان، تهران و تبریز اونیورسیتتلرین‌ده اعتراض آکسییالاری کئچیریلمیشدی. بو آکسییانی داغیتماق اوچون کناردان پلیس قوه‌لری غیری-قانونی اولاراق آکسییایا مداخیله ائتدی. بعضی طلبه‌لری دؤیوب، بعضیلرینی زیندانا آتدیلار. یعنی، بیزیم ایران داخیلین‌ده آزادلیق آنلاییشیمیز بودور. هم ده بیر تورک و آذربایجان‌لی اولاراق دا باشقا باسقیلارا معروض قالیرسان. اؤز آنا دیلینده تحصیل آلماغین یاساق‌دیر. اؤز کیملییمیز و دوشونجه‌لریمیز حاقین‌دا دانیشماق ممکن دئییل. یاخشی تحصیل آلماق و اوخوماق اوچون گرک اقتصادی باخیمدان دا راحت و آزاد اولاسان. گنج یاشلارین‌دا بیر طلبه‌نین حیاتینی قورماسی آسان دئییل. مستقیل دئییل، اؤز عائله‌لری ایله بیرگه یاشاماغا مجبوردور. بو ایسه عائله‌یه یوکدور و اؤز اؤولادلارینی تعمین ائتمک‌ده چتینلیک چکیرلر. ایش تاپا بیلمک ده چوخ چتیندیر. چونکی ایشسیزلیک پروبلمی اؤلکه‌نی بورویوب. اؤزوم هم آوروپادا، هم ایران‌دا تحصیل آلدیغیم اوچون ایلک اولاراق تحصیلین کئیفیتی آراسیندا بؤیوک بیر فرقین اولدوغونو دئیه بیلره‌م. آوروپادا تحصیلین سوییه‌سی چوخ یوکسکدیر. ایران تحصیل سیستمی ایسه کئچمیشه عایید اولان بیر سیستم‌دیر، نتیجه‌سی ده یاخشی اولمور. علم اؤیردیلمیر، ساده‌جه، طلبه‌لر مکتب سیستئ‌می کیمی اونیورسیتتلره داوام ائدیر. سانکی هله ده مکتب‌ده اوخویورلار. طلبه‌لر امکان دوشن کیمی خاریجده تحصیله اوستونلوک وئریرلر. بئله اولان‌دا دا داخیل‌ده ساغلام دوشونجه‌لی اینسانلار آزالیر. بونون ایرانین گلجیی اوچون تهلوکه‌لی اولدوغونو ایسه رئژیم بئله اعتراف ائدیر.
- ایران‌دا سیزین حرکاتدان ساوایی باشقا هانسی طلبه بیرلیکلری وار؟
- ایران‌دا گونئی آذربایجان، تورکمن، قشقای، ائلجه ده غیری-فارسلارا و فارسلارا عایید اولان اؤیرنجی بیرلیکلری حاقین‌دا دانیشماق اولار. گونئی آذربایجان، قاشقای و تورکمن طلبه بیرلیکلری ایله علاقه‌لریمیز داها سیخدیر. بیر چوخ درنکلرده، بیرلیکلرده فعالیت گؤستریریک. بو باره‌ده اطرافلی دانیشماق اونلارین حیاتی اوچون تهلوکه‌لی اولا بیلر دئیه، عمومی معلومات وریرم. بو کاتگورییادان اولان طلبه بیرلیکلری ایله سیخ علاقه‌میز اولوب و بیر سیرا اوغورلار دا الده ائتمیشیک. غیری-فارسلارلا علاقه‌لریمیز کئچمیش‌ده نئجه وار ایدیسه، یئنه ده داوام ائدیر. اورتاق بیاناتلاریمیز و بیرگه آکسییالارین قورولماسین‌دا ایشبیرلییمیز اولوب. فارس اؤیرنجیلرین قروپلارینا گلینجه، بو اؤیرنجی حرکاتی ۲۰۰۹-جو ایله قدر گوجلو ایدی. احمدینژاد حاکمیته گلدیکدن سونرا فعالیتده اولان درنک و گروپلاری آغیر باسقیلارا معروض قالدیلار. حاضردا گروپ شکلین‌دن داها چوخ فردی فعالیت گؤستریرلر. اونلارلا بیر او قدر ده علاقه‌میز قالماییب.
- گونئی آذربایجان مسئله‌سینین حلی، سویداشلاریمیزین حاقلارینی برپا ائتمه‌سی اوچون نه کیمی آددیملار آتیلمالیدیر؟
- گونئی آذربایجان میللی حرکاتین‌دا میللتین سادتی و آزادلیغی بیر قوش کیمی تصویر ائدیلیر. قوشون بیر قانادی گونئی آذربایجاندا یاشایان میللی فعاللار، دیگر قانادی ایسه خاریجده یاشایان میللی فعاللاردیر. بو قانادلار گوجلو اولمالیدیر و بیرگه حرکت ائتمه‌لیدیر کی، اوچا بیلسین. خاریجده یاشایان فعاللارین ان مهم وظیفه‌سی لوببی‌چی‌لیکدیر. لاکین بو فعالیت بیر آز ضعیف‌دیر. گؤرولن ایشلر قانع‌ادیجی دئییل.
.jpg)
