آنا صحیفه ساغلیق |
هیپئراکتیولیک اوشاغین یاش و اینکیشاف سوییهسینه اویغون اولمایان آشیری حرکتلیلیک، ایستکلرینی ارتهلهیه بیلمهمه (ایمپولسیولیک) و دقت یایینیقلیغی ایله مشاهیده اولونان پسیخولوژی پروبلئمدیر.
آخار. آذ خبر وئریر کی، باشلاما یاشی ۳-۴ یاش اولاراق گؤرولسه ده، علامتلر داها ائرکن واختلاردا اؤزونو گؤستره بیلیر. هله کؤرپهلیک دؤوروندن اوشاغین آز یاتماسی، ناراحاتلیغی، تئز-تئز آغلاماسی هیپراکتیولیین ایلکین گؤستریجیلرینه مثال اولا بیلر.
اوغلانلاردا قیزلارا نیسبتا ۳-۴ دفعه داها آرتیق مشاهیده اولونور.
هیپئراکتیولیین هانسی سببلردن یارانماسی علمه هله تام آیدین اولماسا دا، بونونلا باغلی معین فیکیرلر مؤوجوددور.
گنئتیک یوللا اؤتورولمه: هیپراکتیو اوشاقلارین بیرینجی درجهلی قوهوملاریندا دا بو تیپ علامتلر گؤرولمکدهدیر. عائله ایله باغلی ائدیلهن آراشدیرمالاردا اوزه چیخان نتیجهلر اونو گؤستریر کی، هیپئراکتیو اوشاقلارین آتا-آنالاریندا بو علامتلرین گؤرولمه احتیمالی ۲-۸ دفعه ، باجی-قارداشلاریندا ایسه باشقا اوشاقلارلا موقاییسهده ۲-۳ دفعه داها چوخ راست گلینیر. همچینین اکیزلر اوزرینده آپاریلان تدقیقاتلاردا عینی یومورتا اکیزینده پروبلمین جوت گؤرولمه احتیمالی ۸۰-۹۰%، فرقلی یومورتا اکیزلرینده ایسه ۳۰%-دیر.
موحیطین تأثیری: بیرباشا اولاراق هیپراکتیولییه سبب اولماسا دا، گئنئتیک یاتقینلیغی اولان شخصلرده بو پروبلمین اوزه چیخماسینا شرایط یارادیر. بو تأثیرلره عائلهنین قورولوشو، کئچیردیی تراوماتیک حادثهلر، دوغوم اؤنجهسی (حامیلهلیک دؤنهمینده آنانین کئچیردیی ایسترس، ایستیفاده ائتدیی ضررلی مادهلر)، دوغوم آنی (ارکن دوغوم) و دوغوم سونراسیندا (کئچیردیی خستهلیکلر، ایستیفاده ائتدیی درمانلار و س.) باش وئرن معین حادثهلر عاییددیر.
هیپراکتیولیین اساس گؤستریجیلری آشیری حرکتلیلیک، دقت یایینیقلیغی و ایمپولسیولیکدیر (ایستکلرینه، دانیشیغینا و حرکتلرینه نظارت ائده بیلمهمه). بعضی اوشاقلاردا بونلارین ایکیسی قاباریق گؤرولدویو حالدا (مثلاً، دقت داغینیقلیغی ایله حرکتلیلیک و یا ایمپولسیولیکله حرکتلیلیک)، بعضی قیسمینده ۳-جو درجهلی هیپئراکتیولیک آدلاندیردیغیمیز ان آغیر فورما ایمپولسیولیک، دقت یایینیقلیغی و حرکتلیلیین اوچو بیرگه گؤرولور.
هیپراکتیولیین اساس علامتلری:
- چوخ آغلاماق،
- آز یاتماق،
- یاتیلی وضعیتده ده چوخ حرکت ائتمک،
- اوتورماغی سئومهمک، اوتورسا بئله، الینی- آیاغینی اویناتماق،
- نتیجهنی دوشونمهدن اؤزونو تهلوکهیه آتماق،
- ائوده دیوانین اوستونده گزمک،
- دقتینی بیر ایشه و یا درسه وئره بیلمهمک،
- باشقا اوشاقلاری ایتلهمک، وورماغی سئومک،
- تئز هیجانلانماق و عصبلشمک.
هیپراکتیولیک یئنییئتمهلیک و یئتکینلیک دؤنهمینده آشیری حرکتلیلیکله مشاهیده اولونماسا دا، اوشاقلیقدا دوزگون کورئکسییا اولونماییبسا و ساغلیقلی عائله اورتامی یارادیلماییبسا، دقت یایینیقلیغی، قرارسیزلیق، دپرسییایا مئییللیلیک، بیر یئرده قرار توتا بیلمهمه، اونوتقانلیق کیمی حاللار اؤزونو گؤستره بیلر.
تاریخ
2019.10.30 / 22:38
|
مولف
Axar.az
|