شرقی آذربایجان‌دا ۱۰ نفر قریپ‌دن حیاتینی ایتیریب.

بو سؤزلری تبریز طب علملری اونیورسیتتینین معاوینی حکیم روزبه رجایی آچیقلاماسین‌دا دئییب.

«بو ۱۰ نفر تبریزین امام رضا، اوشاقلار، سینا و شمس خسته‌خانالارین‌دا یاتارکه‌ن آ قریپی سببی ایله اؤلوبلر. اؤلنلر بؤیوکلر و اوشاقلاردیلار. ایندی بیر نئچه نفر تبریزین خسته‌خانالارین‌دا قریپ ویروسونا یولوخماق‌دا شوبهه‌لی اولاراق نظارت‌ده ساخلانیلیرلار. آنالیزلرین جوابی دقیق بللی اولمایینجا قطعی سؤز دئمک اولماز. قریپین باشلانغیج مرحله‌ده علامتلریندن، قیزدیرما، آردیجیل اؤسکورک، آغری ایله یاناشی بدنین حالسیزلاشماسی و خسته‌لیین جدی مرحله‌سین‌ده قانلی اؤسکورک ایله ایسهال کیمی حاللار اؤزونو گؤستریر. بو خسته‌لیین علامتلرینی اؤزونوزده و یا یاخینلارینیزدا گؤرسه‌نیز، هر هان‌سی بیر اینه-درمان‌دان اؤزباشینا ایستیفاده ائتمک‌دن چکینین و متخصصه مراجعت ائدین. قریپین یاییلماسی بو ایل یوکسک فایز تشکیل ائدیر. بونا گؤره اینسانلارین شخصی ساغلاملیقلارینا و گیگینیک قایدالارا دقت یئتیرمه‌لری توصیه اولونور»، – او بیلدیریب.

بو گون کلئیبر تحصیل ایداره‌سینین مسئوللاریندان بیرینین وئردیی معلوماتا گؤره، کلئیبرین ایبتیدای مدرسه‌لری و اوشاق باغچالاری سحر و گونورتا نؤوبه‌سینین هر ایکی‌سی تعطیل اعلان ائدیب. ساغلاملیق مرکزلرینین ایستیی و تاپشیریغی ایله قریپین باشقا اوشاقلارا کئچمه‌سینین قارشی‌سینی آلماق اوچون بو آددیم آتیلیب.

قید ائدک کی، تعطیل آنجاق کلیبر شهرینده‌کی مدرسه‌لره عایددیر و کندلره شامیل اولونمور.