بیر چوخو هله ده پولشا هوا مکانین‌دا باش وئرنلرین فرقینه وارمیر. مسئله درونلارین سایین‌دا و یا پولشا هوا مکانینا داخل اولما مقصدینده دئییل - بو حادثه استراتژی کاراکتر داشییر.

نه باش وئریب و نه باش وئریر؟

یقین کی، «قاینادیلان قورباغا» اکسپریمنتینی ائشیتمیسینیز. اکسپریمنتین ماهیتی بئله‌دیر: اگر قورباغانی بیرباشا قاینار سویا آتسان، او، درحال توللاناراق سودان چیخاجاق. اما اونو سویوق سویا قویوب سویو یاواش-یاواش قیزدیرماغا باشلاسان، قورباغا تهلوکه‌نی حس ائتمه‌یه‌جک و نتیجه‌ده اؤلجک...

نووه دورو و اسکالاسییا استراتگییالاری

۱۹۴۵-جی ایلده آمریکا دنیادا نووه سلاحینا صاحب اولان ایلک اؤلکه اولدو. آردینجا: ۱۹۴۹ - س.س.ر.ی، ۱۹۵۲ - بؤیوک بریتانیا، ۱۹۶۰ - فرانسا، ۱۹۶۴ - چین.

اوزون ایللر عرضینده دنیانین حربی-سیاسی استراتگلری نووه سلاحیندان نه زمان و هانسی حاللاردا استفاده ائدیله بیلجیی باره‌ده خصوصی آلگوریتملر ایشله‌ییب حاضرلادیلار. بونونلا یاناشی، قارشی طرفین نووه ضربه‌سی ائندیرمه‌سینین قارشی‌سینی آلماق اوچون «تهلوکه‌سیزلیک تکنیکاسی» دا فورمالاشدی.

مثلاً، روسیانین مشهور "دسکالاسییا اوچون اسکالاسییا" کنسپسییاسی وار. اونون ماهیتی بئله‌دیر: کریتیک وضعیتده قارشی طرفین آز اهالی‌سی اولان اراضی‌سینه نسبتا کیچیک نووه ضربه‌سی ائندیرمک و آردینجا اولتیماتوم ایر‌لی سورمک: «بونو و بونو ائدین، یوخسا نوبتی ضربه‌نی استراتژی اوبیکتلرینیزه ائندیرجییک».

اما بو استراتگییانین بیر مهم محدودیتی وار: بو، یالنیز نووه سلاحی اولمایان اؤلکه‌لره قارشی ایشلییر. اگر همین اؤلکه‌نین نووه گوجونه صاحب و گوج‌لو اردویا مالک متفقی وارسا، او، دئیه بیلر: «اگر سیز نووه ضربه‌سی ائندیرسه‌نیز، بیز سیزه داغیدیجی جواب وئرجییک».

خاطیرلاییرسینیزسا، محض بو خبردارلیغی آمریکا ۲۰۲۲-جی ایلین پاییزین‌دا روسیایا آچیق شکل‌ده ائتمیشدی.

باشقا سؤزله، هر نووه دولتینین اؤز «قاینادیلان قورباغا» استراتگییاسی وار.

بایدنین و ترامپین یاناشمالاری

اوکراینا محاربه‌سینده بونو بایدنین سیاستینده گؤردوک: آمریکا آددیم-آددیم، مرحله-مرحله اوکراینایا داها چوخ و داها گوج‌لو سلاحلار گؤندریردی. باشقا سؤزله، بایدن «قورباغا»نی (پوتینی) یاواش-یاواش قاینادیلان سویا اوتورتدو و «قازانین قاپاغینی باغلادی».

اما ترامپ حاکمیته گلندن سونرا «قاپاق آچیلدی» و «قورباغا» قازاندان چیخدی.

بوگونکو حادثه‌لر

بو گون گؤردویوموز هجوم پولشایا قارشی داغیدیجی ضربه دئییلدی، اما سووئرن دولتین هوا مکانینین پوزولماسی فاکتی باش وئردی.

بو، دؤیوش دئییل، تخریبات کاراکترلی هجوم‌دور - اسکالاسییا پیللکه‌نینده داها بیر آددیم‌دیر.

باشقا سؤزله، پوتین آرتیق «قورباغانی قایناتماق» ایسته‌ییر.

اوچ گون اول - محاربه باشلایاندان بری ایلک دفعه اولاراق - اوکراینا ناظیرلر کابینتینین بناسینا راکت آتیلدی. غربین رئاکسییاسی نه اولدو؟ هئچ نه.

بو گون ایسه پولشایا قارشی کوتلوی درون هجومو باش وئردی. پوتین سانکی ترامپا سوال عنوانلاییر: «نه دئییرسن، ترامپ؟»

نه ائتمه‌لی؟

بو سیتواسییادا آدکوات جواب اوکراینایا سلاح تداروکونو کسکین آرتیرماق و روسیایا یئنی سانکسییالار تطبیق ائتمکدیر.

اگر غرب آددیملارینی سرتلشدیرمه‌سه و روسیایا قارشی داها آگرسیو سیاست یوروتمه‌سه، پوتین «قورباغانی قایناتماغا» داوام ائد‌رک، غربین بیرلیینی پارچالاماغا چالیشاجاق.