سون ایللر اؤلکه‌ده والیدینلر طرفیندن اوشاقلارین موختلیف ایدمان نؤولرینه قویولماسی حاللاری آرتیب. اؤلکه‌ده ایدمانا دؤولت سوییه‌سینده قایغی گؤزتریلمه‌سی عائله‌لری بونا داها دا هوسلندیریر. لاکین بزه‌ن اوشاغین یاشی نظره آلینمادان و اونون فیزیکی گؤستریجیلرینه اویغون اولمادان سئچیله‌ن ایدمان اوشاغا خئییردن چوخ زیان وئرمیش اولور. بو دا هله سوموکلرین اینکیشاف مرحله‌سین‌ده اولدوغو بیر یاشدا اوشاق‌دا قالیجی فیزیکی قصورا و داها آغیر پروبلئملره سبب اولا بیلیر.

ماراقلی‌دیر، اوشاقلارین ایدمانلا مشغول اولماق اوچون ان ایده‌آل یاش دؤورو هان‌سی‌دیر؟

بو باره‌ده Axar.az-آ دانیشان پئدیاتر آلتای آبدوللاوغلو بیلدیریب کی، والیدینلر اوشاقلاری یاش قروپلارینا و ساغلاملیق وضعیتلرینه اویغون اولان ایدمان نؤوونه یؤنلتملیدیرلر:

«ایدمان اوشاقلارین حیاتیندا چوخ اؤنملی مشغولیتلردن‌دیر. ایدمانلا مشغول اولماق اوشاقلارین اؤزگووه‌نلرینی آرتیریر، فیزیکی و روحی اینکیشافینا، سوسیال فعاللیغینا چوخ فایدالی تأثیر ائدیر. پیله‌نمه ده داخیل اولماقلا، بیر چوخ خسته‌لیکلرین عمله گلمه‌سینین قارشیسینی آلیر.

والیدینلرین اوشاقلاری یاش قروپلارینا و ساغلاملیق وضعیتلرینه اویغون اولان ایدمان نؤوونه یؤنلتمه‌سی واجیب‌دیر. چونکی اوشاقلیق دؤورون‌ده سوموکلر، اورک عضله‌سی تام فورمالاشمیر. اوشاقلیق دؤورونده ائدیلن ایدمانلارا عمومی اینکیشافتدیریجی حرکتلر، رقص، یئریش، قاچیش و س عاییددیر.

مثلاً، ۲-۳ یاشی اولان اوشاقلار گیمناستیکا، رقص، قاچیشلا مشغول اولا، نظارت آلتین‌دا اوزه بیلرلر. آنجاق داها آغیر، یوروجو و ریسکلی ایدمانلار همین یاش اوچون تهلوکه‌لی‌دیر».

پئدیاتر بیلدیریب کی، ۴ یاش‌دان یوخاری اوشاقلاری ولوسیپد سورمک، اوزگوچولوک، رقص، نیسبتا یوخاری یاشلاردا، ۸ و ۹ یاشلاریندا ایسه وولئیبول، باسکتبول، تننیس، اوزگوچوک کیمی ایدمان نؤولرینه ایستیقامتلندیرمک اولار:

«لاکین بو یاش گؤستریجیلری ساده‌جه گؤستریش‌دیر. طبیعی کی، اوشاقلاری ایسته‌نیله‌ن یاش‌دا ایدمانا یؤنلتمک اولار. ساده‌جه بو یاشلار آرزوولونان و ایده‌آل واختلاردیر. اوشاق‌دا هر هان‌سی‌سا فیزیکی قوسورون قالماماسی، سوموکلرینین کؤورکلشمه‌مه‌سی اوچون بو یاش سئنزینه دقت ائدیلمه‌لی‌دیر».

هکیم بیلدیریب کی، معاصر دؤورون اوشاقلارینی ایدمانا یؤنلتمک ایسه موطلق و واجیب‌دیر. چونکی کومپوتئر عصرینین اوشاقلاری داها چوخ حرکت‌سیز حیات کئچیردیکلرین‌دن، ایدمانا واخت آییرماق اونلارین اینکیشافینا داها یاخشی تأثیر ائد‌جک:

«حرکت‌سیز یاشام، دوزگون اولمایان قیدالانما، ساعتلارلا تئلئویزورون قارشی‌سین‌دا واخت کئچیرتمک اوشاقلاردا بیر سیرا خرونیکی خسته‌لیکلرین تملینی قویور. دوزگون وئریله‌ن فیزیکی تربییه، ایدمانا آیریلان زامان اوشاق و یئنی‌یئتمه‌لرین هرترف‌لی اینکیشافین‌دا اؤز موسبت تأثیرینی گؤستره‌جک».